Prime Minister: ଇନ୍ଧନ ସଙ୍କଟର ମୁକାବିଲା ନିଜଠାରୁ ଆରମ୍ଭ କଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ
ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇନ୍ଧନ ସଙ୍କଟ ଯୋଗୁଁ ଇନ୍ଧନ ବ୍ୟବହାର କମ୍ କରିବାକୁ ସମ୍ପ୍ରତି ନାଗରିକମାନଙ୍କୁ ଅନୁରୋଧ କରିଥିଲେ। ସେ ଏବେ ଏହାକୁ ନିଜେ କାର୍ଯ୍ୟକାରୀ କରିବା ଆରମ୍ଭ କରିଛନ୍ତି। ସାରା ବିଶ୍ୱରେ ଯୁଦ୍ଧ ଚାଲିଥିବାରୁ, ପ୍ରଧାନମନ୍ତ୍ରୀ ଭାରତୀୟ ଜନସାଧାରଣଙ୍କୁ ଏହି ସଙ୍କଟ ପାଇଁ ପ୍ରସ୍ତୁତ ହେବାକୁ ପରାମର୍ଶ ଦେଇଥିଲେ। ସେ ବିଦେଶ ଯାତ୍ରା ଏଡାଇବା, ସୁନା ନ କିଣିବା ଏବଂ ଇନ୍ଧନ ବ୍ୟବହାର ହ୍ରାସ କରିବା ସମେତ ଅନେକ ଗୁରୁତ୍ୱପୂର୍ଣ୍ଣ ନିର୍ଦ୍ଦେଶ ଜାରି କରିଥିଲେ।
କନ୍ଭୟକୁ ଅଧାକୁ ହ୍ରାସ କରି ସୃଷ୍ଟି କଲେ ଉଦାହରଣ
ଏବେ, ପ୍ରଧାନମନ୍ତ୍ରୀ ନିଜେ ଜନସାଧାରଣଙ୍କ ପାଇଁ ଏକ ଉଦାହରଣ ସୃଷ୍ଟି କରିଛନ୍ତି। ସେ ତାଙ୍କ କାଫଲାକୁ ଅଧା ହ୍ରାସ କରିବାକୁ ନିର୍ଦ୍ଦେଶ ଦେଇଛନ୍ତି। ସେ ତାଙ୍କ କନ୍ଭୟରେ ଗାଡ଼ି ସଂଖ୍ୟା ୫୦ ପ୍ରତିଶତ ହ୍ରାସ କରିବାକୁ ଏସ୍ପିଜିକୁ ନିର୍ଦ୍ଦେଶ ଦେଇଛନ୍ତି। ସେ ଇଲେକ୍ଟ୍ରିକ୍ ଯାନ ବ୍ୟବହାର କରିବାକୁ ମଧ୍ୟ ନିର୍ଦ୍ଦେଶ ଦେଇଛନ୍ତି। ଗଣମାଧ୍ୟମ ରିପୋର୍ଟ ଅନୁସାରେ, ତାଙ୍କ କନ୍ଭୟଏବେ ପ୍ରାୟ ଅଧା ହ୍ରାସ ପାଇବ। ଏହା ସରକାରୀ ଖର୍ଚ୍ଚ ହ୍ରାସ କରିବ। ଜନସାଧାରଣଙ୍କ ପାଇଁ ଏକ ଉଦାହରଣ ସୃଷ୍ଟି କରିବା ପାଇଁ ସେ ଏହି ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନେଇଛନ୍ତି। ପ୍ରଧାନମନ୍ତ୍ରୀଙ୍କ ନିର୍ଦ୍ଦେଶ ପରେ, ଏସ୍ପିଜି କାର୍ଯ୍ୟରେ ଲାଗିପଡ଼ିଛି। ଏସ୍ପିଜି ସୁନିଶ୍ଚିତ କରୁଛି ଯେ, ଯଦିଓ କନ୍ଭୟ ଆକାର ହ୍ରାସ କରାଯିବ ତେବେ ସୁରକ୍ଷାରେ ଯେପରି କୌଣସି ତ୍ରୁଟି ନହେବ ଏବଂ ଆବଶ୍ୟକୀୟ ନିୟମ ପାଳନ କରାଯିବ। ଗଣମାଧ୍ୟମ ରିପୋର୍ଟ ଅନୁଯାୟୀ, ଦିଲ୍ଲୀ ବାହାରେ ସମ୍ପ୍ରତି ଯାତ୍ରାରେ ପ୍ରଧାନମନ୍ତ୍ରୀଙ୍କ କନ୍ଭୟ ଆକାର ପୂର୍ବ ଅପେକ୍ଷା ଛୋଟ ହୋଇଛି।
