NIA: ଆମେରିକୀୟ ଭଡ଼ାଟିଆ ସୈନିକର ଗିରଫଦାରୀ ଓ ହସିନାଙ୍କ ‘ଖ୍ରୀଷ୍ଟିଆନ ରାଷ୍ଟ୍ର ଷଡ୍ଯନ୍ତ୍ର’ ଚେତାବନୀ
୨୦୨୪ରେ ଏକ ହିଂସାତ୍ମକ ଛାତ୍ର ନେତୃତ୍ୱାଧୀନ ବିଦ୍ରୋହ ମାଧ୍ୟମରେ ନିଜ ଦେଶରୁ ବହିଷ୍କୃତ ହେବାର କିଛି ମାସ ପୂର୍ବରୁ ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ବାଂଲାଦେଶ ଓ ମ୍ୟାମାରର କିଛି ଅଂଶରୁ ଏକ ‘ଖ୍ରୀଷ୍ଟିଆନ ରାଷ୍ଟ୍ର’ ଗଠନ ପାଇଁ ଏକ
ନୂଆଦିଲ୍ଲୀ: ୨୦୨୪ରେ ଏକ ହିଂସାତ୍ମକ ଛାତ୍ର ନେତୃତ୍ୱାଧୀନ ବିଦ୍ରୋହ ମାଧ୍ୟମରେ ନିଜ ଦେଶରୁ ବହିଷ୍କୃତ ହେବାର କିଛି ମାସ ପୂର୍ବରୁ ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଶେଖ ହସିନା ବାଂଲାଦେଶ ଓ ମ୍ୟାମାରର କିଛି ଅଂଶରୁ ଏକ ‘ଖ୍ରୀଷ୍ଟିଆନ ରାଷ୍ଟ୍ର’ ଗଠନ ପାଇଁ ଏକ ‘ଶ୍ୱେତାଙ୍ଗ’ ଷଡ୍ଯନ୍ତ୍ର ବିଷୟରେ ଚେତାବନୀ ଦେଇଥିଲେ। ସେତେବେଳେ ଏହା ଉପରେ ସେତେଟା ଧ୍ୟାନ ଦିଆଯାଇ ନ ଥିଲା। ଦୁଇ ବର୍ଷ ପରେ, ଉତ୍ତର-ପୂର୍ବ ଅଞ୍ଚଳରେ ବେଆଇନ କାର୍ଯ୍ୟକଳାପ ଅଭିଯୋଗରେ ଜାତୀୟ ତଦନ୍ତକାରୀ ଏଜେନ୍ସି (ଏନ୍ଆଇଏ) ଦ୍ୱାରା ଜଣେ ଆମେରିକୀୟ ଭଡାଟିଆ ସୈନିକ (ମର୍ସିନାରି) ଓ ଛଅ ଜଣ ୟୁକ୍ରେନ ନାଗରିକଙ୍କୁ ଗିରଫ ହେବା ଘଟଣା ଏବେ ବିଶେଷଜ୍ଞମାନଙ୍କୁ ହସିନାଙ୍କ ସେହି ଚେତାବନୀ ମନେପକାଇ ଦେଇଛି।
ଗତ ସପ୍ତାହରେ ଏକ ନିରବଚ୍ଛିନ୍ନ ଅପରେସନରେ, ଏନ୍ଆଇଏ ତିନୋଟି ବିମାନବନ୍ଦରରୁ ଆମେରିକୀୟ ଭଡାଟିଆ ସୈନିକ ମାଥ୍ୟୁ ଭାନଡାଇକ ସମେତ ବିଦେଶୀ ନାଗରିକଙ୍କୁ ଗିରଫ କରିଥିଲା। ଏନ୍ଆଇଏ କହିଛି ଯେ ପର୍ଯ୍ୟଟକ ଭିସାରେ ଭାରତ ଆସିଥିବା ବିଦେଶୀ ନାଗରିକମାନେ ମ୍ୟାମାରକୁ ଯିବା ପୂର୍ବରୁ ବେଆଇନ ଭାବେ ମିଜୋରାମରେ ପ୍ରବେଶ କରିଥିଲେ। ମିଜୋରାମରେ ପ୍ରବେଶ କରିବା ପାଇଁ ବିଦେଶୀମାନଙ୍କ ଲାଗି ଏକ ସଂରକ୍ଷିତ ଅଞ୍ଚଳ ଅନୁମତି (ପିଏପି) ଆବଶ୍ୟକ।
