ବାଗଦାଦ: ଇରାକରୁ ଏକ ଭୟଙ୍କର ଏବଂ ହୃଦୟ ବିଦାରକ ଘଟଣା ସାମ୍ନାକୁ ଆସିଛି ଯାହା ମାନବଜାତିକୁ ଲଜ୍ଜିତ କରିଛି। ରାଜଧାନୀ ବାଗଦାଦରେ, ଜଣେ ନିର୍ଦ୍ଦୋଷ ୧୫ ବର୍ଷୀୟ ଝିଅ କୌସର ବଶର ଅଲ-ହୁସାଇଜାୱିକୁ ତାଙ୍କ ନିଜ ବାପା, କାକା ଏବଂ ବର ନିର୍ମମ ଭାବରେ ହତ୍ୟା କରିଛନ୍ତି। କୌସରଙ୍କ ଏକମାତ୍ର ଅପରାଧ ଥିଲା ଯେ, ସେ ତାଙ୍କ ସମ୍ପର୍କୀୟ ଭାଇ, ଯେକି ଜଣେ ମଦ୍ୟପ ଏବଂ ଡ୍ରଗ୍ସ ବ୍ୟବସାୟୀଙ୍କୁ ତାଙ୍କୁ ନିଜର ଇଚ୍ଛା ବିରୋଧରେ ବିବାହ କରିବାକୁ ମନା କରି ଦେଇଥିଲେ। ହତ୍ୟା ପରେ ଏହି ଘଟଣାର ସବୁଠାରୁ ଭୟଙ୍କର ଏବଂ ନୃଶଂସ ଦୃଶ୍ୟର ଭିଡିଓ ପ୍ରକାଶ ପାଇଛି। କୌସରଙ୍କ ମୃତ୍ୟୁ ପରେ, ତାଙ୍କ ପରିବାରର ଲୋକମାନେ କୌଣସି ଦୁଃଖ ପ୍ରକାଶ କରିନଥିଲେ, ବରଂ ସେମାନେ ରାସ୍ତାକୁ ଓହ୍ଲାଇ ଉତ୍ସବ ପାଳନ କରିଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି। ଏହି ଭିଡିଓରେ,ପରିବାରର ସଦସ୍ୟମାନେ ଢୋଲର ତାଳେ ତାଳେ ନାଚି ଗୀତ ଗାଇ କୌସରଙ୍କ ମୃତ୍ୟୁର ଉତ୍ସବ ପାଳନ କରୁଥିବାର ଦେଖାଯାଉଛି। ଏହି ହତ୍ୟାକାଣ୍ଡ ସୋସିଆଲ ମିଡିଆରେ ୟୁଜରଙ୍କ ମଧ୍ୟରେ ଅସନ୍ତୋଷ ସୃଷ୍ଟି କରିଛି।
ଦି ଗାର୍ଡିଆନ୍ ଅନୁଯାୟୀ, କୌସର ଇରାକ ରାଜଧାନୀ ବାଗଦାଦର ଦକ୍ଷିଣ-ପୂର୍ବରେ ଥିବା ଏକ ଉପନଗର ଅଲ୍-ନାହରାୱାନ୍ର ବାସିନ୍ଦା ଥିଲେ। ୧୩ ବର୍ଷ ବୟସରେ ତାଙ୍କ ସ୍କୁଲ ଯିବା ବନ୍ଦ କରାଯାଇ ଜଣେ ମଦ୍ୟପ, ବୟସ୍କ ପୁରୁଷଙ୍କ ସହିତ ବଳପୂର୍ବକ ବିବାହ କରାଯିବା ପରେ ତାଙ୍କ ଜୀବନ ଦୁଃଖଦ ପରିସ୍ଥିତିରେ ବୁଡ଼ି ଯାଇଥିଲା। କୌସର ନିରନ୍ତର ଶାରୀରିକ ହିଂସା ଏବଂ ମାନସିକ ନିର୍ଯାତନା ଏକ ବର୍ଷ ସହ୍ୟ କରିଥିଲେ। ତା’ପରେ କୌସର ତାଙ୍କ ସ୍ୱାମୀଙ୍କ ପାଖରୁ ଖସି ବାପାମାଆଙ୍କ ଘରକୁ ଫେରିବାରେ ସଫଳ ହୋଇଥିଲେ। କିନ୍ତୁ ତାଙ୍କ ଯତ୍ନ ନେବା ପରିବର୍ତ୍ତେ, ତାଙ୍କ ନିଜ ପରିବାର ଲୋକେ ତାଙ୍କୁ ଘରେ ନଜର ବନ୍ଦୀ କରି ରଖିଥିଲେ। ତାଙ୍କ ସ୍ୱାମୀଙ୍କ ପାଖକୁ ଫେରିବା ପାଇଁ ତାଙ୍କ ଉପରେ ନିରନ୍ତର ଚାପ ପକାଯାଉଥିଲା। ଶେଷରେ, ଦୀର୍ଘ ସଂଘର୍ଷ ଏବଂ ଆତ୍ମହତ୍ୟା ଧମକ ପରେ, ତାଙ୍କୁ ୨୦୨୫ମସିହାର ଶେଷ ଭାଗରେ କୋର୍ଟ ଦ୍ୱାରା ଆନୁଷ୍ଠାନିକ ଭାବରେ ଛାଡପତ୍ର ମିଳିଥିଲା।
