Hockey Grand Prix: ୩ ଦିନ ପରେ ହକି ମହାକୁମ୍ଭ: ଅଭିଜ୍ଞତା, ଯୁବଶକ୍ତିରେ ଭରପୂର ଭାରତୀୟ ପୁରୁଷ ଦଳ
ଆଉ ମାତ୍ର ୩ଦିନ ପରେ ଆରମ୍ଭ ହେବ ଏଫ୍ଆଇଏଚ୍ ହକି ବିଶ୍ୱକପ୍। ଅଗଷ୍ଟ ୧୫ରୁ ୩୦ ତାରିଖ ପର୍ଯ୍ୟନ୍ତ ବେଲଜିୟମ ଓ ନେଦରଲାଣ୍ଡସ୍ରେ ଖେଳାଯିବାକୁ ଥିବା ଏହି ମହାକୁମ୍ଭ ପାଇଁ ଭାରତ ୨୦ ଜଣିଆ ଦଳ ଘୋଷଣା କରିଛି।
ଭୁବନେଶ୍ବର: ଆଉ ମାତ୍ର ୩ଦିନ ପରେ ଆରମ୍ଭ ହେବ ଏଫ୍ଆଇଏଚ୍ ହକି ବିଶ୍ୱକପ୍। ଅଗଷ୍ଟ ୧୫ରୁ ୩୦ ତାରିଖ ପର୍ଯ୍ୟନ୍ତ ବେଲଜିୟମ ଓ ନେଦରଲାଣ୍ଡସ୍ରେ ଖେଳାଯିବାକୁ ଥିବା ଏହି ମହାକୁମ୍ଭ ପାଇଁ ଭାରତ ୨୦ ଜଣିଆ ଦଳ ଘୋଷଣା କରିଛି। ଦଳର ନେତୃତ୍ୱ ନେବେ ଦକ୍ଷ ଡ୍ରାଗ୍ଫ୍ଲିକର୍ ତଥା ଡିଫେଣ୍ଡର ହରମନପ୍ରୀତ୍ ସିଂହ। ଅଭିଜ୍ଞ ଖେଳାଳିଙ୍କ ସହ ନୂଆ ପ୍ରତିଭାଙ୍କ ସମନ୍ୱୟରେ ଗଠିତ ଭାରତୀୟ ଦଳରେ ରହିଛି ଦୃଢ଼ ଡିଫେନ୍ସ, ସୃଜନଶୀଳ ମିଡ୍ଫିଲ୍ଡ ଏବଂ ଶକ୍ତିଶାଳୀ ଫରୱାର୍ଡ ଲାଇନ୍। ୧୯୭୫ ପରେ ଆଉ ଥରେ ବିଶ୍ୱକପ୍ ଟ୍ରଫି ଜିତିବା ଲକ୍ଷ୍ୟରେ ଭାରତ ଏଥର ଦୃଢ଼ ଦାବିଦାର ଭାବେ ପ୍ରତିଯୋଗିତାକୁ ଓହ୍ଲାଇବ। ଆସନ୍ତୁ ଭାରତୀୟ ଦଳରେ ଥିବା ଖେଳାଳିଙ୍କ ଅଭିଜ୍ଞତା ଓ ଦକ୍ଷତା ଉପରେ ନଜର ପକାଇବା।
ଗୋଲ୍ରକ୍ଷକ
ମୋହିତ ଏଚ୍ଏସ୍: (୨୪ ବର୍ଷ, ମ୍ୟାଚ୍ ୧୫): ଯୁବ ଗୋଲକିପର ମୋହିତ ପ୍ରଥମ ଥର ପାଇଁ ସିନିୟର ବିଶ୍ୱକପ୍ ଖେଳିବେ। ତୀକ୍ଷ୍ଣ ପ୍ରତିକ୍ରିୟା ଓ ଚାପରେ ଶାନ୍ତ ରହିବା ତାଙ୍କର ପ୍ରମୁଖ ଶକ୍ତି।
ସୂରଜ କର୍କେରା (୩୦, ମ୍ୟାଚ୍ ୮୯): ଅଭିଜ୍ଞ ଗୋଲକିପର ସୂରଜ ପୂର୍ବରୁ କିମ୍ବଦନ୍ତି ପିଆର୍ ଶ୍ରୀଜେଶଙ୍କ ବ୍ୟାକ୍ଅପ୍ ଭାବେ ଦଳରେ ରହିଛନ୍ତି। ଏଥର ସେ ଭାରତର ପ୍ରମୁଖ ଗୋଲରକ୍ଷକ ଭାବେ ଦାୟିତ୍ୱ ନେବେ।