ଏନ୍ଆଇଏ କହିଛି ଯେ ମ୍ୟାମାରରେ ସେମାନେ ଜାତିଗତ ସଶସ୍ତ୍ର ଗୋଷ୍ଠୀ ବା ଇଏଜିଙ୍କୁ ଅସ୍ତ୍ରଶସ୍ତ୍ର ତାଲିମ ପ୍ରଦାନ କରିଥିଲେ। ଏହି ଇଏଜି ଭାରତର ଉତ୍ତର-ପୂର୍ବରେ କାର୍ଯ୍ୟ କରୁଥିବା ବିଦ୍ରୋହୀ ସଂଗଠନକୁ ସମର୍ଥନ କରିବା ପାଇଁ ଜଣାଶୁଣା। ଅଧିକନ୍ତୁ, ଏନ୍ଆଇଏ ଜାଣିବାକୁ ପାଇଛି ଯେ ଅଭିଯୁକ୍ତମାନେ ୟୁରୋପରୁ ବିପୁଳ ଡ୍ରୋନ୍ ଆଣି ମିଜୋରାମର ଇଏଜି ଓ ଗୋଷ୍ଠୀକୁ ପହଞ୍ଚାଇଥିଲେ। ଅଭିଯୁକ୍ତମାନଙ୍କୁ ୧୧ ଦିନିଆ ଏନ୍ଆଇଏ ହେପାଜତକୁ ପଠାଇ ଦିଆଯାଇଛି। ଏହି ଘଟଣାକ୍ରମ ଗୁଜବକୁ ପୁନର୍ବାର ଜାଗ୍ରତ କରିଛି ଯେ, ଆମେରିକା ଓ ଅନ୍ୟାନ୍ୟ ବିଦେଶୀ ଶକ୍ତି ମ୍ୟାମାରରେ ଜୁଣ୍ଟା ବିରୋଧୀ ଶକ୍ତିକୁ ସମର୍ଥନ ଯୋଗାଉଛି। ୨୦୨୧ରେ ଏକ ବିଦ୍ରୋହରେ ଜୁଣ୍ଟା (ସୈନ୍ୟବାହିନୀ) କ୍ଷମତା ଦଖଲ କରିବା ପରେ ମ୍ୟାମାରରେ ଗୃହଯୁଦ୍ଧ ହୋଇଥିଲା। ଭୂ-ରାଜନୈତିକ ବିଶେଷଜ୍ଞ ଡ. ବ୍ରହ୍ମା ଚେଲାନି କହିଛନ୍ତି ଯେ, ଆମେରିକାର ପ୍ରକ୍ସି ଯୁଦ୍ଧ ଭାରତର ଉତ୍ତର-ପୂର୍ବରେ ପହଞ୍ଚିଛି।
ମାଥ୍ୟୁ ଭାନହାଇକ କିଏ?
ଏନ୍ଆଇଏ ଜାଲରେ ପଡ଼ିଥିବା ବଡ ମାଛ ହେଉଛି ଆମେରିକୀୟ ନାଗରିକ ଭାନହାଇକ, ଯିଏ ପୂର୍ବରୁ ଲିବ୍ୟା ଓ ସିରିଆରେ ସଶସ୍ତ୍ର ସଂଘର୍ଷର ଅଂଶ ଥିଲେ, ଯେଉଁଠାରେ ସେମାନଙ୍କର ନେତାମାନେ ଗାଦିଚ୍ୟୁତ ହୋଇଥିଲେ। ୨୦୧୧ରେ ଲିବ୍ୟାରେ ମୁଆମ୍ମାର ଗଦ୍ଦାଫି ଶାସନ ଦ୍ୱାରା ଗିରଫ ହେବା ପରେ ସେ ଯୁଦ୍ଧ ବନ୍ଦୀ ମଧ୍ୟ ଥିଲେ। ଭାନହାଇକ ହେଉଛି ସନ୍ସ ଅଫ୍ ଲିବର୍ଟି ଇଣ୍ଟରନ୍ୟାସନାଲ (ଏସ୍ଓଏଲ୍ଆଇ)ର ପ୍ରତିଷ୍ଠାତା, ଏକ ଅଣ-ଲାଭକାରୀ ସୁରକ୍ଷା ସଂସ୍ଥା ଯାହା ଏକଚ୍ଛତ୍ରବାଦୀ ଶାସନ ବିରୋଧରେ ଲଢୁଥିବା ଗୋଷ୍ଠୀକୁ ତାଲିମ ପ୍ରଦାନ କରିଥାଏ। ୨୦୨୯ରେ ଭାନହାଇକଙ୍କ ଏସ୍ଓଏଲ୍ଆଇ ଭାରତରେ ‘ଖ୍ରୀଷ୍ଟିଆନ ନିର୍ଯାତନା’କୁ ଫ୍ଲାଗ୍ କରିଥିଲା। ଏହା ଫକ୍ସ ନ୍ୟୁଜ୍ ଦ୍ୱାରା ପ୍ରକାଶ ପାଇଛି। ଏହା ବିଶେଷଜ୍ଞମାନଙ୍କୁ ବିନ୍ଦୁଗୁଡ଼ିକୁ ସଂଯୋଗ କରିବାକୁ ଉତ୍ସାହିତ କରିଛି ଯାହା ସୂଚାଇ ଦେଇଛି ଯେ ଭାନହାଇକ ସେହି ଗୋଷ୍ଠୀର ଅଂଶ ହୋଇପାରନ୍ତି ଯାହା ବିଷୟରେ ହସିନା ୨୦୨୪ରେ ଚେତାବନୀ ଦେଇଥିଲେ।
ସୌଜନ୍ୟ ସମ୍ବାଦ
