ଭୁବନେଶ୍ୱର,୨ା୯ (ରବିନାରାୟଣ ଜେନା): ଓଡ଼ିଶାରେ ପରମାଣୁ ଶକ୍ତି ପ୍ରକଳ୍ପ ପାଇଁ ସରକାର ଓ ବୃହତ୍ ଶିଳ୍ପସଂସ୍ଥା ଜମି ଖୋଜୁଛନ୍ତି। ଏଥିପାଇଁ ଦୁଇଟି ସ୍ଥାନରେ ପ୍ରାଥମିକ ପର୍ଯ୍ୟାୟରେ ଜମି ଖୋଜାଚାଲିଛି। ଏନ୍ଟିପିସି ପକ୍ଷରୁ ଦେବଗଡ଼ ଓ ନବରଙ୍ଗପୁରରେ ପରମାଣୁ ଶକ୍ତି ପ୍ରକଳ୍ପ ଲାଗି ଅନୁଧ୍ୟାନ କରାଯାଉଛି ବୋଲି ଶକ୍ତି ବିଭାଗ ଅତିରିକ୍ତ ମୁଖ୍ୟ ଶାସନ ସଚିବ(ଏସିଏସ୍) ବିଶାଳ ଦେବ କହିଛନ୍ତି। ଲୋକସେବା ଭବନରେ ମଙ୍ଗଳବାର ଇଣ୍ଡିଆନ୍ ଗ୍ରୀନ୍ ବିଲ୍ଡିଂ କାଉନ୍ସିଲ(ଆଇଜିବିସି) ସାର୍ଟିଫିକେଶନ ଓ ମିଡିଆ ଇଣ୍ଟରଆକ୍ସନ ଅବସରରେ ଖବରଦାତାଙ୍କ ପ୍ରଶ୍ନର ଉତ୍ତରରେ ଏସିଏସ୍ ଦେବ କହିଛନ୍ତି, ପରମାଣୁ ଶକ୍ତି ପ୍ରକଳ୍ପ ପାଇଁ ପୂର୍ବରୁ ୪ଟି ସ୍ଥାନ ଚିହ୍ନଟ ହୋଇଥିଲା, ସେଥିରୁ ଦୁଇଟି ପ୍ରାଥମିକ ଅନୁଧ୍ୟାନ ବେଳେ ଉପଯୁକ୍ତ ନ ଥିବା ଜଣାପଡ଼ିଥିଲା। ଏନ୍ଟିପିସି ଓ ଏନ୍ପିସିଆଇଏଲ୍ ମିଳିତ ଭାବେ ଓଡ଼ିଶାରେ ୩,୨୦୦ ମେଗାୱାଟ୍ର ପରମାଣୁ ଶକ୍ତି ପ୍ରକଳ୍ପ ପାଇଁ ପ୍ରସ୍ତାବ ରଖିଛନ୍ତି। ତେବେ ପରମାଣୁ ପ୍ରକଳ୍ପରେ ସୁରକ୍ଷା ଓ ପରିବେଶ ସୁରକ୍ଷା ସହ କୌଣସି ସାଲିସ୍ କରାଯିବ ନାହିଁ। ରାଜ୍ୟର ବଢ଼ୁଥିବା ବିଦ୍ୟୁତ୍ ଚାହିଦାକୁ ପୂରଣ କରିବା ପାଇଁ ସ୍ବଚ୍ଛ ଶକ୍ତିର ବିଭିନ୍ନ ବିକଳ୍ପ ଉପରେ ସରକାର ଗୁରୁତ୍ୱ ଦେଉଛନ୍ତି। ଏହି କ୍ରମରେ ସରକାରଙ୍କୁ ମିଳିଥିବା ପ୍ରସ୍ତାବକୁ ନେଇ ଅନୁଧ୍ୟାନ କରାଯାଉଛି ବୋଲି ଏସିଏସ୍ କହିଛନ୍ତି।
ସେ ଆହୁରି କହିଛନ୍ତି, ରାଜ୍ୟରେ ବଢ଼ୁଥିବା ବିଦ୍ୟୁତ୍ ଚାହିଦାକୁ ଦୃଷ୍ଟିରେ ରଖି ସ୍ବଚ୍ଛ ଓ ଦୀର୍ଘମିଆଦୀ ଶକ୍ତି ଉତ୍ସ ଉପରେ ସରକାର ଗୁରୁତ୍ୱ ଦେଉଛନ୍ତି। ପରମାଣୁ ଶକ୍ତି ଏ ଦିଗରେ ଏକ ବିକଳ୍ପ ହୋଇପାରେ। ତେବେ ଜନସାଧାରଣଙ୍କ ସୁରକ୍ଷା ସହ ପରିବେଶ ସୁରକ୍ଷା କ୍ଷେତ୍ରରେ କୌଣସି ସାଲିସ୍ କରାଯିବନାହିଁ। ପ୍ରକଳ୍ପ ଆଗକୁ ବଢ଼ିଲେ ସମସ୍ତ ଆବଶ୍ୟକ ସୁରକ୍ଷା ମାନଦଣ୍ଡ ଓ ନିୟମାବଳୀ ପାଳନ କରାଯିବ।
ଗୋଟିଏପଟେ ଓଡ଼ିଶା ବିଦ୍ୟୁତ୍ ଉତ୍ପାଦନରେ ଏକ ଅଗ୍ରଣୀ ରାଜ୍ୟ ଭାବେ ସାରାଦେଶରେ ପରିଗଣିତ ହେଉଛି। ଓଡ଼ିଶା ବିଦ୍ୟୁତ୍ ଉପରେ ବିହାର ଓ କେରଳ ନିର୍ଭର କରୁଛନ୍ତି। ଏହି ପରିପ୍ରେକ୍ଷୀରେ ଦୀର୍ଘମିଆଦୀ ଶକ୍ତିର ଆବଶ୍ୟକତା ପୂରଣ ଓ ସ୍ବଚ୍ଛ ଶକ୍ତିର ବ୍ୟବହାର ବଢ଼ାଇବା ଦିଗରେ ପରମାଣୁ ଶକ୍ତି ପ୍ରକଳ୍ପ ଉପରେ ସରକାରଙ୍କ ଗୁରୁତ୍ୱକୁ ନେଇ ରାଜନୈତିକ ମହଲରେ ଏବେ କମ୍ପନ ସୃଷ୍ଟି ହୋଇଛି।
ସୌଜନ୍ୟ ସମାଜ
