Microsoft Server Down: ମାଇକ୍ରୋସଫ୍ଟ ସର୍ଭର ଡାଉନ୍, ଠପ୍ ହୋଇଗଲା ଆଉଟଲୁକ୍ ଓ ମାଇକ୍ରୋସଫ୍ଟ ୩୬୫; ହନ୍ତସନ୍ତ ବିଶ୍ୱର କୋଟି କୋଟି ୟୁଜର

ନୂଆଦିଲ୍ଲୀ: ଡିଜିଟାଲ୍ ଦୁନିଆରେ ହଠାତ୍ ବଡ଼ ଧରଣର ବିଭ୍ରାଟ। ଅଫିସ୍ କାମ ହେଉ କି ବ୍ୟକ୍ତିଗତ ଯୋଗାଯୋଗ, ଇମେଲ୍ ଉପରେ ନିର୍ଭର କରୁଥିବା ଲକ୍ଷ ଲକ୍ଷ ଲୋକଙ୍କ ପାଇଁ ଦେଖାଦେଇଛି ସମସ୍ୟା। ହଠାତ୍ ଡାଉନ୍ ହୋଇଯାଇଛି ମାଇକ୍ରୋସଫ୍ଟର ଇମେଲ୍ ସର୍ଭିସ୍ ଆଉଟଲୁକ୍ ଏବଂ ମାଇକ୍ରୋସଫ୍ଟ ୩୬୫। ଫଳରେ ଭାରତ ସମେତ ବିଶ୍ୱର ଅନେକ ଦେଶର ୟୁଜର ଲଗ୍‌ଇନ୍ କରିବାରେ ସମସ୍ୟା ଭୋଗୁଛନ୍ତି। ଅନେକ ଲୋକ ନିଜ ଇନବକ୍ସ ଖୋଲିପାରୁନଥିବା ବେଳେ ନୂଆ ଇମେଲ୍ ପଠାଇବା ଏବଂ ମେଲ୍ ରିସିଭ୍ କରିବା ମଧ୍ୟ ସମ୍ଭବ ହେଉନାହିଁ। ଗୁରୁବାର ବିଳମ୍ବିତ ରାତିରୁ ଏହି ସମସ୍ୟା ଆରମ୍ଭ ହୋଇଥିବା ଜଣାପଡ଼ିଛି।

ଏହାର ପ୍ରଭାବରେ ଅନେକ କମ୍ପାନୀ ଏବଂ ଅଫିସ୍‌ର କାର୍ଯ୍ୟପ୍ରଣାଳୀ ବାଧାପ୍ରାପ୍ତ ହୋଇଛି। ଜରୁରୀ ମେଲ୍ ପଠାଇବାଠାରୁ ଆରମ୍ଭ କରି ଅଫିସିଆଲ୍ ଯୋଗାଯୋଗ ପର୍ଯ୍ୟନ୍ତ ବିଭିନ୍ନ କାମ ଅଟକି ଯାଇଛି । ଏହି ବୈଷୟିକ ତ୍ରୁଟିକୁ ନେଇ ମାଇକ୍ରୋସଫ୍ଟ ପକ୍ଷରୁ ସୂଚନା ଦିଆଯାଇଛି ଯେ, ସର୍ଭିସ୍‌ରେ ଦେଖାଦେଇଥିବା କନେକ୍ଟିଭିଟି ସମସ୍ୟାର ଯାଞ୍ଚ କରାଯାଉଛି। ପ୍ରଥମେ ଏହା କେବଳ ଆମେରିକାରେ ସୀମିତ ଥିବା କମ୍ପାନୀ ଅନୁମାନ କରିଥିଲା। କିନ୍ତୁ ପରେ ଏହାର ପ୍ରଭାବ ଅନ୍ୟ ଦେଶଗୁଡ଼ିକରେ ମଧ୍ୟ ପଡ଼ିଥିବା ଆଶଙ୍କା କରାଯାଇଛି । ଅନ୍ୟପଟେ ଡାଉନ୍‌ଡିଟେକ୍ଟରରେ ଆଉଟଲୁକ୍ ସମସ୍ୟାକୁ ନେଇ ଏକ ଲକ୍ଷରୁ ଅଧିକ ଅଭିଯୋଗ ରେକର୍ଡ ହୋଇଥିବା ବେଳେ ମାଇକ୍ରୋସଫ୍ଟ ୩୬୫କୁ ନେଇ ମଧ୍ୟ ହଜାର ହଜାର ୟୁଜର ଅଭିଯୋଗ କରିଛନ୍ତି। ଏବେ ମାଇକ୍ରୋସଫ୍ଟର ଟେକ୍ନିକାଲ୍ ଟିମ୍ ସମସ୍ୟାର ସମାଧାନ ପାଇଁ କାମ କରୁଛି। ତେବେ କେବେ ସ୍ୱାଭାବିକ ହେବ ଏହି ସେବା, ତାହାକୁ ନେଇ ୟୁଜରଙ୍କ ଅପେକ୍ଷା ଜାରି ରହିଛି।

ସୌଜନ୍ୟ ସମ୍ବାଦ