ଡିଫେଣ୍ଡର
ଜର୍ମନପ୍ରୀତ ସିଂହ: (୩୦, ମ୍ୟାଚ୍ ୧୫୮): ଗତି, ଦୃଢ଼ ଡିଫେନ୍ସ ଓ ପଛରୁ ଆକ୍ରମଣରେ ସହଯୋଗ ପାଇଁ ପରିଚିତ। ଦଳର ଡିଫେନ୍ସରେ ସେ ଏକ ଗୁରୁତ୍ୱପୂର୍ଣ୍ଣ ଖେଳାଳି।
ହରମନପ୍ରୀତ ସିଂହ: (ଅଧିନାୟକ, ୩୦, ମ୍ୟାଚ୍୨୬୪): ଭାରତର ଅଧିନାୟକ ଓ ବିଶ୍ୱ ହକିର ଅନ୍ୟତମ ଶ୍ରେଷ୍ଠ ଡ୍ରାଗ୍ଫ୍ଲିକର୍। ପେନାଲ୍ଟି କର୍ନରରେ ତାଙ୍କ ଦକ୍ଷତା ଭାରତର ବଡ଼ ଅସ୍ତ୍ର। ୧୯୭୫ରେ ଭାରତକୁ ଏକମାତ୍ର ବିଶ୍ୱକପ୍ ଜିତାଇଥିବା ଅଧିନାୟକ ଅଜିତ ପାଲ୍ ସିଂହଙ୍କ ପରେ ହରମନପ୍ରୀତ ଦ୍ୱିତୀୟ ଭାରତୀୟ ଭାବେ ଦୁଇଥର ବିଶ୍ୱକପ୍ରେ ଦଳର ନେତୃତ୍ୱ ନେବେ।
ଅମିତ ରୋହିଦାସ: (୩୩, ମ୍ୟାଚ୍ ୨୪୪): ଶକ୍ତିଶାଳୀ ଓ ଅଭିଜ୍ଞ ଡିଫେଣ୍ଡର ଅମିତ ରୋହିଦାସ ପେନାଲ୍ଟି କର୍ନର ଡିଫେନ୍ସରେ ଭାରତର ଅନ୍ୟତମ ଶ୍ରେଷ୍ଠ ପ୍ରଥମ ରସର୍। ଆବଶ୍ୟକ ସମୟରେ ଡ୍ରାଗ୍ଫ୍ଲିକ୍ରେ ମଧ୍ୟ ଅବଦାନ ରଖିପାରନ୍ତି।
ଜୁଗରାଜ ସିଂହ: (୨୯ବର୍ଷ, ମ୍ୟାଚ୍ ୧୦୫): ଶକ୍ତିଶାଳୀ ଡ୍ରାଗ୍ଫ୍ଲିକ୍ ପାଇଁ ପରିଚିତ ଜୁଗରାଜ ପେନାଲ୍ଟି କର୍ନରରେ ଭାରତକୁ ଆଉ ଏକ ବିକଳ୍ପ ଦେବେ।
ସଞ୍ଜୟ: (୨୫, ମ୍ୟାଚ୍ ୯୦): ଶୃଙ୍ଖଳିତ ଡିଫେନ୍ସ, ଆଥଲେଟିକ୍ ଦକ୍ଷତା ଓ ଆକ୍ରମଣରେ ସହଯୋଗ ପାଇଁ ସଞ୍ଜୟ ଧୀରେ ଧୀରେ ସିନିୟର ଦଳରେ ନିଜ ସ୍ଥାନ ପକ୍କା କରିଛନ୍ତି।
ସୁମିତ: (୨୯, ମ୍ୟାଚ୍ ୧୭୯): ଶକ୍ତି, ଭଲ ପୋଜିସନିଂ ଓ ଟ୍ୟାକ୍ଲିଂ ତାଙ୍କର ପ୍ରମୁଖ ଗୁଣ। ଭାରତୀୟ ଡିଫେନ୍ସକୁ ସ୍ଥିରତା ଦେବାରେ ସୁମିତଙ୍କ ଭୂମିକା ରହିବ।
