୫୦ ଲକ୍ଷ ଟଙ୍କା ପାଇଁ ନାବାଳକକୁ ଝାରସୁଗୁଡ଼ାରୁ ଅପହରଣ, ବରଗଡ଼ରୁ ଅର୍ଦ୍ଧଦଗ୍ଧ ମୃତଦେହ ଉଦ୍ଧାର

ଝାରସୁଗୁଡ଼ା: ୫୦ ଲକ୍ଷ ଟଙ୍କା ପାଇଁ ଦଶମ ଶ୍ରେଣୀ ଛାତ୍ରଙ୍କୁ ଅପହରଣ ପରେ ହତ୍ୟା । ହତ୍ୟା କରିବା ପରେ ପ୍ରମାଣ ନଷ୍ଟ ପାଇଁ ମୃତ ଦେହକୁ ପୋଡି ଦେଇଛନ୍ତି ଅପହରଣକାରୀ । ଝାରସୁଗୁଡାରୁ ଆସିଛି ଏମିତି ଏକ ଚାଞ୍ଚଲ୍ୟକର ଖବର । ଆଉ ବରଗଡ ଜିଲ୍ଲା ଭେଡେନ୍ ଥାନା ପାଖ ଜଙ୍ଗଲରୁ ଅପହୃତ ଦଶମ ଶ୍ରେଣୀ ଛାତ୍ରଙ୍କ ଅଧାପୋଡା ମୃତଦେହ ଉଦ୍ଧାର ହୋଇଛି ।

ଏ ନେଇ ସୂଚନା ଦେଇଛନ୍ତି, ଝାରସୁଗୁଡା ଏସପି ସ୍ମିତ ପାରମାର । କହିଛନ୍ତି, ଗୋଡଭଗା ପଟରୁ ଏକ ନୀଳରଙ୍ଗର କାରରେ ଦୁଇ-ତିନି ଜଣ ବ୍ୟକ୍ତି ଘଟଣାସ୍ଥଳକୁ ଆସି ସମର୍ଥଙ୍କ ମୃତଦେହକୁ ପୋଡି ଚାଲିଯାଇଥିଲେ । ପୋଲିସ ସେଠାରୁ ଏକ କଟୁରୀ, ପେଟ୍ରୋଲ ଅଣାଯାଇଥିବା ଏକ ପ୍ଲାଷ୍ଟିକ ଜାର ଜବତ କରିଛି । କିନ୍ତୁ ଅପହରଣ ପଛର ସଠିକ୍ କାରଣ ଜଣାପଡିନାହିଁ । ହେଲେ, ଅପହରଣକାରୀ ସମର୍ଥଙ୍କୁ ପୂର୍ବରୁ ଚିହ୍ନିଥିଲେ ବୋଲି ଅନୁମାନ କରୁଛି ପୁଲିସ । ୨ଜଣଙ୍କୁ ସନ୍ଦେହରେ ଅଟକ ରଖି ପଚରାଉଚୁରା କରାଯାଉଛି ।

ଝାରସୁଗୁଡ଼ାରୁ ଅପହରଣ କରାଯାଇଥିବା ନାବାଳକ ସମର୍ଥ ଅଗ୍ରୱାଲ (୧୫)ର ମୃତଦେହକୁ ପୁଲିସ ବରଗଡ଼ ଜିଲ୍ଲାରୁ ଅର୍ଦ୍ଧଦଗ୍ଧ ଅବସ୍ଥାରେ ଉଦ୍ଧାର କରିଛି। ଅଭିଯୁକ୍ତମାନେ ହତ୍ୟା ପୂର୍ବରୁ ପୀଡିତ ପରିବାରକୁ ୫୦ ଲକ୍ଷ ଟଙ୍କା ଦାବି କରିଥିଲେ। କିନ୍ତୁ ଏହା ନମିଳିବାରୁ ନାବାଳକକୁ ହତ୍ୟା କରି ପୋଡ଼ି ଦେଇଥିଲେ। ପୁଲିସ ଏହି ମାମଲାରେ ୨ ଜଣଙ୍କୁ ଗିରଫ କରି ପଚରାଉଚରା କରୁଛି। ଝାରସୁଗୁଡ଼ା ଏସ୍‌ପି ସ୍ମିତ୍‌ ପରମାର ବୁଧବାର ଗଣମାଧ୍ୟମକୁ ଏହି ସୂଚନା ଦେଇଛନ୍ତି।

