War Update: ହରମୁଜ୍ ପ୍ରଣାଳୀ ଅବରୋଧ: ଇରାନକୁ କଡ଼ା ଚେତାବନୀ ଦେଲେ ୟୁରୋପୀୟ ଦେଶ ଓ ଜାପାନ…

ଲଣ୍ଡନ/ଟୋକିଓ, ୨୦/୩: ପଶ୍ଚିମ ଏସିଆରେ ଜାରି ରହିଥିବା ଯୁଦ୍ଧ ଯୋଗୁଁ ଗୁରୁତ୍ୱପୂର୍ଣ୍ଣ ହରମୁଜ୍ ପ୍ରଣାଳୀ ଅବରୋଧ ହୋଇ ରହିଥିବା ବେଳେ ବ୍ରିଟେନ, ଫ୍ରାନ୍ସ, ଜର୍ମାନୀ, ଇଟାଲୀ, ନେଦରଲ୍ୟାଣ୍ଡ ଓ ଜାପାନ ଭଳି ପ୍ରମୁଖ ବିଶ୍ୱ ଶକ୍ତିମାନେ ଏକ ମିଳିତ ବିବୃତ୍ତି ଜାରି କରି ଇରାନର ଆକ୍ରମଣାତ୍ମକ କାର୍ଯ୍ୟକଳାପକୁ କଡ଼ା ନିନ୍ଦା କରିବା ସହ ସାମୁଦ୍ରିକ ପରିବହନ ପାଇଁ ଏକ ସୁରକ୍ଷିତ ପଥ ପ୍ରସ୍ତୁତ କରିବାକୁ ସହମତି ପ୍ରକାଶ କରିଛନ୍ତି। ବ୍ରିଟେନ ପ୍ରଧାନମନ୍ତ୍ରୀ କୀର ଷ୍ଟାରମରଙ୍କ କାର୍ଯ୍ୟାଳୟ ପକ୍ଷରୁ ପ୍ରକାଶିତ ଏହି ବିବୃତ୍ତିରେ ଇରାନକୁ ତୁରନ୍ତ ଡ୍ରୋନ, କ୍ଷେପଣାସ୍ତ୍ର ଆକ୍ରମଣ ଏବଂ ସମୁଦ୍ରରେ ଲ୍ୟାଣ୍ଡମାଇନ ବିଛାଇବା ଭଳି କାର୍ଯ୍ୟରୁ ନିବୃତ୍ତ ରହିବାକୁ ଆହ୍ୱାନ ଦିଆଯାଇଛି, କାରଣ ଗତ ତିନି ସପ୍ତାହର ସଂଘର୍ଷ ମଧ୍ୟରେ ୧୦ଟି ଟ୍ୟାଙ୍କର ସମେତ ପ୍ରାୟ ୨୩ଟି ବାଣିଜ୍ୟିକ ଜାହାଜ ଆକ୍ରମଣର ଶିକାର ହୋଇଛନ୍ତି ଯାହା ବିଶ୍ୱ ଶାନ୍ତି ଓ ଶକ୍ତି ଯୋଗାଣ ଶୃଙ୍ଖଳ ପ୍ରତି ଏକ ଗୁରୁତର ବିପଦ ସୃଷ୍ଟି କରିଛି।

ଯୁଦ୍ଧ‌ ରୋକିବା ପାଇଁ ବିଚାରମିମର୍ଶ ଲାଗିରହିଛି

ଆମେରିକା-ଇସ୍ରାଏଲ ଆକ୍ରମଣର ଜବାବରେ ଇରାନର ଏହି ପ୍ରତିଶୋଧମୂଳକ ପଦକ୍ଷେପ ଯୋଗୁଁ ତେଲ ଓ ଗ୍ୟାସ ମୂଲ୍ୟରେ ଅହେତୁକ ବୃଦ୍ଧି ଘଟିଥିବା ବେଳେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ ନାଟୋ ଓ ଅନ୍ୟ ସହଯୋଗୀ ଦେଶଗୁଡ଼ିକୁ ଏହି ପ୍ରଣାଳୀ ପୁନଃ ଖୋଲିବାରେ ସାହାଯ୍ୟ ପାଇଁ ଅନୁରୋଧ କରିଛନ୍ତି। ଯଦିଓ କିଛି ଦେଶ ଏହି ଆବେଦନକୁ ପ୍ରାରମ୍ଭିକ ଭାବେ ପ୍ରତ୍ୟାଖ୍ୟାନ କରିଛନ୍ତି, ତଥାପି ଆନ୍ତର୍ଜାତୀୟ ନୌଚାଳନା ସ୍ୱାଧୀନତା ରକ୍ଷା କରିବା ଏବଂ ଶକ୍ତି ବଜାରକୁ ସ୍ଥିର କରିବା ପାଇଁ ବର୍ତ୍ତମାନ ବ୍ୟାପକ ଆଲୋଚନା ଓ ଯୋଜନା ଜାରି ରହିଛି।

ସୌଜନ୍ୟ ସମ୍ବାଦ