ଭବିଷ୍ୟତରେ ଭାରତ ଓ ଚୀନ୍ ମଧ୍ୟରେ କୌଣସି ସାମରିକ ସଂଘର୍ଷ ହେଲେ ଷ୍ଟେଲ୍ଥ ଯୁଦ୍ଧ ବିମାନ କ୍ଷେତ୍ରରେ ଥିବା ବ୍ୟବଧାନ ନିର୍ଣ୍ଣାୟକ ହୋଇପାରେ।
ନୂଆଦିଲ୍ଲୀ: ଭବିଷ୍ୟତରେ ଭାରତ ଓଚୀନ୍ ମଧ୍ୟରେ କୌଣସି ସାମରିକ ସଂଘର୍ଷ ହେଲେ ଷ୍ଟେଲ୍ଥ ଯୁଦ୍ଧ ବିମାନ କ୍ଷେତ୍ରରେ ଥିବା ବ୍ୟବଧାନ ନିର୍ଣ୍ଣାୟକ ହୋଇପାରେ। ଏକ ବିଶ୍ଳେଷଣରେ କୁହାଯାଇଛି ଯେ, ଚୀନ୍ ପାଖରେ ବର୍ତ୍ତମାନ ଶହ ଶହ ଷ୍ଟେଲ୍ଥ ଯୁଦ୍ଧ ବିମାନ ଥିବାବେଳେ ଭାରତୀୟ ବାୟୁସେନା ପାଖରେ ଏପର୍ଯ୍ୟନ୍ତ ଗୋଟିଏ ବି ଷ୍ଟେଲ୍ଥ ଯୁଦ୍ଧ ବିମାନ ନାହିଁ। ଏହି ବ୍ୟବଧାନ ଭାରତ ପାଇଁ ରଣନୈତିକ ଚ୍ୟାଲେଞ୍ଜ ସୃଷ୍ଟି କରୁଛି।
ରିପୋର୍ଟ ଅନୁସାରେ, ଚୀନ୍ର ବାୟୁସେନା ପାଖରେ ବର୍ତ୍ତମାନ ୩୦୦ରୁ ଅଧିକ ଜେ-୨୦ ଷ୍ଟେଲ୍ଥ ଯୁଦ୍ଧ ବିମାନ ରହିଛି। ଏହାଛଡ଼ା ଜେ-୩୫ ପରି ନୂଆ ପିଢ଼ିର ଷ୍ଟେଲ୍ଥ ବିମାନର ବିକାଶ ମଧ୍ୟ ଦ୍ରୁତ ଗତିରେ ଚାଲିଛି। ଅନ୍ୟପକ୍ଷରେ, ଭାରତ ଏପର୍ଯ୍ୟନ୍ତ ରାଫେଲ, ସୁଖୋଇ-୩୦ ଏମ୍କେଆଇ ଓ ତେଜସ ପରି ଚତୁର୍ଥ ଓ ସାଢ଼େ ଚତୁର୍ଥ ପିଢ଼ିର ଯୁଦ୍ଧ ବିମାନ ଉପରେ ନିର୍ଭର କରୁଛି। ଭାରତ ନିଜସ୍ୱ ପଞ୍ଚମ ପିଢ଼ିର ଆଡ୍ଭାନ୍ସଡ୍ ମିଡିୟମ୍ କମ୍ବାଟ୍ ଏୟାର୍କ୍ରାଫ୍ଟ (ଏଏମ୍ସିଏ) ପ୍ରକଳ୍ପ ଉପରେ କାମ କରୁଛି। ସରକାର ଏହି ପ୍ରକଳ୍ପକୁ ଅନୁମୋଦନ କରିଥିବାବେଳେ ପ୍ରଥମ ପ୍ରୋଟୋଟାଇପ୍ ଆସନ୍ତା କିଛି ବର୍ଷ ମଧ୍ୟରେ ପ୍ରସ୍ତୁତ ହେବ ବୋଲି ଆଶା କରାଯାଉଛି। ତେବେ ଏହାକୁ ବାୟୁସେନାରେ ସାମିଲ କରିବାକୁ ଆହୁରି ସମୟ ଲାଗିବ।
ପ୍ରତିରକ୍ଷା ବିଶେଷଜ୍ଞଙ୍କ ମତରେ, ଷ୍ଟେଲ୍ଥ ବିମାନ ଶତ୍ରୁ ରାଡାରରେ ସହଜରେ ଧରାପଡ଼େ ନାହିଁ। ଏହି କାରଣରୁ ସେଗୁଡ଼ିକ ଆକ୍ରମଣ ଓ ପ୍ରତିରକ୍ଷା ଉଭୟ କ୍ଷେତ୍ରରେ ସୁବିଧାରେ ଥାନ୍ତି। ଚୀନ୍ର ବଢ଼ୁଥିବା ଷ୍ଟେଲ୍ଥ କ୍ଷମତାକୁ ଦୃଷ୍ଟିରେ ରଖି ଭାରତକୁ ଏଏମ୍ସିଏ ପ୍ରକଳ୍ପରେ ଗତି ଆଣିବା ସହ ଆବଶ୍ୟକ ହେଲେ ବିଦେଶରୁ ପଞ୍ଚମ ପିଢ଼ିର ଯୁଦ୍ଧ ବିମାନ କିଣିବା ବିକଳ୍ପ ଉପରେ ମଧ୍ୟ ବିଚାର କରିବାକୁ ପଡ଼ିପାରେ। ତେବେ ରିପୋର୍ଟରେ ଏହା ମଧ୍ୟ କୁହାଯାଇଛି ଯେ, କେବଳ ଷ୍ଟେଲ୍ଥ ବିମାନ ସଂଖ୍ୟା ହିଁ ଯୁଦ୍ଧର ଫଳାଫଳ ନିର୍ଣ୍ଣୟ କରେନାହିଁ। ପାଇଲଟଙ୍କ ଦକ୍ଷତା, ବାୟୁ ପ୍ରତିରକ୍ଷା ବ୍ୟବସ୍ଥା, କ୍ଷେପଣାସ୍ତ୍ର କ୍ଷମତା, ନେଟ୍ୱର୍କ ଯୁଦ୍ଧ ବ୍ୟବସ୍ଥା ଓ ସାମଗ୍ରିକ ସାମରିକ ପ୍ରସ୍ତୁତି ମଧ୍ୟ ସମାନ ଭାବେ ଗୁରୁତ୍ୱପୂର୍ଣ୍ଣ।
ସୌଜନ୍ୟ ସମ୍ବାଦ
