Lifestyle inflation: ଅର୍ଥ ସୂତ୍ର: ଋଣଯନ୍ତାରେ ପକାଇପାରେ ‘ଜୀବନଶୈଳୀ ମୁଦ୍ରାସ୍ଫୀତି’

ଧରାଯାଉ ଚାକିରିରୁ ମାସିକ ୫୦ ହଜାର ଟଙ୍କା ଦରମା ପାଉଥିବା ବ୍ୟକ୍ତିଟିର ଦରମା ୧୦ ହଜାର ଟଙ୍କା ବଢ଼ିଗଲା। ସେହି ସମୟରେ ବଜାରରେ କୌଣସି ସାମଗ୍ରୀ ଦର ବଢ଼ି ନଥିଲେ ମଧ୍ୟ ସେହି ବ୍ୟକ୍ତିଙ୍କର ମାସିକ ବଜାର ଖର୍ଚ୍ଚ ବଢ଼ିଯାଏ। କାରଣ ଅଧିକ ଦରମାକୁ ଦେଖି ସେ ବିଳାସବ୍ୟସନ ପାଇଁ ଅଧିକ ଖର୍ଚ୍ଚ କରେ। ଘରକୁ ନୂଆ ନୂଆ ଦାମୀ ଉପକରଣ ଆଣେ। କିନ୍ତୁ ଟିକେ ସତର୍କ ନହେଲେ ଏଭଳି ସ୍ଥିତିରେ ବ୍ୟକ୍ତି ଜଣକ ଅଜାଣତରେ ଏକ ସ୍ଥିତିରେ ପହଞ୍ଚିଯାଏ, ଯେଉଁଠି ତା’ର ବର୍ଦ୍ଧିତ ଦରମା ସତ୍ତ୍ବେ ସେ ଆୟ ନିଅଣ୍ଟିଆ ସ୍ଥିତିରେ ରହେ। ତେଣୁ କ୍ରେଡିଟ୍‌ କାର୍ଡର ବ୍ୟବହାର ବୃଦ୍ଧି କରି ଏକ ଋଣଯନ୍ତାରେ ପଡ଼ିଯାଏ। ତେଣୁ ଜୀବନଶୈଳୀଜନିତ ଏଭଳି ସମସ୍ୟାରୁ ରକ୍ଷା ପାଇବା ପାଇଁ  ଆୟ ବୃଦ୍ଧି ସତ୍ତ୍ବେ ଆମକୁ ମିତବ୍ୟୟୀ ହେବାକୁ ପଡ଼ିବ। କ୍ରେଡିଟ୍‌ କାର୍ଡ ବ୍ୟବହାର କରୁଥିଲେ କେଉଁ ସ୍ତର ପର୍ଯ୍ୟନ୍ତ ତାହାର ବ୍ୟବହାର ଯୁକ୍ତିଯୁକ୍ତ ଏବଂ କେତେଦିନ ଭିତରେ ଟଙ୍କା ଶୁଝିବା ଜରୁରି, ସେଥିପ୍ରତି ଧ୍ୟାନ ଦେବାକୁ ହେବ। ଅନ୍ୟର ଚାଳିଚଳନରେ ପ୍ରଭାବିତ ନ ହୋଇ ନିଜର ଆବଶ୍ୟକତାକୁ ସୀମିତ ରଖିଲେ ଜଣେ ଜୀବନଶୈଳୀ ମୁଦ୍ରାସ୍ଫୀତିଜନିତ ଯନ୍ତାରେ ପଡ଼ିବ ନାହିଁ।

ସୌଜନ୍ୟ ସମ୍ବାଦ