Trump threatens tariffs again: ପୁଣି ଶୁଳ୍କ ଧମକ ଦେଲେ ଟ୍ରମ୍ପ

ଗତବର୍ଷ ଅଗଷ୍ଟ ପରଠାରୁ ଭାରତ ଉପରେ ଆମେରିକାର ୫୦ ପ୍ରତିଶତ ଶୁଳ୍କ ବଜାୟ ରହିଛି। ବାଣିଜ୍ୟ ରାଜିନାମା ଜରିଆରେ ଶୁଳ୍କ କମ୍‌ କରିବାକୁ ଭାରତ ଉଦ୍ୟମ କରୁଛି। କିନ୍ତୁ ଭାରତର କୃ‌ଷିଜାତ ଓ ଦୁଗ୍ଧଜାତ ବଜାରରେ ପ୍ରବେଶ କରିବାକୁ ଆମେରିକା ଜିଦ୍‌ ଧରିଥିବାରୁ ଆଲୋଚନା ଆଗେଇ ପାରୁନାହିଁ। ଫଳରେ ଦୁଇ ଦେଶ ଏବେ ଦୁଇ ପ୍ରକାର ଅଲଗା ଅଲଗା ଆଲୋଚନା କରୁଛନ୍ତି। ଗୋଟିଏ ହେଉଛି ଦ୍ବିପାକ୍ଷିକ ବାଣିଜ୍ୟ ରାଜିନାମା ସମ୍ପର୍କିତ ଓ ଅନ୍ୟଟି ହେଉଛି ୫୦ ପ୍ରତିଶତ ଶୁଳ୍କକୁ ଯଥାଶୀଘ୍ର କମ୍‌ କରିବା। କୌଣସି ଆାଲୋଚନାରେ ଏପର୍ଯ୍ୟନ୍ତ ବୁଝାମଣାର ବାଟ ବାହାରିପାରିନାହିଁ। ଭାରତ ତରଫରୁ ମୁଲଚାଲ କରୁଥିବା ଅଧିକାରୀମାନେ କହିଛନ୍ତି ଯେ ରୁଷ ତେଲ ପାଇଁ ଲାଗିଥିବା ୨୫ ପ୍ରତିଶତ ଶୁଳ୍କ ନ ହଟିବା ପର୍ଯ୍ୟନ୍ତ ଆମେରିକା ସହ ରାଜିନାମା କରିବା କଷ୍ଟକର। ଗତ ନଅ ମାସ ଧରି ଉଭୟ ପକ୍ଷ ଆଲୋଚନା କରୁଥିଲେ ମଧ୍ୟ ତାହାର କୌଣସି ସୁଫଳ ମିଳୁନାହିଁ। ଉଭୟ ଦେଶର ପ୍ରତିନିଧି ୧୨ରୁ ଅଧିକ ଥର ଆଲୋଚନା କରିସାରିଲେଣି। ଆମେରିକାର ସିନେଟର ଲିଣ୍ଡ୍‌ସେ ଗ୍ରାହମ୍‌ କହିଛନ୍ତି ଯେ ଆମେରିକା ଶୁଳ୍କ ଲଗାଇବା ପରେ ରୁଷ୍‌ଠାରୁ ଭାରତ ତେଲ କିଣା ଯଥେଷ୍ଟ କମ୍‌ କରିଛି।

ସୌଜନ୍ୟ ସମ୍ବାଦ