ଯଶଦୀପ ସିୱାଚ: (୨୫, ମ୍ୟାଚ୍ ୩୪): ପୂର୍ବତନ ଭାରତୀୟ ଖେଳାଳି ପ୍ରୀତମ ସିୱାଚଙ୍କ ପୁଅ ଯଶଦୀପ ପ୍ରଥମ ଥର ବିଶ୍ୱକପ୍ ଖେଳିବେ। ଦୃଢ଼ ପ୍ରସ୍ତୁତି ଓ ଶିଖିବାର ମନୋଭାବ ତାଙ୍କୁ ଏହି ସୁଯୋଗ ଦେଇଛି।
ମିଡ୍ଫିଲ୍ଡର
ରାଜିନ୍ଦର ସିଂହ: (ବୟସ ୨୩ ବର୍ଷ, ମ୍ୟାଚ୍ ୪୪): ଯୁବ ଓ ଉର୍ଜାବାନ୍ ମିଡ୍ଫିଲ୍ଡର ରାଜିନ୍ଦର ଗତି ଓ ଵିଙ୍ଗ୍ରେ ଦକ୍ଷତା ପାଇଁ ପରିଚିତ। ସେ ପ୍ରଥମ ଥର ବିଶ୍ୱକପ୍ ଖେଳିବେ।
ଆଦିତ୍ୟ ଅର୍ଜୁନ ଲାଲାଗେ: (୨୩, ମ୍ୟାଚ୍ ୧୩): ଦଳର ସବୁଠାରୁ କନିଷ୍ଠ ଖେଳାଳି ଆଦିତ୍ୟ ଜଣେ ଆକ୍ରମଣାତ୍ମକ ମିଡ୍ଫିଲ୍ଡର। ବଲ୍କୁ ଆଗକୁ ନେବାର କ୍ଷମତା ତାଙ୍କର ପ୍ରମୁଖ ଶକ୍ତି।
ହାର୍ଦ୍ଦିକ ସିଂହ: (୨୭, ମ୍ୟାଚ୍ ୧୮୧): ଭାରତୀୟ ମିଡ୍ଫିଲ୍ଡର ମୁଖ୍ୟ ଖେଳ ସୃଷ୍ଟିକାରୀଙ୍କ ମଧ୍ୟରୁ ଜଣେ। ଆଥଲେଟିସିଜମ୍, ବଲ୍ ଜିତିବା ଓ ଦ୍ରୁତ ଦୌଡ଼ ତାଙ୍କୁ ଦଳର ଏକ ବଡ଼ ଅସ୍ତ୍ର କରିଛି।
ମନପ୍ରୀତ ସିଂହ: (୩୪, ମ୍ୟାଚ୍ ୪୧୭): ୪୧୭ଟି ଅନ୍ତର୍ଜାତୀୟ ମ୍ୟାଚ୍ ସହ ମନପ୍ରୀତ ଭାରତର ସର୍ବାଧିକ କ୍ୟାପ୍ଧାରୀ ଖେଳାଳି। ଏହି ବିଶ୍ୱକପ୍ରେ ଅଂଶଗ୍ରହଣ କରୁଥିବା ୧୬ଟି ଦଳ ମଧ୍ୟରେ ମଧ୍ୟ ସେ ସର୍ବାଧିକ ଅନ୍ତର୍ଜାତୀୟ ମ୍ୟାଚ୍ ଖେଳିଥିବା ଖେଳାଳି। ପୂର୍ବତନ ଅଧିନାୟକ ମନପ୍ରୀତଙ୍କ ନେତୃତ୍ୱରେ ଭାରତ ୪୧ ବର୍ଷ ପରେ ଟୋକିଓ ଅଲିମ୍ପିକ୍ସରେ କାଂସ୍ୟ ପଦକ ଜିତିଥିଲା। ଏହା ତାଙ୍କର ଚତୁର୍ଥ ବିଶ୍ୱକପ୍।
ନୀଳକାନ୍ତ ଶର୍ମା: (୩୧, ମ୍ୟାଚ୍ ୧୫୭): ବଲ୍ ବଣ୍ଟନ, ପରିଶ୍ରମ ଓ ରଣନୀତିକ ବୁଝାମଣା ପାଇଁ ପରିଚିତ ନୀଳକାନ୍ତ ମିଡ୍ଫିଲ୍ଡରେ ଦଳକୁ ସନ୍ତୁଳନ ଦେବେ।
