ଉତ୍ତରାଖଣ୍ଡରେ ବସ୍‌ ଦୁର୍ଘଟଣା ଘଟି ୨୮ ମୃତ

ଅଲ୍‌ମୋରା: ଉତ୍ତରାଖଣ୍ଡର ଅଲ୍‌ମୋରାଠାରେ ଏକ ବସ୍ ଦୁର୍ଘଟଣା ଘଟି ୨୮ ଜଣ ଯାତ୍ରୀଙ୍କ ମୃତ୍ୟୁ ଘଟିଥିବା ସୂଚନା ରହିଛି। ମୃତକଙ୍କ ବ୍ୟତୀତ ଆହୁରି ଅନେକ ଜଣ ଫସି ରହିଥିବାର ଆଶଙ୍କା କରାଯାଉଛି। ଦୁର୍ଘଟଣା ଘଟିଥିବା ବେଳେ ଅତି କମରେ ୩୫ ଜଣ ଯାତ୍ରୀ ବସ୍ ଭିତରେ ଥିଲେ। ବସ୍‌ଟି ଏକ ଘାଇ ଭିତରକୁ ଖସି ପଡ଼ିଥିବା ସୂଚନା ରହିଛି।

ମାର୍ଚ୍ଚୁଲାର ସଲ୍‌ଟ୍‌ ଅଞ୍ଚଳରେ ଏହି ଦୁର୍ଘଟଣାସ୍ଥଳରେ ଜାତୀୟ ବିପର୍ଯ୍ୟୟ ମୁକାବିଲା ଫୋର୍ସ (ଏନଡିଆରଏଫ) ଏବଂ ରାଜ୍ୟ ବିପର୍ଯ୍ୟୟ ମୁକାବିଲା ଫୋର୍ସ (ଏସଡିଆରଏଫ) ର ପୁଲିସ ଏବଂ ଟିମ୍ ଉଦ୍ଧାର କାର୍ଯ୍ୟ ଜାରି ରଖିଛନ୍ତି। ଅଲ୍‌ମୋରା ପୁଲିସ ଅଧୀକ୍ଷକ ଦେବେନ୍ଦ୍ର ପିଞ୍ଚା କହିଛନ୍ତି ଯେ ମୃତ୍ୟୁ ସଂଖ୍ୟା ବଢ଼ିବ‌ ବୋଲି ଆଶଙ୍କା କରାଯାଉଛି।

ସଲ୍‌ଟ୍‌ର ଉପ-ଜିଲ୍ଲା ମାଜିଷ୍ଟ୍ରେଟ ସଞ୍ଜୟ କୁମାର କହିଛନ୍ତି ଯେ କିଛି ଯାତ୍ରୀଙ୍କୁ ଉଦ୍ଧାର କରାଯାଇ ଡାକ୍ତରଖାନାରେ ଭର୍ତ୍ତି କରାଯାଇଛି। ଏହି ଘଟଣା ସମୟରେ ବସ୍‌ରୁ ଖସିପଡିଥିବା ଜଣେ ଯାତ୍ରୀ ସକାଳ ୯ଟାରେ ପୁଲିସ୍‌କୁ ସୂଚନା ଦେଇଥିଲେ।

ଉତ୍ତରାଖଣ୍ଡ ମୁଖ୍ୟମନ୍ତ୍ରୀ ପୁଷ୍କର ସିଂ ଧାମି ମୃତକଙ୍କ ପରିବାର ପାଇଁ ପ୍ରତ୍ୟେକଙ୍କୁ ୪ ଲକ୍ଷ ଟଙ୍କା ଏବଂ ଆହତଙ୍କ ପାଇଁ ପ୍ରତ୍ୟେକଙ୍କୁ ୧ ଲକ୍ଷ ଟଙ୍କା ଆର୍ଥିକ ସହାୟତା ଘୋଷଣା କରିଛନ୍ତି ବୋଲି ନ୍ୟୁଜ୍ ଏଜେନ୍ସି ଏଏନ୍‌ଆଇ ରିପୋର୍ଟ କରିଛି।

‘‘ଅଲ୍‌ମୋରା ଜିଲ୍ଲାର ମାର୍ଚ୍ଚୁଲାରେ ଘଟିଥିବା ଦୁର୍ଭାଗ୍ୟଜନକ ବସ୍ ଦୁର୍ଘଟଣାରେ ଯାତ୍ରୀଙ୍କ ମୃତ୍ୟୁକୁ ନେଇ ଅତ୍ୟନ୍ତ ଦୁଃଖଦ ଖବର ଆସିଛି।  ଉଦ୍ଧାର କାର୍ଯ୍ୟ ତ୍ବରାନ୍ବିତ କରିବାକୁ ଜିଲ୍ଲା ପ୍ରଶାସନକୁ ନିର୍ଦ୍ଦେଶ ଦିଆଯାଇଛି’’ ବୋଲି ମୁଖ୍ୟମନ୍ତ୍ରୀ ଏକ ‘ଏକ୍ସ’ ପୋଷ୍ଟରେ କହିଛନ୍ତି।

ସେ କହିଛନ୍ତି, “ଦୁର୍ଘଟଣାସ୍ଥଳରେ ସ୍ଥାନୀୟ ପ୍ରଶାସନ ଏବଂ ଏସ୍‌ଡିଆର୍‌ଏଫ୍‌ ଟିମ୍ ଆହତମାନଙ୍କୁ ଉଦ୍ଧାର କରି ନିକଟସ୍ଥ ସ୍ୱାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ପଠାଇବା କାର୍ଯ୍ୟ ଆରମ୍ବ କରିଛନ୍ତି।  ଆବଶ୍ୟକ ସ୍ଥଳେ ଗୁରୁତର ଆହତ ଯାତ୍ରୀମାନଙ୍କୁ ବିମାନରେ ନେବା ପାଇଁ ମଧ୍ୟ ନିର୍ଦ୍ଦେଶ ଦିଆଯାଇଛି।

ସୌଜନ୍ୟ – ସମ୍ବାଦ