ଭାଇ ଜେଲ୍ରୁ ମୁକ୍ତ ହୋଇଥିଲେ
ଛାଡପତ୍ରର କିଛି ଦିନ ପରେ, କୌସରଙ୍କ ସମ୍ପର୍କୀୟ ଭାଇ ଜେଲ୍ରୁ ମୁକ୍ତ ହୋଇଥିଲେ। ସେ କୌସରଙ୍କ ପିତାମାତାଙ୍କୁ ବିବାହ କରିବା ପାଇଁ ଯୋଗାଯୋଗ କରିଥିଲେ। ସମଗ୍ର ଅଞ୍ଚଳ ଜାଣିଥିଲା ଯେ, ସେହି ବ୍ୟକ୍ତି ମଦ ଏବଂ ଡ୍ରଗ୍ସ ଚାଲାଣରେ ଜଡିତ ଥିଲେ। କୌସର ବିବାହକୁ ସିଧାସଳଖ ମନା କରିଦେଇଥିଲେ, କିନ୍ତୁ ତାଙ୍କ ପରିବାର ଆଦିବାସୀ ପରମ୍ପରାକୁ ଦର୍ଶାଇ କୌସରଙ୍କର କୌଣସି କଥା ଶୁଣି ନଥିଲେ। ତାଙ୍କ ବିବାହ ଦିନ ପାଖେଇ ଆସିବା ସହିତ, କୌସରଙ୍କ ମନରେ ପୁଣି ଥରେ ନିର୍ଯାତନା ଏବଂ ହିଂସାର ନର୍କକୁ ଠେଲି ଦିଆଯିବାର ଭୟ ବଢ଼ିବାରେ ଲାଗିଲା। ଶେଷରେ, ମେ’ ମାସର ଆରମ୍ଭରେ, ସେ ଘରୁ ଲୁଚି ପଳାଇ ଯାଇଥିଲେ। ତାଙ୍କ ପାଖରେ ଟଙ୍କା ନଥିଲା। କେବଳ ସେ ପିନ୍ଧିଥିବା ପୋଷାକ ଏବଂ ତାଙ୍କର ହିଜାବ ଧରି ସେ ଘରୁ ବାହାରି ଆସିଥିଲେ।
ଘରୁ ପଳାଇବା ପରେ, ଜଣେ ପଡ଼ୋଶୀ ତାଙ୍କୁ ବାଟରେ ଅପହରଣ କରିନେଇ ତିନି ଦିନ ପର୍ଯ୍ୟନ୍ତ ବନ୍ଧକ ରଖିଥିଲେ। ଏହି ସମୟ ମଧ୍ୟରେ କୌସର କଠୋର ନିର୍ଯାତନା ସହିଥିଲେ। ଶେଷରେ ଯେତେବେଳେ ସେ ଖସି ପଳାଇବାରେ ସଫଳ ହେଲେ, ସେ କାନ୍ଦି କାନ୍ଦି ତାଙ୍କ ପରିବାରକୁ କହିଥିଲେ ଯେ ସେ ସ୍ୱେଚ୍ଛାକୃତ ଭାବରେ ଯାଇନଥିଲେ। ତାଙ୍କୁ ବଳପୂର୍ବକ ଟାଣି ନିଆଯାଇଛି। ଅଞ୍ଚଳର ସିସିଟିଭି ଫୁଟେଜ୍ ମଧ୍ୟ କୌସରଙ୍କ କଥାକୁ ସମର୍ଥନ କରିଥିଲା। ଏହା ସତ୍ତ୍ୱେ, ତାଙ୍କ ପରିବାର କିଛି ଶୁଣି ନଥିଲେ। କୌସରଙ୍କ ବାପା, କାକା ଏବଂ ବର ପ୍ରଥମେ ତାଙ୍କୁ ପଚରାଉଚରା କରିଥିଲେ। ପରେ ତାଙ୍କୁ ଏକ କାରରେ ବସାଇ ବାଗଦାଦର ଉପକଣ୍ଠରେ ଥିବା ଏକ ନିର୍ଜନ ପଡ଼ିଆକୁ ନେଇଯାଇଥିଲେ। ଜନଜାତିର ଲୋକମାନେ ତାଙ୍କୁ ଗୋଟିଏ ପରେ ଗୋଟିଏ ୧୦ ଥର ଗୁଳି କରିଥିଲେ। ପରେ ତାଙ୍କ ମୁଣ୍ଡକୁ କୁରାଢ଼ିରେ ହାଣି ଦୁଇ ଗଡ଼ କରିଦେଇଥିଲେ। ହତ୍ୟା ପରେ, ତାଙ୍କ ଶରୀରକୁ କୌଣସି କପଡା କିମ୍ବା ଧାର୍ମିକ ରୀତିନୀତି ବିନା ଏକ ଖାଲରେ ଫିଙ୍ଗି ଦିଆଯାଇଥିଲା।
ସୌଜନ୍ୟ ସମ୍ବାଦ