କୋଲକାତା: ତୃଣମୂଳ କଂଗ୍ରେସ (ଟିଏମ୍ସି) ସୁପ୍ରିମୋ ତଥା ପଶ୍ଚିମବଙ୍ଗର ପୂର୍ବତନ ମୁଖ୍ୟମନ୍ତ୍ରୀ ମମତା ବାନାର୍ଜୀ ବିଜେପି ଉପରେ ତୀବ୍ର ଆକ୍ରମଣ କରିଛନ୍ତି। ମମତା କହିଛନ୍ତି ଯେ ବିଜେପି ଖୁବ୍ ଶୀଘ୍ର କେନ୍ଦ୍ରରୁ କ୍ଷମତାରୁ ବିତାଡ଼ିତ ହେବାକୁ ଯାଉଛି। ମମତା ମଙ୍ଗଳବାର ତାଙ୍କ ବାସଭବନରେ ତୃଣମୂଳ କଂଗ୍ରେସ ବିଧାୟକଙ୍କୁ ସମ୍ବୋଧିତ କରି ଏହା କହିଥିବାବେଳେ ସଂଖ୍ୟାଲଘୁ ସମ୍ପ୍ରଦାୟ ଓ ରାସ୍ତାକଡ଼ର ହକର୍ ବିଜେପି ସରକାରରେ ଟାର୍ଗେଟ ଥିବା କହିଛନ୍ତି। ମମତାଙ୍କ ପୁତୁରା ଅଭିଷେକ ବାନାର୍ଜୀ ମଧ୍ୟ ବୈଠକରେ ଉପସ୍ଥିତ ଥିବାବେଳେ କୌଣସି ଧମକ ଆଗରେ ହାର ମାନିବେ ନାହିଁ ବୋଲି କହିଛନ୍ତି। ଅଭିଷେକଙ୍କୁ ବେଆଇନ ନିର୍ମାଣ ନେଇ ନିକଟରେ ନୋଟିସ ମିଳିଥିଲା।
ହକର ଷ୍ଟଲଗୁଡ଼ିକୁ ବୁଲଡୋଜର ମାଧ୍ୟମରେ ଭାଙ୍ଗି ଦିଆଯାଉଛି ବୋଲି ମମତା କହିଛନ୍ତି। ସେ ରାଜ୍ୟର ବିଭିନ୍ନ ସ୍ଥାନରେ ନିର୍ବାଚନ ପରବର୍ତ୍ତୀ ହିଂସା ଓ ଅବୈଧ ଜବରଦଖଲ ବିରୋଧରେ କାର୍ଯ୍ୟାନୁଷ୍ଠାନର ଅଭିଯୋଗ ଆଣିଛନ୍ତି। ଶୁଭେନ୍ଦୁ ଅଧିକାରୀ ନେତୃତ୍ୱାଧୀନ ରାଜ୍ୟ ସରକାରଙ୍କୁ ସମାଲୋଚନା କରି ମମତା ତୀବ୍ର ପ୍ରତିକ୍ରିୟା ରଖି କହିଛନ୍ତି ଯେ, ବିଜେପି ସାମ୍ବିଧାନିକ ଚିନ୍ତାଧାରା ଓ ମୂଲ୍ୟବୋଧ ସହିତ ହେର୍ଫେର୍ କରୁଛି। । ମମତା ଆହୁରି ମଧ୍ୟ କହିଛନ୍ତି ଯେ, କେନ୍ଦ୍ରର ଶାସକ ଏନ୍ଡିଏ ମେଣ୍ଟର ନେତୃତ୍ୱ ନେଉଥିବା ବିଜେପି ନିକଟ ଭବିଷ୍ୟତରେ କେନ୍ଦ୍ରରେ କ୍ଷମତା ହରାଇବ। ଆଗାମୀ ଦିନରେ ଦିଲ୍ଲୀରେ ବିଜେପିକୁ କ୍ଷମତାରୁ ହଟାଇ ଦିଆଯିବ।
ବିଜେପି ବିରୋଧରେ ଲଢ଼େଇ ଜାରି ରହିବ
ମମତାଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଟିଏମ୍ସିର ଜାତୀୟ ସାଧାରଣ ସମ୍ପାଦକ ଅଭିଷେକ ଯୋଗ ଦେଇ କୋଲକାତା ମ୍ୟୁନିସିପାଲ କର୍ପୋରେସନ (କେଏମସି) ଦ୍ୱାରା ତାଙ୍କୁ ପଠାଯାଇଥିବା ନୋଟିସ ସମ୍ପର୍କରେ କହିଛନ୍ତି ଯେ, ସେମାନଙ୍କର ଯାହା ଇଚ୍ଛା ତାହା କରନ୍ତୁ। ମୋ ଘର ଭାଙ୍ଗି ଦିଅନ୍ତି କି ମୋତେ ନୋଟିସ ପଠାନ୍ତୁ, ମୁଁ ଏସବୁ ପାଇଁ ସେମାନଙ୍କ ଆଗରେ ମୁଣ୍ଡ ନୁଆଁଇବି ନାହିଁ। ବିଜେପି ବିରୋଧରେ ଲଢ଼େଇ ଜାରି ରହିବ। ତେବେ ଅଭିଷେକଙ୍କୁ ଘର ଭାଙ୍ଗିବାକୁ ନୋଟିସ ପଠାଇଥିବା କେଏମସି ଏବେବି ଟିଏମସିର ନିୟନ୍ତ୍ରଣରେ ଅଛି ଓ ମମତାଙ୍କ ଘନିଷ୍ଠ ସହଯୋଗୀ ଭାବେ ବିବେଚିତ ଦଳର ବିଧାୟକ ଫିରହାଦ ହାକିମ କୋଲକାତାର ମେୟର।
ବର୍ତ୍ତମାନର ମୁଖ୍ୟମନ୍ତ୍ରୀ ଭଳି କେହି ନଥିଲେ: ଅଭିଷେକ
ଅଭିଷେକ ମଧ୍ୟ ମୁଖ୍ୟମନ୍ତ୍ରୀ ଅଧିକାରୀଙ୍କୁ ସମାଲୋଚନା କରି ୨୦୧୪ ମସିହାରେ ହୋଇଥିବା ବିବାଦୀୟ ନାରଦା ଷ୍ଟିଙ୍ଗ୍ ଅପରେସନ୍ ବିଷୟରେ କହିଥିଲେ। ସେତେବେଳେ ଶୁଭେନ୍ଦୁ ଅଧିକାରୀ ଟିଏମସିରେ ଥିଲେ। ଅଭିଷେକ କହିଛନ୍ତି, ଆମ ରାଜ୍ୟରେ ଅନେକ ମୁଖ୍ୟମନ୍ତ୍ରୀ ଥିଲେ କିନ୍ତୁ ବର୍ତ୍ତମାନର ମୁଖ୍ୟମନ୍ତ୍ରୀ ଭଳି କେହି ନଥିଲେ। କ୍ୟାମେରା ଆଗରେ ଟଙ୍କା ନେଉଥିବାର ଦେଖାଯାଇଥିବା ବ୍ୟକ୍ତିଙ୍କୁ ମୁଖ୍ୟମନ୍ତ୍ରୀ କରାଯାଇଛି ବୋଲି ଟିଏମସି ସାଂସଦ କହିଛନ୍ତି। ଟିଏମସି ମେ ୨୧ ତାରିଖରେ ହକରମାନଙ୍କୁ ବଳପୂର୍ବକ ଉଚ୍ଛେଦ ବିରୋଧରେ ପ୍ରତିବାଦ କରିବାକୁ ଯୋଜନା କରୁଥିବା ବେଳେ ଏହି ବୈଠକ ଅନୁଷ୍ଠିତ ହୋଇଛି। ବାଲିଗଞ୍ଜ, ହାୱଡ଼ା ଜଙ୍କସନ ଓ ସିଆଲଦା ରେଳ ଷ୍ଟେସନ ନିକଟରେ ଏହି ପ୍ରତିବାଦ କାର୍ଯ୍ୟକ୍ରମ ଆୟୋଜନ କରାଯିବ।
ସୌଜନ୍ୟ ସମ୍ବାଦ