ପୂଜା ପାଇଁ ଆସିଲେ କେନ୍ଦ୍ରୀୟ ଅର୍ଦ୍ଧ ସାମରିକ ବାହିନୀ, କଟକର ବିଭିନ୍ନ ପୂଜା ମଣ୍ଡପରେ ହେବେ ମୁତୟନ
କଟକ,୧୫/୧୦: ଦଶହରାରେ ଆଇନ୍ ଶୃଙ୍ଖଳା ନିୟନ୍ତ୍ରଣ, ଟ୍ରାଫିକ୍ ପରିଚାଳନା ଓ ସୁରକ୍ଷା ଆଦି ଦୃଷ୍ଟିରୁ ପୂର୍ବବର୍ଷ ତୁଳନାରେ ଏ ବର୍ଷ ଅଧିକ ଫୋର୍ସ ମୁତୟନ ହେବେ । ସହରର ବିଭିନ୍ନ ସମ୍ବେଦନଶୀଳ ଅଞ୍ଚଳରେ ମୁତୟନ ଲାଗି କେନ୍ଦ୍ରୀୟ ଅର୍ଦ୍ଧ ସାମରିକ ବାହିନୀ ବୁଧବାର ଅପରାହ୍ନରେ କଟକରେ ପହଞ୍ଚିଛନ୍ତି । ସିଆର୍ପିଏଫ୍ର ର୍ୟାପିଡ୍ ଆକ୍ସନ ଫୋର୍ସ ଗୋଟେ କମ୍ପାନୀ ଯଥା ଶହେରୁ ଅଧିକ ବନ୍ଧୁକଧାରୀ ପୁଲିସ ସହରର ବିଭିନ୍ନ ସମ୍ବେଦନଶୀଳ ଅଞ୍ଚଳରେ ମୁତୟନ ରହିବେ । ପୂଜାଠାରୁ ଭସାଣି ଶେଷ ହେବା ଯାଏ ଅର୍ଦ୍ଧସାମରିକ ବାହିନୀ କମିସନରେଟ୍ ପୁଲିସକୁ ଆଇନ ଶୃଙ୍ଖଳା ନିୟନ୍ତ୍ରଣରେ ସହଯୋଗ କରିବେ ।
ଅର୍ଦ୍ଧସାମରିକ ବାହିନୀର ଯବାନଙ୍କଠାରୁ ଆରମ୍ଭ କରି ଅଫିସରମାନେ ବିଜୁ ଭବନ ନିକଟସ୍ଥ କଟକ ମହାନଗର ନିଗମ କଲ୍ୟାଣ ମଣ୍ଡପରେ ଆଶ୍ରୟ ନେବା ପାଇଁ ବନ୍ଦୋବସ୍ତ କରାଯାଇଛି । ସିଆରପିଏଫ୍ର ରାପିଡ୍ ଆକ୍ସନ ଫୋର୍ସ ଦରଘାବଜାର, ହାତୀପୋଖରୀ, କେଶରପୁର, ବକ୍ସିବଜାର, ଯୋବ୍ରା, ହାଓଡା ମୋଟର ଛକ ଆଦି କେଉଁ ଅଞ୍ଚଳରେ କେତେ ମୁତୟନ ହେବେ ତାର ଏକ ତାଲିକା ପ୍ରସ୍ତୁତ ହୋଇଛି । ଅର୍ଦ୍ଧସାମରିକ ବାହିନୀ ସହ ଏଥର ଦଶହରାରେ ପ୍ରାୟ ୬୦ ପ୍ଲାଟୁନ୍ ଫୋର୍ସ ମୁତୟନ ହେବେ ବୋଲି ଶୁଣିବାକୁ ମିଳିଛି ।
ସୌଜନ୍ୟ ପ୍ରମେୟ
