ଭୁବନେଶ୍ୱର,୨୦ା୨: ଦେଶର ଅର୍ଥନୀତିର ଚକକୁ ଗତିଶୀଳ କରିବାରେ ଓଡ଼ିଶାର ଖଣି ସମ୍ପଦ ସବୁଠାରୁ ବଡ଼ ଭୂମିକା ଗ୍ରହଣ କରିଛି। ଦେଶର ମୋଟ ଖଣିଜ ଉତ୍ପାଦନରେ ଓଡ଼ିଶାର ଅବଦାନ ଏବେ ୪୩.୭ ପ୍ରତିଶତରେ ପହଞ୍ଚିଛି। ଗତ କିଛି ବର୍ଷ ମଧ୍ୟରେ ରାଜ୍ୟର ଖଣିଜ ରାଜସ୍ୱ ଏବଂ ରପ୍ତାନି କ୍ଷେତ୍ରରେ ଏକ ବୈପ୍ଳବିକ ପରିବର୍ତ୍ତନ ଦେଖିବାକୁ ମିଳିଛି।
୨୦୨୦-୨୧ ଆର୍ଥିକ ବର୍ଷରେ ରାଜ୍ୟରେ ଉତ୍ତୋଳିତ ଖଣିଜ ପଦାର୍ଥର ମୂଲ୍ୟ ୩୦,୦୪୪ କୋଟି ଟଙ୍କା ଥିବାବେଳେ, ୨୦୨୪-୨୫ରେ ଏହା ୬୪,୭୮୫ କୋଟି ଟଙ୍କାକୁ ବୃଦ୍ଧି ପାଇଛି। ଏହା ଓଡ଼ିଶାର ଅର୍ଥନୈତିକ ସମୃଦ୍ଧିର ଏକ ସ୍ପଷ୍ଟ ଚିତ୍ର ପ୍ରଦାନ କରୁଛି।
ରାଜ୍ୟର ମୋଟ ଅଣ-ଟିକସ ରାଜସ୍ୱକୁ ଖଣି କ୍ଷେତ୍ରର ଅବଦାନ ଏକ ବିଶାଳ ୮୦ ପ୍ରତିଶତ ରହିଛି। ସେହିପରି ରାଜ୍ୟ ଜିଭିଏ (GVA) କୁ ଖଣି କ୍ଷେତ୍ର ୯.୫ ପ୍ରତିଶତ ଏବଂ ଶିଳ୍ପ ଜିଭିଏକୁ ପ୍ରାୟ ୨୩.୧ ପ୍ରତିଶତ ଯୋଗଦାନ ଦେଉଛି।
ସେହିପରି ୨୦୨୪-୨୫ରେ ଓଡ଼ିଶାରୁ ମୋଟ ୮୫,୫୦୦ କୋଟି ଟଙ୍କାର ସାମଗ୍ରୀ ରପ୍ତାନି କରାଯାଇଛି। ୨୦୧୯-୨୦ ପରଠାରୁ ରପ୍ତାନି ହାର ବାର୍ଷିକ ୧୨.୬ ପ୍ରତିଶତ ହାରରେ ବଢ଼ୁଥିବା ବେଳେ ଏଥିରେ ଧାତବ ଓ ଖଣିଜ ପଦାର୍ଥର ଅବଦାନ ପ୍ରାୟ ୮୫ ପ୍ରତିଶତ ରହିଛି।
ସୌଜନ୍ୟ ଧରିତ୍ରୀ
