World Happiness Report: ସୋସିଆଲ ମିଡିଆ ଯୋଗୁଁ ଖୁସି ହରାଉଛନ୍ତି ଯୁବପିଢ଼ି: ଲଗାତାର ନବମ ଥର ଶୀର୍ଷରେ ଫିନଲ୍ୟାଣ୍ଡ

ନୂଆଦିଲ୍ଲୀ: ଅତ୍ୟଧିକ ସୋସିଆଲ ମିଡିଆ ବ୍ୟବହାର କାରଣରୁ ପାଶ୍ଚାତ୍ୟ ଦେଶଗୁଡ଼ିକରେ ଯୁବପିଢ଼ିଙ୍କ ଖୁସି ଏବଂ ମାନସିକ ସ୍ୱାସ୍ଥ୍ୟ ଦ୍ରୁତ ଗତିରେ ହ୍ରାସ ପାଉଛି। ଜାତିସଂଘ ସମର୍ଥିତ ‘ୱାର୍ଲ୍ଡ ହାପିନେସ୍ ରିପୋର୍ଟ’ର ସଦ୍ୟତମ ସଂସ୍କରଣରେ ଏହି ଚିନ୍ତାଜନକ ତଥ୍ୟ ସାମ୍ନାକୁ ଆସିଛି। ରିପୋର୍ଟ ଅନୁଯାୟୀ, ଆମେରିକା, କାନାଡା ଏବଂ ଅଷ୍ଟ୍ରେଲିଆ ଭଳି ଦେଶଗୁଡ଼ିକରେ ସୋସିଆଲ ମିଡିଆର ପ୍ରଭାବ ଯୁବକଯୁବତୀଙ୍କୁ ଦୁଃଖୀ କରୁଛି।

ପାଶ୍ଚାତ୍ୟ ଦେଶଗୁଡ଼ିକରେ ଚିନ୍ତାଜନକ ସ୍ଥିତି

•  ଗତ ଦୁଇ ଦଶନ୍ଧି ମଧ୍ୟରେ ଆମେରିକା, କାନାଡା, ଅଷ୍ଟ୍ରେଲିଆ ଏବଂ ନ୍ୟୁଜିଲ୍ୟାଣ୍ଡ ସମେତ ମୋଟ ୧୫ଟି ପାଶ୍ଚାତ୍ୟ ଦେଶରେ ଯୁବପିଢ଼ିଙ୍କ ସୁଖ ଓ ସମୃଦ୍ଧିରେ ବଡ଼ ଧରଣର ହ୍ରାସ ଦେଖିବାକୁ ମିଳିଛି।
•  ଅକ୍ସଫୋର୍ଡ ୟୁନିଭରସିଟିର ୱେଲବିଇଙ୍ଗ୍ ରିସର୍ଚ୍ଚ ସେଣ୍ଟର, ଗ୍ୟାଲପ୍ (Gallup) ଏବଂ ଜାତିସଂଘର ମିଳିତ ସହଯୋଗରେ ପ୍ରକାଶିତ ଏହି ରିପୋର୍ଟରେ ଗବେଷକମାନେ ସ୍ପଷ୍ଟ କରିଛନ୍ତି ଯେ ଏହି ହ୍ରାସ ପଛରେ ଅତ୍ୟଧିକ ସୋସିଆଲ ମିଡିଆ ବ୍ୟବହାର ଏକ ମୁଖ୍ୟ କାରଣ। ଏହି ଗବେଷଣାରେ ଜୋନାଥନ୍ ହାଇଡ୍‌ଟଙ୍କ ରିସର୍ଚ୍ଚ ଏବଂ PISAର ତଥ୍ୟକୁ ଆଧାର କରାଯାଇଛି।

