ନୂଆଦିଲ୍ଲୀ: ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମାଙ୍କ ପତ୍ନୀ ରିନିକି ଭୂୟାଁ ଶର୍ମାଙ୍କ ଅଭିଯୋଗ ଆଧାରରେ ଆସାମ ପୁଲିସ ରୁଜୁ କରିଥିବା ଏକ ମାମଲାରେ ତେଲେଙ୍ଗାନା ହାଇକୋର୍ଟ କଂଗ୍ରେସ ନେତାଙ୍କୁ ଏକ ସପ୍ତାହର ଆଗୁଆ ଜାମିନ ଦେଇଥିଲେ। ତାହା ଉପରେ ବୁଧବାର ସୁପ୍ରିମ୍କୋର୍ଟ ସ୍ଥଗିତାଦେଶ ଜାରି କରିଛନ୍ତି।
ଆସାମ ପୁଲିସ ମଧ୍ୟବର୍ତ୍ତିକାଳୀନ ଜାମିନ ବିରୋଧରେ ଆବେଦନ କରି ତେଲେଙ୍ଗାନା ହାଇକୋର୍ଟଙ୍କର ଏହି ମାମଲାରେ ଅଧିକାର ନାହିଁ ବୋଲି ଯୁକ୍ତି ବାଢ଼ିବା ପରେ ସୁପ୍ରିମ୍କୋର୍ଟଙ୍କ ଏହି ନିର୍ଦ୍ଦେଶ ଆସିଛି। ମଧ୍ୟବର୍ତ୍ତିକାଳୀନ ଜାମିନ ସ୍ଥଗିତ ରଖିବା ସମୟରେ ସୁପ୍ରିମ୍କୋର୍ଟ କହିଛନ୍ତି ଯେ ଖେଡ଼ା ଆସାମର ଏକ ଉପଯୁକ୍ତ କୋର୍ଟରୁ ରିଲିଫ୍ ମାଗିବାକୁ ସ୍ୱାଧୀନ ଏବଂ ଯଦି କଂଗ୍ରେସ ନେତା ଏହା କରିବାକୁ ଚାହିଁବେ ତେବେ ଆଜିର ଆଦେଶ ସେହି ମାମଲାରେ କୌଣସି ପ୍ରଭାବ ପକାଇବ ନାହିଁ।
ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱଶର୍ମା ଓ ତାଙ୍କ ପତ୍ନୀ ରିନିକି ଭୂୟାଁ ଶର୍ମାଙ୍କ ବିରୋଧରେ ଖେଡ଼ା କରିଥିବା ଅଭିଯୋଗ ପରେ ଆସାମରେ ଏହି ମାମଲା ରୁଜୁ ହୋଇଛି। ଏପ୍ରିଲ ୫ ତାରିଖରେ ଏକ ସାମ୍ବାଦିକ ସମ୍ମିଳନୀରେ ଖେଡ଼ା ଅଭିଯୋଗ କରିଥିଲେ ଯେ, ରିନିକି ଭୂୟାଁ ଶର୍ମାଙ୍କ ପାଖରେ ଏକାଧିକ ପାସପୋର୍ଟ ଅଛି ଏବଂ ବିଦେଶୀ ସମ୍ପତ୍ତି ଅଛି, ଯାହା ମୁଖ୍ୟମନ୍ତ୍ରୀଙ୍କ ନିର୍ବାଚନ ସତ୍ୟପାଠରେ ପ୍ରକାଶ କରାଯାଇ ନାହିଁ। ଏହି ଅଭିଯୋଗକୁ ଆଧାର କରି ଗୌହାଟୀରେ ଏକ ଏଫ୍ଆଇଆର୍ ରୁଜୁ ହୋଇଥିଲା, ଯାହା ପରେ କଂଗ୍ରେସ ନେତାଙ୍କ ବିରୋଧରେ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଥିଲା।