ସାମ୍ବାଦିକ ସମ୍ମିଳନୀରେ ଏସ୍‌ପି ଶ୍ରୀ ପରମାର କହିଛନ୍ତି, ସମର୍ଥ ଅଗ୍ରୱାଲ ସୋମବାର ସନ୍ଧ୍ୟା ସାଢ଼େ ୫ଟାରେ ସରବାହାଲ ହାଇସ୍କୁଲ ପଡ଼ିଆକୁ ଖେଳିବା ପାଇଁ ଯାଇଥିଲା। ବିଳମ୍ବିତ ସନ୍ଧ୍ୟା ଯାଏଁ ସେ ଘରକୁ ଫେରି ନଥିଲା। ତେଣୁ ପରିବାର ଲେକେ ଆଖପାଖ ଅଞ୍ଚଳରେ ବହୁ ଖୋଜା‌ଖୋଜି କରି ତାଙ୍କୁ ପାଇ ନଥିଲେ। ସମର୍ଥଙ୍କୁ ଫୋନ୍‌ କରାଯାଇଥିଲେ ମଧ୍ୟ ସେ କଲ୍‌ ଉଠାଇ ନଥିଲା। ରାତି ପ୍ରାୟ ସାଢ଼େ ୮ଟାରେ ‌ଦୁର୍ବୃତ୍ତମାନେ ଅପହରଣ କରିଥିବା ନେଇ ପରିବାର ଲୋକଙ୍କୁ ଏକ ଧମକପୂର୍ଣ୍ଣ କଲ ଆସିଥିଲା। ଫୋନ୍‌ କରିଥିବା ଦୁର୍ବୃତ୍ତମାନେ କହିଥିଲେ ଯେ, ୫୦ ଲକ୍ଷ ଟଙ୍କା ମିଳିଲେ ପୁଅକୁ ଜୀବିତ ଅବସ୍ଥାରେ ପାଇପାରିବେ। ଧମକପୂର୍ଣ୍ଣ କଲ୍‌ ପାଇଲା ପରେ ପରିବାର ଲୋକେ ଘଟଣା ଦିନ ରାତି ୯ଟାରେ ଏବାବଦରେ ପୁଲିସକୁ ଜଣାଇଥିଲେ।

ପୀଡିତ ପରିବାର ଲୋକଙ୍କ ଅଭିଯୋଗ ଅନୁସାରେ ସମର୍ଥ ଅଗ୍ରୱାଲକୁ ‌ଉଦ୍ଧାର କରିବା ପାଇଁ ଝାରସୁଗୁଡ଼ା ପୁଲିସ ୩ଟି ସ୍ବତନ୍ତ୍ର ଟିମ୍‌ ଗଠନ କରିଥିଲା। ପୁଲିସ ସିସିଟିଭି ଫୁଟେଜ ଆଧାରରେ ତଦନ୍ତ ଆରମ୍ଭ କରିଥିଲା। ପଡୋଶୀ ଜିଲ୍ଲାକୁ ଯାଇ ମଧ୍ୟ ଘଟଣାର ଛାନ୍‌ଭିନ୍‌ ଆରମ୍ଭ କରିଦେଇଥିଲା। ପୁଲିସ ଟିମ୍‌କୁ ମାର୍ଚ୍ଚ ୨୮-୨୯ ତାରିଖ ରାତିରେ ସୂଚନା ମିଳିଥିଲା ଯେ, ଅପହରଣ ଘଟଣାରେ ସମର୍ଥଙ୍କ ସଂପର୍କୀୟ ତଥା ଝାରସୁଗୁଡ଼ା ବିଜୁନଗର ନିବାସୀ ଅମିତ ଶର୍ମା ଓ ବ୍ରଜରାଜନଗର ଗାନ୍ଧିଛକ ନିବାସୀ ଦିନେଶ ଅଗ୍ରୱାଲ ସାମିଲ ଅଛନ୍ତି। ତଦନ୍ତରୁ ଜଣାପଡ଼ିଲା ଯେ, ଅମିତ ହେଉଛି ଘଟଣାର ମୁଖ୍ୟ ଅଭିଯୁକ୍ତ।

ଏସ୍‌ପି କହିଛନ୍ତି ଯେ, ଅଭିଯୁକ୍ତମାନେ ସମର୍ଥକୁ ହତ୍ୟା କରି ମାର୍ଚ୍ଚ ୨୭-୨୮ ତାରିଖ ରାତିରେ ବରଗଡ଼ ଜିଲ୍ଲାର ଏକ ନିଦ୍ଦିଷ୍ଟ ସ୍ଥାନରେ ଫିଙ୍ଗି ଦେଇଥିଲେ। ତେବେ କେଉଁ କାରଣରୁ ଅଭିଯୁକ୍ତମାନେ ପୀଡିତ ପରିବାରକୁ ୫୦ ଲକ୍ଷ ଟଙ୍କା ମାଗି ଅପହରଣ ଓ ହତ୍ୟା କରିଥିଲେ, ସେନେଇ ଅଧିକ ତଦନ୍ତ ଚାଲିଛି।