Trump: ପ୍ରଧାନମନ୍ତ୍ରୀ ମୋଦୀ ଓ ମୁଁ ଯାହା ଚାହୁଁ ତାହା କରୁ: ଟ୍ରମ୍ପ

ୱାସିଂଟନ: ପ୍ରାୟ ମାସେ ଧରି ଚାଲିଥିବା ମଧ୍ୟପ୍ରାଚ୍ୟ ଯୁଦ୍ଧ ଏବଂ ଇସଲାମିକ୍ ରିପବ୍ଲିକ୍ ଉପରେ ଆମେରିକାର ସ୍ଥଳ ଆକ୍ରମଣର ଆଶଙ୍କା ମଧ୍ୟରେ ଶୁକ୍ରବାର ଭାରତରେ ଥିବା ଆମେରିକା ଦୂତାବାସ ଦ୍ୱାରା ପୋଷ୍ଟ କରାଯାଇଥିବା ଏକ ବାର୍ତ୍ତାରେ ଟ୍ରମ୍ପ କହିଛନ୍ତି ଯେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ମୁଁ ଦୁଇଜଣ ବ୍ୟକ୍ତି ଯେଉଁମାନେ ଯାହା ନିଷ୍ପତ୍ତି ନିଅନ୍ତି, ତାହା କରି ଦେଖାନ୍ତି। ଟ୍ରମ୍ପ ତାଙ୍କ ବାର୍ତ୍ତାରେ ଭାରତ ସହ ଏକ ଦୃଢ ସମ୍ପର୍କ ପାଇଁ ଆହ୍ବାନ ଦେଇ କହିଛନ୍ତି ଯେ, ଏପରି କିଛି ଅଛି ଯାହା ଅଧିକାଂଶଙ୍କ ପାଇଁ କୁହାଯାଇପାରିବ ନାହିଁ। ଭାରତ ସହ ଆମର ସମ୍ପର୍କ ଆଗକୁ ଆହୁରି ମଜଭୁତ ହେବ ବୋଲି ଟ୍ରମ୍ପ କହିଛନ୍ତି।

ମଙ୍ଗଳବାର ପ୍ରଧାନମନ୍ତ୍ରୀ ମୋଦୀଙ୍କ ସହ ଫୋନ୍ କଲ୍ ପରେ ଟ୍ରମ୍ପ ଏହି ମନ୍ତବ୍ୟ ଦେଇଛନ୍ତି, ଯେଉଁଥିରେ ସେମାନେ ମଧ୍ୟପ୍ରାଚ୍ୟରେ ବଢୁଥିବା ପରିସ୍ଥିତି ଓ ଏହି ଅଞ୍ଚଳରେ ସ୍ଥିରତାର ଆବଶ୍ୟକତା ଉପରେ ଆଲୋଚନା କରିଥିଲେ। ଫେବ୍ରୁଆରି ୨୮ରେ ଆମେରିକା ଓ ଇସ୍ରାଏଲ ଇରାନ ଉପରେ ମିଳିତ ଆକ୍ରମଣ ଆରମ୍ଭ କରିବା ପରେ ଦୁଇ ନେତାଙ୍କ ମଧ୍ୟରେ ଏହା ପ୍ରଥମ କଲ୍ ଥିଲା। ପ୍ରଧାନମନ୍ତ୍ରୀ ମୋଦୀ ଭାରତର ଆଭିମୁଖ୍ୟକୁ ଦୋହରାଇବା ସହ ଉତ୍ତେଜନା ହ୍ରାସ କରିବା ଏବଂ ବିଶ୍ୱ ବାଣିଜ୍ୟ ପାଇଁ ହର୍ମୁଜ ପ୍ରଣାଳୀକୁ ଖୋଲା, ସୁରକ୍ଷିତ ଓ ସୁଗମ ରଖିବାର ଆବଶ୍ୟକତା ଉପରେ ଗୁରୁତ୍ୱାରୋପ କରିଥିଲେ। ଉଭୟ ନେତା ନିବିଡ଼ ଯୋଗାଯୋଗରେ ରହିବାକୁ ଏବଂ ଆଞ୍ଚଳିକ ଶାନ୍ତି, ସ୍ଥିରତା ଓ ପ୍ରମୁଖ ବିଶ୍ୱ ଜାହାଜ ଚଳାଚଳ ମାର୍ଗର ନିରାପତ୍ତା ସୁନିଶ୍ଚିତ କରିବା ପାଇଁ ଆଲୋଚନା ଜାରି ରଖିବାକୁ ସହମତ ହୋଇଥିଲେ।

ସୌଜନ୍ୟ ସମ୍ବାଦ