ୱାସିଂଟନ: ଇରାନ ସହିତ ପ୍ରସ୍ତାବିତ ଚୁକ୍ତିନାମା ସମ୍ପର୍କରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ସିଚୁଏସନ୍ ରୁମରେ ଏକ ଗୁରୁତ୍ୱପୂର୍ଣ୍ଣ ବୈଠକ କୌଣସି ନିଷ୍ପତ୍ତିରେ ପହଞ୍ଚିପାରି ନାହିଁ। ଦୁଇ ଘଣ୍ଟାର ବୈଠକ ପରେ, ଆମେରିକା ରାଷ୍ଟ୍ରପତି ଟ୍ରମ୍ପ ଚୁକ୍ତିନାମାକୁ ଅନୁମୋଦନ କରି ନାହାନ୍ତି। ବୈଠକ ପରେ ଜାରି ଏକ ବିବୃତିରେ, ହ୍ୱାଇଟ୍ ହାଉସର ଜଣେ ଅଧିକାରୀ କହିଛନ୍ତି , ଯେକୌଣସି ଚୁକ୍ତିନାମାରେ ଆମେରିକା ରାଷ୍ଟ୍ରପତିଙ୍କ ସର୍ତ୍ତ ପୂରଣ କରିବାକୁ ପଡିବ। ବୈଠକ ପରେ ଜାରି ହୋଇଥିବା ଏକ ବିବୃତିରେ, ହ୍ୱାଇଟ୍ ହାଉସ୍ ର ଜଣେ ଅଧିକାରୀ କହିଛନ୍ତି, ରାଷ୍ଟ୍ରପତି ଟ୍ରମ୍ପ କେବଳ ଏପରି ଏକ ଚୁକ୍ତିକୁ ଅନୁସରଣ କରିବେ ଯାହା ଆମେରିକା ପାଇଁ ଭଲ ହେବ ଏବଂ ତାଙ୍କର ରେଡଲାଇନ୍ ପୂରଣ କରିବ। ଇରାନ କେବେ ବି ପରମାଣୁ ଅସ୍ତ୍ର ରଖିପାରିବ ନାହିଁ।। ଅଧିକାରୀ କହିଛନ୍ତି, ବୈଠକ ପ୍ରାୟ ଦୁଇ ଘଣ୍ଟା ଧରି ଚାଲିଥିଲା ତେବେ କୌଣସି ଠୋସ୍ ନିଷ୍ପତ୍ତି ମିଳିପାରି ନଥିଲା।
କୌଣସି ରେଡଲାଇନ୍ ଅବା ଆପୋଷ ବୁଝାମଣା ହୋଇନାହିଁ
ପୂର୍ବରୁ ଟ୍ରମ୍ପ ପ୍ରଥମେ ବୈଠକ ଘୋଷଣା କରିବା ସମୟରେ କହିଥିଲେ, ବୈଠକର ଉଦ୍ଦେଶ୍ୟ ଇରାନ ସହିତ ଚୁକ୍ତିକୁ ଚୂଡ଼ାନ୍ତ କରିବା। ଅନେକ ସର୍ତ୍ତ ଉଲ୍ଲେଖ କରିଥିଲେ ଯାହା ସେ ଆଶା କରିଥିଲେ ଯେ ଇରାନ ଯୁଦ୍ଧ ସମାପ୍ତ କରିବା ପାଇଁ ଏକ ସମ୍ଭାବ୍ୟ ଚୁକ୍ତିରେ ରାଜି ହେବ। ଟ୍ରମ୍ପ ସର୍ତ୍ତ ରଖିଥିଲେ ଯେ, ଇରାନକୁ କେବେ ବି ପରମାଣୁ ଅସ୍ତ୍ର କିମ୍ବା ବୋମା ବିକଶିତ ନକରିବା ପାଇଁ ପ୍ରତିଜ୍ଞାବଦ୍ଧ ହେବା ଉଚିତ। ହର୍ମୁଜ୍ ପ୍ରଣାଳୀକୁ ତୁରନ୍ତ ଖୋଲାଯିବା ଉଚିତ। ଇରାନ ବାକି ଥିବା ସମୁଦ୍ର ମାଇନକୁ ଚିହ୍ନଟ କରି ନଷ୍ଟ କରିବା ଆବଶ୍ୟକ।
ଟ୍ରମ୍ପଙ୍କ ଦାବିର ଓଲଟା ମନ୍ତବ୍ୟ ଦେଲା ତେହେରାନ
ଇରାନ କହିଛି, ଆଲୋଚନା ଚାଲିଛି କିନ୍ତୁ ଏପର୍ଯ୍ୟନ୍ତ କୌଣସି ଚୂଡ଼ାନ୍ତ ଚୁକ୍ତି ହୋଇନାହିଁ। ଆମେ ବାହ୍ୟ ଚାପରେ କୌଣସି ପଦକ୍ଷେପ ନେବ ନାହିଁ। ଇରାନର ବୈଦେଶିକ ମନ୍ତ୍ରଣାଳୟର ମୁଖପାତ୍ର ଇସମାଇଲ ବାକେଇ ସରକାରୀ ଟିଭିକୁ କହିଛନ୍ତି, ତେହେରାନ ଜରୁରୀ କୁହାଯାଉଥିବା ବୋଲି ସ୍ଥିତିକୁ କେବେ ଗ୍ରହଣ କରିବ ନାହିଁ। ୪୭ ବର୍ଷ ପୂର୍ବରୁ ଦେଶ ଏଭଳି ସ୍ଥିତିକୁ ଗ୍ରହଣ ନକରିବା ଧାରା ଜାରି ରଖିଛି। ଆମେ ଇରାନର ସ୍ୱାର୍ଥ ଏବଂ ଅଧିକାର ଉପରେ ଆଧାର କରି ଆମର ନିଷ୍ପତ୍ତି ନେଇଥାଉ।
ପରମାଣୁ ପ୍ରସଙ୍ଗରେ ଆମେରିକା ଏବଂ ଇରାନ ମଧ୍ୟରେ କୌଣସି ଆଲୋଚନା ହୋଇଥିବା ଦାବିକୁ ବାକେଇ ପ୍ରତ୍ୟାଖ୍ୟାନ କରିଛନ୍ତି। ସେ କହିଛନ୍ତି, ଆମର ପରମାଣୁ ପ୍ରସଙ୍ଗରେ କୌଣସି ଆଲୋଚନା ହେଉନାହିଁ। ତାଙ୍କ ମନ୍ତବ୍ୟ ଟ୍ରମ୍ପଙ୍କ ବାରମ୍ବାର ଦାବିର ବିପରୀତ ରହିଛି। ଟ୍ରମ୍ପ ଦାବି କରୁଛନ୍ତି ଯେ, ତେହେରାନକୁ ଆମେରିକା ସ୍ପଷ୍ଟ ଭାବରେ କହିଛି ଯେ, ୟୁରାନିୟମ ସମୃଦ୍ଧି କାର୍ଯ୍ୟକ୍ରମ ଜାରି ରଖାଯାଇପାରିବ ନାହିଁ।
ସୌଜନ୍ୟ ସମ୍ବାଦ