Farmers: କୁହୁଳୁଛି ଧାନ ଧୂଆଁ: ବିରୋଧୀ ମାରୁଛନ୍ତି ଫୁଙ୍କ, ଆନ୍ଦୋଳନ ପାଇଁ ଅଣ୍ଟା ଭିଡ଼ୁଛନ୍ତି ଚାଷୀ

ସମ୍ବଲପୁର: ଧାନ କୁଇଣ୍ଟାଲ୍ ପିଛା ୩୧୬୯ ଟଙ୍କା ଦିଅ, ନଚେତ ବିଧାୟକଙ୍କ ଦରମା ବୃଦ୍ଧି ପ୍ରତ୍ୟାହାର କର। ଏଭଳି କୌତୂହଳପ୍ରଦ ଦାବି ରଖି ଆନ୍ଦୋଳନ ଚେତାବନୀ ଦେଇଛି ରାଜବୋଡ଼ାସମ୍ବର କୃଷକ ସଂଗଠନ। ସମସ୍ତ ଚାଷୀଙ୍କ ସବୁ ଟୋକନ୍‌ ଜାରି ସହ ମଣ୍ଡିରେ ପଡ଼ିଥିବା ଧାନ ଶୀଘ୍ର ଉଠାଣ ଦାବିରେ ଉପଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଧାରଣା ଜାରି ରଖିଛି ଏହି ସଂଗଠନ।  ଉପରୋକ୍ତ ଦାବି ପୂରଣ ନ ହେଲେ ଆସନ୍ତା ୨୧ ତାରିଖରୁ ବଡ଼ ଆନ୍ଦୋଳନ କରିବାକୁ ମଧ୍ୟ ଚେତାବନୀ ଦେଇଛନ୍ତି। କେନ୍ଦ୍ର ସରକାର ଧାନର ସହାୟକ ମୂଲ୍ୟରେ ବୃଦ୍ଧି କରିଥିବା ୬୯ ଟଙ୍କାକୁ ରାଜ୍ୟ ସରକାର ନିଜ ପକେଟ୍‌ରେ ନରଖି ଚାଷୀଙ୍କୁ ପ୍ରଦାନ କରନ୍ତୁ ବୋଲି ସେମାନେ ଦାବି କରିଛନ୍ତି। ଧାନ ସଂଗ୍ରହରେ ସୃଷ୍ଟ ଜଟିଳତାକୁ ନେଇ ସାରା ପଶ୍ଚିମ ଓଡ଼ିଶାରେ ଚାଷୀଙ୍କ ଆକ୍ରୋଶ ବଢ଼ିବାରେ ଲାଗିଛି। କେଉଁଠି ବି ଧାନସଂଗ୍ରହ ବ୍ୟବସ୍ଥିତ ହୋଇପାରି ନାହିଁ।

ଟୋକନ୍ ଆସି ନ ଥିବାରୁ ଆସନ୍ତା ୧୯ ତାରିଖ ଦିନ ସମ୍ବଲପୁର ଜିଲ୍ଲା କୃଷକ ସଂଗଠନ ବନ୍ଦ ଡାକରା ଦେଇଥିବାବେଳେ ଏହାକୁ ସମର୍ଥନ କରି ଘଟଣାକୁ ରାଜନୈତିକ ରଙ୍ଗ ଦେଇଛି ବିଜେଡି। ବିଜେଡି କେବଳ ବନ୍ଦକୁ ସମର୍ଥନ କରିବ ନାହିଁ, ନିଜେ ବନ୍ଦରେ ସାମିଲ ହେବ ବୋଲି ଆଜି ପୂର୍ବତନ ମନ୍ତ୍ରୀ ତଥା ଜିଲ୍ଲା ବିଜେଡି ସଭାପତି ରୋହିତ ‌ପୂଜାରୀ ଘୋଷଣା କରିଛନ୍ତି। ଅପରପକ୍ଷରେ ଆସନ୍ତାକାଲି ସମ୍ବଲପୁର ସହର ମୁଖ୍ୟ ବଜାରକୁ ଚାଷୀମାନେ ଧାନ ନେଇ ପହଞ୍ଚିବେ ଏବଂ ସେଠାରେ ପସରା ପକାଇ ବିକ୍ରି କରି ପ୍ରତିବାଦ ଜଣାଇବେ ବୋଲି କହିଛନ୍ତି।