ବିବେକ ସାଗର ପ୍ରସାଦ: (୨୬, ମ୍ୟାଚ୍ ୧୯୪): ମିଡ୍ଫିଲ୍ଡରେ ମନପ୍ରୀତ ଓ ହାର୍ଦ୍ଦିକଙ୍କ ସହ ଭାରତର ଆକ୍ରମଣ ଗଢ଼ିବାରେ ବିବେକଙ୍କ ଭୂମିକା ରହିବ। ଦ୍ରୁତ ପାସ୍, ଚପଳତା ଓ ଡିଫେନ୍ସରୁ ଆକ୍ରମଣକୁ ଶୀଘ୍ର ପରିବର୍ତ୍ତନ କରିବାର କ୍ଷମତା ତାଙ୍କର ବିଶେଷତା।
ଫରୱାର୍ଡ
ଦିଲପ୍ରୀତ୍ ସିଂହ: (୨୬ ବର୍ଷ, ମ୍ୟାଚ୍ ୧୨୨): ଗତି, ଚମତ୍କାର ମୁଭ୍ମେଣ୍ଟ ଓ ଗୋଲ୍ ସୁଯୋଗ ସୃଷ୍ଟି କରିବାର ଦକ୍ଷତା ପାଇଁ ପରିଚିତ। ଆକ୍ରମଣରେ ଭାରତ ପାଇଁ ସେ ଗୁରୁତ୍ୱପୂର୍ଣ୍ଣ।
ଶିଳାନନ୍ଦ ଲାକ୍ରା: (୨୭, ମ୍ୟାଚ୍ ୬୮): ଦ୍ରୁତ ଗତି, ଭଲ ମୁଭ୍ମେଣ୍ଟ ଓ ଆକ୍ରମଣାତ୍ମକ ମନୋଭାବ ତାଙ୍କୁ ଭାରତୀୟ ଫରୱାର୍ଡ ଲାଇନ୍ର ଏକ ଉପଯୋଗୀ ବିକଳ୍ପ କରିଛି। ସେ ମଧ୍ୟ ପ୍ରଥମ ବିଶ୍ୱକପ୍ ଖେଳିବେ।
ସୁଖଜିତ ସିଂହ: (୨୯, ମ୍ୟାଚ୍ ୧୨୪): ଗତି, ଚତୁର ମୁଭ୍ମେଣ୍ଟ ଓ ଗୋଲ୍ କରିବାର ଦକ୍ଷତା ଥିବା ସୁଖଜିତ ଆକ୍ରମଣରେ ଏକ ମୁଖ୍ୟ ଖେଳାଳି।
ମନଦୀପ୍ ସିଂହ: (୩୧, ମ୍ୟାଚ୍ ୨୮୮): ଭାରତର ଅନ୍ୟତମ ଅଭିଜ୍ଞ ଫରୱାର୍ଡ ମନଦୀପ ଚତୁର୍ଥ ଥର ବିଶ୍ୱକପ୍ ଖେଳିବେ। ସର୍କଲ୍ ଭିତରେ ଜାଗା ସୃଷ୍ଟି, ଗୋଲ୍ କରିବାର କ୍ଷମତା ଓ ଅଭିଜ୍ଞତା ତାଙ୍କୁ ଭାରତର ଏକ ପ୍ରମୁଖ ଆକ୍ରମଣାତ୍ମକ ଅସ୍ତ୍ର କରିଛି।
ଅଭିଷେକ: (୨୭, ମ୍ୟାଚ୍ ୧୩୫): ଦ୍ରୁତ ଓ ଦକ୍ଷ ଫରୱାର୍ଡ ଅଭିଷେକ ଗୋଲ୍ କରିବାର କ୍ଷମତା ପାଇଁ ପରିଚିତ। ବିଶେଷକରି ଟମାହକ୍ରେ ତାଙ୍କର ଦକ୍ଷତା ଭାରତ ପାଇଁ ବଡ଼ ଅସ୍ତ୍ର ହୋଇପାରେ।
ସୌଜନ୍ୟ ସମ୍ବାଦ