ଏହିକ୍ରମରେ ଅନେକ ମନ୍ତ୍ରୀ ସେମାନଙ୍କ କନ୍ଭୟରେ ଯାନବାହାନ ସଂଖ୍ୟା ହ୍ରାସ କରିବାକୁ ଏବଂ ବିଦେଶ ଯାତ୍ରା ସ୍ଥଗିତ ରଖିବାକୁ ନିଷ୍ପତ୍ତି ନେଇଛନ୍ତି। ପ୍ରଧାନମନ୍ତ୍ରୀଙ୍କ ଅପିଲ୍ ପରେ, ଗୁଜରାଟର ଉପମୁଖ୍ୟମନ୍ତ୍ରୀ ତାଙ୍କର ଆମେରିକା ଯାତ୍ରା ବାତିଲ କରିଛନ୍ତି। ହର୍ଷ ସଂଘଭି ଚଳିତ ମାସ ଶେଷରେ ଆମେରିକାର ଫେଡେରେସନ ଅଫ୍ ଗୁଜୁରାଟୀ ଆସୋସିଏସନ ଦ୍ୱାରା ଆୟୋଜିତ ଦ୍ୱିତୀୟ ଗୁଜୁରାଟୀ ସମ୍ମିଳନୀରେ ଯୋଗଦେବାର କାର୍ଯ୍ୟକ୍ରମ ଥିଲା।
ବିଜେପି ଶାସିତ ରାଜ୍ୟର କିଛି ମୁଖ୍ୟମନ୍ତ୍ରୀ ମଧ୍ୟ ସେମାନଙ୍କ ଗାଡ଼ି କାଟଛାଣ୍ଟ କରିବାକୁ ନିର୍ଦ୍ଦେଶ ଦେଇଛନ୍ତି। ଉତ୍ତର ପ୍ରଦେଶ, ଦିଲ୍ଲୀ, ମଧ୍ୟପ୍ରଦେଶ ଏବଂ ରାଜସ୍ଥାନର ମୁଖ୍ୟମନ୍ତ୍ରୀମାନେ ନିର୍ଦ୍ଦେଶ ଜାରି କରିଛନ୍ତି। କେନ୍ଦ୍ରମନ୍ତ୍ରୀ ସି.ଆର. ପାଟିଲ ମଧ୍ୟ ଏସ୍କର୍ଟ ଯାନ ନ ନେବାକୁ ନିଷ୍ପତ୍ତି ନେଇଛନ୍ତି। ବାଧ୍ୟତାମୂଳକ ସୁରକ୍ଷା ମାନଦଣ୍ଡକୁ ପାଳନ କରି କନ୍ଭୟ ହ୍ରାସ ଏବଂ ଅଧିକ ବୈଦ୍ୟୁତିକ ଯାନ ପାଇଁ ପ୍ରୋତ୍ସାହନ ଉପରେ ନିର୍ଦ୍ଦେଶାବଳୀ କାର୍ଯ୍ୟକାରୀ କରାଯାଇଛି। ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତା ସରକାରୀ ଯାନବାହନ ସଂଖ୍ୟା ସୀମିତ କରିବାକୁ ନିଷ୍ପତ୍ତି ନେଇଛନ୍ତି। ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଏକ ପୋଷ୍ଟରେ ସେ କହିଛନ୍ତି ଯେ, ବର୍ତ୍ତମାନର ବିଶ୍ୱ ପରିସ୍ଥିତିକୁ ଦୃଷ୍ଟିରେ ରଖି, ପ୍ରଧାନମନ୍ତ୍ରୀ ଦେଶବାସୀଙ୍କୁ ପେଟ୍ରୋଲ ଏବଂ ଡିଜେଲ ସଞ୍ଚୟ ଏବଂ ଶକ୍ତି ସଞ୍ଚୟକୁ ଏକ ଜନ ଆନ୍ଦୋଳନ କରିବାକୁ ନିବେଦନ କରିଛନ୍ତି।
ସୌଜନ୍ୟ ସମ୍ବାଦ