ତେଲେଙ୍ଗାନା ହାଇକୋର୍ଟଙ୍କ ଆଦେଶକୁ ସ୍ଥଗିତ ରଖି ସୁପ୍ରିମ୍କୋର୍ଟ ସ୍ପଷ୍ଟ କରିଛନ୍ତି ଯେ ଆସାମର ଏକ ଦକ୍ଷ ଅଦାଲତରେ ଆଗୁଆ ଜାମିନ ମାଗିବାରେ ଖେଡ଼ାଙ୍କୁ କେହି ଅଟକାଇବେ ନାହିଁ। ଶୁଣାଣି ସମୟରେ ଆସାମ ସରକାରଙ୍କ ପକ୍ଷରୁ ହାଜର ହୋଇଥିବା ସଲିସିଟର ଜେନେରାଲ ତୁଷାର ମେହେଟ୍ଟା ଯୁକ୍ତି ଦର୍ଶାଇଥିଲେ ଯେ ଆସାମରେ ଘଟିଥିବା ଏହି ମାମଲାରେ ଟ୍ରାଞ୍ଜିଟ୍ ଆଗୁଆ ଜାମିନ ପ୍ରଦାନ କରିବାର ଅଧିକାର ହାଇକୋର୍ଟଙ୍କ ପାଖରେ ନାହିଁ।
ସେ ଯୁକ୍ତି ବାଢିଛନ୍ତି ଯେ, ଖେଡ଼ା ଏହି ମାମଲାର ଆଞ୍ଚଳିକ ଅଧିକାର ବାହାରେ ଥିବା କୋର୍ଟରୁ ଆଶ୍ବସ୍ତି ମାଗିବା ପରିବର୍ତ୍ତେ ଆସାମର କୋର୍ଟ ନିକଟକୁ ଯିବା ଉଚିତ। ଆସାମ ସରକାର ମଧ୍ୟ ରିଲିଫ୍ ମାଗିବାବେଳେ ଖେଡ଼ାଙ୍କ ଦ୍ୱାରା ଦାଖଲ ହୋଇଥିବା ଦସ୍ତାବିଜକୁ ନେଇ ଚିନ୍ତା ପ୍ରକଟ କରିଥିଲେ। ଅଭିଯୋଗ ହୋଇଥିଲା ଯେ ଉପସ୍ଥାପିତ ଆଧାର କାର୍ଡରେ ଅସଙ୍ଗତି ଥିଲା, ପ୍ରଥମ ପୃଷ୍ଠାରେ ଖେଡ଼ାଙ୍କ ନାମ ଥିବା ବେଳେ ପଛ ପାର୍ଶ୍ୱରେ ଥିବା ଠିକଣା ତାଙ୍କ ପତ୍ନୀଙ୍କ ସହ ମେଳ ଖାଉଛି।
ସୁପ୍ରିମ୍କୋର୍ଟ କହିଛନ୍ତି ଯେ ଏହି ମାମଲାର ଅଧିକ ଯାଞ୍ଚ ଆବଶ୍ୟକ ଏବଂ ଖେଡ଼ାଙ୍କୁ ନୋଟିସ୍ ଜାରି କରାଯାଇଛି। କୋର୍ଟ ଏହା ମଧ୍ୟ କହିଛନ୍ତି ଯେ ଖେଡ଼ା ପ୍ରଥମେ ସାତ ଦିନର ମଧ୍ୟବର୍ତ୍ତିକାଳୀନ ରିଲିଫ୍ ପାଇଥିଲେ ଏବଂ ପରବର୍ତ୍ତୀ ସମୟରେ ତେଲେଙ୍ଗାନା ହାଇକୋର୍ଟରୁ ତିନି ସପ୍ତାହ ବୃଦ୍ଧି ମାଗିଥିଲେ। ପୂର୍ବରୁ ଦିଆଯାଇଥିବା ମଧ୍ୟବର୍ତ୍ତିକାଳୀନ ସୁରକ୍ଷା ବର୍ତ୍ତମାନ ସ୍ଥଗିତ ରଖାଯାଇଛି। ସୁପ୍ରିମ୍କୋର୍ଟଙ୍କ ହସ୍ତକ୍ଷେପ ସହିତ, ଖେଡ଼ା ଆଗୁଆ ଜାମିନ ପାଇଁ ଆସାମର ଏକ ଦକ୍ଷ କୋର୍ଟଙ୍କ ଦ୍ୱାରସ୍ଥ ହେବେ କି ନାହିଁ ତାହା ଉପରେ ନଜର ରହିଛି।
ଚଳିତ ମାସ ପ୍ରାରମ୍ଭରେ ବିଶ୍ୱଶର୍ମାଙ୍କ ପତ୍ନୀଙ୍କ ଅଭିଯୋଗ ପରେ ଆସାମ ପୁଲିସ କଂଗ୍ରେସ ନେତାଙ୍କ ବିରୋଧରେ ଗୁଆହାଟୀ କ୍ରାଇମବ୍ରାଞ୍ଚରେ ମାମଲା ରୁଜୁ କରିଥିଲା। ଏହି ଏତଲାରେ ଭାରତୀୟ ନ୍ୟାୟ ସଂହିତାର ଏକାଧିକ ଧାରା ରହିଛି, ଯେଉଁଥିରେ ନିର୍ବାଚନ ଓ ଠକେଇ ସହ ଜଡିତ ମିଥ୍ୟା ବିବୃତି ଅନ୍ତର୍ଭୁକ୍ତ।
ଏହା ପୂର୍ବରୁ ଆସାମ ପୁଲିସର ଏକ ଟିମ୍ ପଚରାଉଚରା ପାଇଁ ଦିଲ୍ଲୀରେ ଥିବା ଖେଡ଼ାଙ୍କ ବାସଭବନକୁ ଯାଇଥିଲେ ମଧ୍ୟ ତାଙ୍କୁ ସେଠାରେ ପାଇ ନ ଥିଲେ। ପରିସରରେ ଏକ ସର୍ଚ୍ଚ ଅପରେସନ କରାଯାଇଥିଲା, ଯେଉଁଥିରେ କିଛିଆପରାଧିକ ସାମଗ୍ରୀ ଉଦ୍ଧାର କରାଯାଇଥିଲା। ଅନ୍ୟପକ୍ଷରେ କଂଗ୍ରେସ ଦଳ ଅଭିଯୋଗ କରିବା ପୂର୍ବରୁ ଦସ୍ତାବିଜ ଯାଞ୍ଚ କରିବାରେ ବିଫଳ ହୋଇଥିବା ଅଭିଯୋଗ କରି ଶର୍ମା କଂଗ୍ରେସ ଦଳକୁ ସମାଲୋଚନା କରିଛନ୍ତି। ସେ ଦାବି କରିଛନ୍ତି ଯେ, ଖେଡ଼ା ପଚରାଉଚରାରୁ ରକ୍ଷା ପାଇବା ପାଇଁ ହାଇଦ୍ରାବାଦ ପଳାଇଛନ୍ତି। ସୁପ୍ରିମ୍କୋର୍ଟଙ୍କ ନୋଟିସ୍ ଉପରେ ଖେଡ଼ାଙ୍କ ଜବାବ ପରେ ତିନି ସପ୍ତାହ ପରେ ଏହି ମାମଲାର ଶୁଣାଣି ହେବ। ସେପର୍ଯ୍ୟନ୍ତ ଆଇନଗତ ପ୍ରକ୍ରିୟା ଜାରି ରହିବ, ନ୍ୟାୟିକ ପ୍ରଶ୍ନ ଓ ତେଲେଙ୍ଗାନା ହାଇକୋର୍ଟଙ୍କ ଆଦେଶର ବୈଧତାକୁ ବିସ୍ତୃତ ଭାବରେ ଯାଞ୍ଚ କରାଯିବ।
ସୌଜନ୍ୟ ସମ୍ବାଦ