ବିଶ୍ୱର ଅନ୍ୟ ପ୍ରାନ୍ତରେ ଚିତ୍ର ଅଲଗା

•  ତେବେ ଏହା ଏକ ବିଶ୍ୱବ୍ୟାପୀ ଟ୍ରେଣ୍ଡ୍ ନୁହେଁ। ରିପୋର୍ଟ ଅନୁଯାୟୀ, ବିଶ୍ୱର ଅନ୍ୟାନ୍ୟ ଅଞ୍ଚଳରେ ପିଲାମାନେ ପୂର୍ବ ଅପେକ୍ଷା ନିଜ ଜୀବନକୁ ନେଇ ଅଧିକ ସନ୍ତୁଷ୍ଟ ଅଛନ୍ତି।
•  ପାଶ୍ଚାତ୍ୟ ଏବଂ ଇଂରାଜୀ ଭାଷାଭାଷୀ ଦେଶଗୁଡ଼ିକୁ ଛାଡ଼ିଦେଲେ, ଅନ୍ୟ ଦେଶଗୁଡ଼ିକରେ ସୋସିଆଲ ମିଡିଆର ପ୍ରଭାବ ସକାରାତ୍ମକ ରହିଛି ଏବଂ ଏହା ପ୍ଲାଟଫର୍ମକୁ ନେଇ ଭିନ୍ନ ଭିନ୍ନ ହୋଇଥାଏ ବୋଲି ଗବେଷକମାନେ ପ୍ରକାଶ କରିଛନ୍ତି।

କେଉଁ ଦେଶ ସବୁଠୁ ଖୁସି, କିଏ ସବୁଠୁ ଦୁଃଖୀ?

ଯୁବବର୍ଗଙ୍କ ଖୁସି କମିଥିଲେ ସୁଦ୍ଧା, ସାମଗ୍ରିକ ହାପିନେସ୍ ରାଙ୍କିଙ୍ଗରେ ପାଶ୍ଚାତ୍ୟ ତଥା ବିଶେଷ କରି ସ୍କାଣ୍ଡିନେଭିଆନ୍ ଦେଶଗୁଡ଼ିକର ଦବଦବା ଜାରି ରହିଛି।

• ସବୁଠୁ ଖୁସି ଦେଶ: ଲଗାତାର ନବମ ବର୍ଷ ପାଇଁ ଫିନଲ୍ୟାଣ୍ଡ ବିଶ୍ୱର ସବୁଠାରୁ ଖୁସି ଦେଶ ଭାବେ ଶୀର୍ଷରେ ରହିଛି। ଏହା ପଛକୁ ଆଇସଲ୍ୟାଣ୍ଡ, ଡେନମାର୍କ, କୋଷ୍ଟାରିକା, ସ୍ୱିଡେନ୍ ଏବଂ ନରୱେ ରହିଛନ୍ତି। ନେଦରଲ୍ୟାଣ୍ଡସ୍, ଇସ୍ରାଏଲ୍ ଏବଂ ସୁଇଜରଲ୍ୟାଣ୍ଡ ମଧ୍ୟ ଶ୍ରେଷ୍ଠ ୧୦ ରେ ସ୍ଥାନ ପାଇଛନ୍ତି।
• ସବୁଠୁ ଦୁଃଖୀ ଦେଶ: ଆଫଗାନିସ୍ତାନ ତାଲିକାର ସର୍ବନିମ୍ନରେ ରହି ବିଶ୍ୱର ସବୁଠାରୁ ଦୁଃଖୀ ଦେଶ ପାଲଟିଛି। ଆଫ୍ରିକା ଏବଂ ମଧ୍ୟପ୍ରାଚ୍ୟର ଅନେକ ଦେଶ ଯଥା- ଜିମ୍ବାୱେ, ମଲାୱି, ଇଜିପ୍ଟ, ୟେମେନ ଏବଂ ଲେବାନନ୍ ମଧ୍ୟ ସବୁଠାରୁ ତଳେ ଥିବା ୧୦ଟି ଦେଶ ତାଲିକାରେ ଅଛନ୍ତି।
• ସୌଜନ୍ୟ Prameya News7