Supreme Court: ମାଲଦାରେ ମହିଳା ବିଚାରପତିଙ୍କୁ ଲୋକଙ୍କ ଭିଡ଼ ବନ୍ଧକ ରଖିବା ମାମଲା: ମମତାଙ୍କ ସରକାରଙ୍କୁ ସୁପ୍ରିମକୋର୍ଟଙ୍କ ଭର୍ତ୍ସନା

ନୂଆଦିଲ୍ଲୀ/କୋଲକାତା: ପଶ୍ଚିମବଙ୍ଗର ମାଲଦାରେ ଘଟିଥିବା ଘଟଣା ପାଇଁ ସୁପ୍ରିମକୋର୍ଟ ମମତା ବାନାର୍ଜୀ ସରକାରଙ୍କୁ କଡ଼ା ଭର୍ତ୍ସନା କରିଛନ୍ତି। ସେଠାରେ ନ୍ୟାୟିକ ଅଧିକାରୀମାନଙ୍କୁ ଲୋକଙ୍କ ଭିଡ଼ ଘେରି ରହିଥିଲେ। ସେମାନଙ୍କୁ ବନ୍ଧକ ରଖାଯାଇଥିଲା। ମୁଖ୍ୟ ବିଚାରପତି ସୂର୍ଯ୍ୟ କାନ୍ତଙ୍କ ଅଧ୍ୟକ୍ଷତାରେ ଗଠିତ ଖଣ୍ଡପୀଠ କହିଛନ୍ତି ଯେ, ଏହା କେବଳ ନ୍ୟାୟିକ ଅଧିକାରୀମାନଙ୍କୁ ଭୟଭୀତ କରିବାର ପ୍ରୟାସ ନୁହେଁ, ବରଂ କୋର୍ଟର କର୍ତ୍ତୃତ୍ୱକୁ ମଧ୍ୟ ଚ୍ୟାଲେଞ୍ଜ କରିଛି।

ପଶ୍ଚିମବଙ୍ଗ ବିଧାନସଭା ନିର୍ବାଚନ ମଧ୍ୟରେ ବୁଧବାର ରାତିରେ ମାଲଦା ଜିଲ୍ଲାରେ ଏକ ହିଂସାତ୍ମକ ପରିସ୍ଥିତି ସୃଷ୍ଟି ହୋଇଥିଲା। ଭୋଟର ତାଲିକାରୁ ନାମ ବାଦ୍ ଦିଆଯିବା ପ୍ରସଙ୍ଗରେ ଉତ୍ତେଜିତ ଏକ ଭିଡ଼ ଏସ୍‌ଆଇଆର୍‌ ପ୍ରକ୍ରିୟା ଅଧୀନରେ କାର୍ଯ୍ୟ କରୁଥିବା ସାତ ଜଣ ନ୍ୟାୟିକ ଅଧିକାରୀଙ୍କୁ କିଛି ଘଣ୍ଟା ଧରି ଘେରି ରହିଥିଲେ। କାଲିଚକ-୨ ବ୍ଲକ ଉନ୍ନୟନ ଅଧିକାରୀଙ୍କ କାର୍ଯ୍ୟାଳୟ ବାହାରେ ଶହ ଶହ ଲୋକ ପ୍ରତିବାଦ କରିଥିଲେ।

ଏହି ନ୍ୟାୟିକ ଅଧିକାରୀମାନଙ୍କ ମଧ୍ୟରେ ଚାରି ଜଣ ମହିଳା ଥିଲେ। ସେମାନେ ଭୋଟରଙ୍କ କାଗଜପତ୍ର ଯାଞ୍ଚ କରୁଥିଲେ। ନିର୍ବାଚନ କମିସନ ଏହି ଘଟଣା ବିଷୟରେ କଲିକତା ହାଇକୋର୍ଟର ମୁଖ୍ୟ ବିଚାରପତିଙ୍କୁ ରିପୋର୍ଟ କରିଥିଲେ,ସେ ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ ଯାଞ୍ଚ ପ୍ରକ୍ରିୟା ତଦାରଖ କରୁଛନ୍ତି ।

ନ୍ୟାୟିକ ଅଧିକାରୀମାନଙ୍କୁ ଲୋକଙ୍କ ଭିଡ଼ ଘେରି ରହିଥିଲେ

ଏନେଇ ସୁପ୍ରିମକୋର୍ଟଙ୍କ କଠୋର ଆଭିମୁଖ୍ୟ ଗ୍ରହଣ କରିଛନ୍ତି। ମୁଖ୍ୟ ବିଚାରପତି ସୂର୍ଯ୍ୟକାନ୍ତ କହିଛନ୍ତି ଯେ ଏହି ଘଟଣା କେବଳ ଭୟଭୀତ କରିବା ପାଇଁ ଏକ ପ୍ରୟାସ ନୁହେଁ, ବରଂ ଏକ ଯୋଜନାବଦ୍ଧ ଏବଂ ପ୍ରେରିତ ପଦକ୍ଷେପ। ସେ କହିଛନ୍ତି ଯେ ଏହା ନ୍ୟାୟିକ ଅଧିକାରୀମାନଙ୍କୁ ନୈତିକ ମନୋବଳ ଭାଙ୍ଗିବା ଏବଂ ଅନ୍ୟାନ୍ୟ ମାମଲାର କାର୍ଯ୍ୟଧାରା ବନ୍ଦ କରିବା ପାଇଁ ଉଦ୍ଦିଷ୍ଟ ଥିଲା। ସିଜେଆଇ ଏହା ମଧ୍ୟ କହିଛନ୍ତି, ମତେ ଶେଷରେ ମଧ୍ୟରାତ୍ରିରେ ନିର୍ଦ୍ଦେଶ ଜାରି କରିବାକୁ ପଡିଲା, ଯାହା ଅତ୍ୟନ୍ତ ଦୁର୍ଭାଗ୍ୟଜନକ।

ସିଜେଆଇ ସ୍ପଷ୍ଟ କରିଛନ୍ତି, କାହାକୁ ହସ୍ତକ୍ଷେପ କରିବାକୁ ଅନୁମତି ଦିଆଯିବ ନାହିଁ, ଏବଂ ଆଇନକୁ ନିଜ ହାତରେ ନେବା ଏବଂ ନ୍ୟାୟିକ ଅଧିକାରୀମାନଙ୍କ ଉପରେ ମାନସିକ ଚାପ ପ୍ରୟୋଗ କରିବା ଏକ ଅପରାଧ। ଏହା ପଶ୍ଚିମବଙ୍ଗ ସରକାରଙ୍କ କର୍ତ୍ତବ୍ୟରେ ଅବହେଳା । ସମ୍ପୃକ୍ତ କର୍ତ୍ତୃପକ୍ଷଙ୍କୁ ଜଣାଇବା ସତ୍ତ୍ୱେ ନ୍ୟାୟିକ ଅଧିକାରୀମାନଙ୍କୁ ସୁରକ୍ଷିତ ସ୍ଥାନାନ୍ତର କାହିଁକି ସୁନିଶ୍ଚିତ କରାଯାଇ ନଥିଲା ତାହାର ସ୍ପଷ୍ଟୀକରଣ ସରକାରଙ୍କୁ ଦେବାକୁ ପଡ଼ିବ ବୋଲି କୋର୍ଟ କହିଛନ୍ତି।

ସୌଜନ୍ୟ ସମ୍ବାଦ