ପୁରୀ,୧୨।୩( ଅଜିତ୍ କୁମାର ମହାନ୍ତି): ଶ୍ରୀମନ୍ଦିର ନୀଳଚକ୍ର ଉପରେ ବୁଧବାର ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଶ୍ରୀମନ୍ଦିର ନୀଳଚକ୍ର ସହ ସଂଯୋଗ ହୋଇ ରହୁଥିବା ମାଳମାଳ ମାନସିକ ବାନା ଛିଣ୍ଡିଯାଇଛି । ଯାହାକୁ ନେଇ ଅନେକ ଅସମାହିତ ପ୍ରଶ୍ନ ସୃଷ୍ଟି ହୋଇଥିବା ବେଳେ ଏହା ଶୁଭ ସଙ୍କେତ ନା ଅଶୁଭ ସଙ୍କେତକୁ ନେଇ ଚର୍ଚ୍ଚା ଆରମ୍ଭ ହୋଇଛି।
ସୂଚନା ମୁତାବକ,ବୁଧବାର ଚୁନରା ସେବକମାନଙ୍କ ଦ୍ବାରା ପ୍ରତିଦିନ ଭଳି ବାନା ପରିବର୍ତ୍ତନ ସମୟରେ ଭକ୍ତମାନଙ୍କ ଦ୍ବାରା ପ୍ରଦତ୍ତ ମାନସିକ ବାନା ନୀଳଚକ୍ରରୁ ଛିଣ୍ଡି ଯାଇଥିଵା ଦେଖିବାକୁ ମିଳିଛି। ପ୍ରେତ୍ୟକ ଦିନ ଭକ୍ତଙ୍କ ଦ୍ବାରା ପ୍ରଦାନ ହୋଇଥିବା ମାନସିକ ବାନାକୁ ଚୁନରା ସେବକମାନେ ନୀଳଚକ୍ରରେ ବାନ୍ଧୁଥିବା ବେଳେ ଏହା ସମ୍ପୂର୍ଣ୍ଣ ଛିଡି ପଡିଥିବା ଦେଖିବାକୁ ମିଳିଥିଲା। ପରେ ଏହି ମାଳମାଳ ମାନସିକ ବାନାକୁ ପୁନଃ ନୀଳଚକ୍ର ସହ ସଂଯୋଗ କରାଯାଇଥିଲା। ଅନ୍ୟପକ୍ଷରେ ଚଳିତ ମାସ ୫ ତାରିଖରେ ନୀଳଚକ୍ରରେ ଲାଗିଥିବା ପତିତପାବନ ବାନା ଉପରେ ଦୀର୍ଘ ସମୟ ଧରି ଚିଲ ବସି ଉଡିଥିବା ବେଳେ ବୁଧବାର ଏଭଳି ଘଟଣା ଘଟିବା ସମସ୍ତଙ୍କ ମନରେ ଅନେକ ପ୍ରଶ୍ନବାଚୀ ସୃଷ୍ଟି କରିଛି।
କିଛି ସେବାୟତ ଏହାକୁ ମହାପ୍ରଭୁଙ୍କ ବଡ଼ ସଂକେତ ବୋଲି କହିଛନ୍ତି। ମାନସିକ ବାନା ଛିଡ଼ିବା ପ୍ରସଙ୍ଗ ଉପରେ ଦେଶରେ ବିପର୍ଯ୍ୟୟ ଘଟିବ ବୋଲି ଲୋକେ ଆଶଙ୍କା ପ୍ରକାଶ କରିଛନ୍ତି । ଭୂମ୍ପିକମ୍ପ, ଭୂସ୍କଳନ, ବନ୍ୟା, ବାତ୍ୟା ଭଳି ପ୍ରାକୃତିକ ବିପର୍ଯ୍ୟୟ ସହ ଖାଦ୍ୟ ଅଭାବ, ଗୃହଯୁଦ୍ଧ ବୃଦ୍ଧି ପାଇଥାଏ ବୋଲି ସେବାୟତମାନେ କହିଛନ୍ତି । ତେବେ କେହି କେହି ଏହାକୁ ଅଶୁଭ ସଙ୍କେତ କହୁଥିବା ବେଳେ ମାତ୍ରାଧିକ ପବନର ବେଗ ଯୋଗୁଁ ଏହା ଛିଡି ଯାଇଥିବା ଅନେକ କହୁଛନ୍ତି।
ସୌଜନ୍ୟ ଧରିତ୍ରୀ
