ସ୍ତ୍ରୀଙ୍କ ମୋବାଇଲରେ ଏମିତି ଚାଟ୍ ଦେଖି ସ୍ବାମୀଙ୍କ ପାଦ ତଳୁ ଖସିଗଲା ମାଟି, ସିଧା ପହଞ୍ଚିଲେ ଥାନାରେ…
ନୂଆଦିଲ୍ଲୀ,୧୩।୮: ତେଲଙ୍ଗାନାର ମହବୁବାବାଦ ଜିଲାରୁ ସାମ୍ନାକୁ ଆସିଥିବା ଏକ ଘଟଣା ଚାଞ୍ଚଲ୍ୟ ସୃଷ୍ଟି କରିଛି। ଜଣେ ବ୍ୟକ୍ତି ତାଙ୍କ ପତ୍ନୀ ଓ ତାଙ୍କର କଥିତ ପ୍ରେମିକଙ୍କ ବିରୋଧରେ ତାଙ୍କୁ ହତ୍ୟା କରିବାକୁ ଷଡ଼ଯନ୍ତ୍ର ରଚିଥିବା ଅଭିଯୋଗ ଆଣିଛନ୍ତି। ତାଙ୍କ ଦାବି ଅନୁସାରେ, ପତ୍ନୀ ଓ ତାଙ୍କ କଥିତ ପ୍ରେମିକଙ୍କ ମଧ୍ୟରେ ହୋଇଥିବା ହୱାଟ୍ସଆପ ଓ ଇନଷ୍ଟାଗ୍ରାମ ଚାଟ୍ରେ ତାଙ୍କୁ ହତ୍ୟା କରିବା ନେଇ ଆଲୋଚନା ହୋଇଥିଲା। ଏପରିକି ତାଙ୍କ ମୃତ୍ୟୁକୁ ଏକ ସଡ଼କ ଦୁର୍ଘଟଣା ଭଳି ଦେଖାଇବାକୁ ମଧ୍ୟ ଯୋଜନା ହୋଇଥିବା ଅଭିଯୋଗ ହୋଇଛି।
ମହବୁବାବାଦ ଜିଲାର ଏକ ଗାଁର ବାସିନ୍ଦା ଗାଡେ ରାଜେଶ୍ୱର ରାଓ ପୋଲିସରେ ଅଭିଯୋଗ ଦାଖଲ କରିଛନ୍ତି। ରାଓଙ୍କର ୨୦୧୬ରେ ଭବାନୀଙ୍କ ସହ ବିବାହ ହୋଇଥିଲା ଏବଂ ଉଭୟଙ୍କର ଦୁଇଟି ଝିଅ ଅଛନ୍ତି। ଅଭିଯୋଗ ଅନୁସାରେ, କିଛି ସମୟ ଧରି ରାଓ ତାଙ୍କ ପତ୍ନୀ ଓ ଖମ୍ମମରେ କାମ କରୁଥିବା ଜଣେ କୋରିୟର ଡେଲିଭରି ଏଜେଣ୍ଟ ସୈଦୁଲୁଙ୍କ ମଧ୍ୟରେ କଥିତ ସମ୍ପର୍କକୁ ନେଇ ସନ୍ଦେହ କରୁଥିଲେ।
ରାଓଙ୍କ ଅଭିଯୋଗ ହେଉଛି, ସୈଦୁଲୁ ତାଙ୍କ ଅନୁପସ୍ଥିତିରେ ତାଙ୍କ ଘରକୁ ମଧ୍ୟ ଆସୁଥିଲେ। ଜୁଲାଇ ୨୭ ତାରିଖରେ ସନ୍ଦେହ ଆହୁରି ଘନୀଭୂତ ହେବା ପରେ ରାଓ ତାଙ୍କ ପତ୍ନୀଙ୍କ ଫୋନ ଯାଞ୍ଚ କରିଥିଲେ। ଏହି ସମୟରେ ସେ କିଛି ଏପରି ବାର୍ତ୍ତା ଦେଖିଥିବା ଦାବି କରିଛନ୍ତି, ଯେଉଁଥିରେ ତାଙ୍କୁ ରାସ୍ତାରୁ ହଟାଇବା ଅର୍ଥାତ୍ ହତ୍ୟା କରିବା ନେଇ ଯୋଜନା ବିଷୟରେ ଆଲୋଚନା ହୋଇଥିବା ସେ ଅଭିଯୋଗ କରିଛନ୍ତି।
ଅଭିଯୋଗରେ ରାଓ ଦାବି କରିଛନ୍ତି ଯେ, ଚାଟ୍ରେ ତାଙ୍କ ପତ୍ନୀ କହିଥିଲେ ଯେ ତାଙ୍କୁ ଘର ଭିତରେ ହତ୍ୟା କରାଯିବା ଉଚିତ୍ ନୁହେଁ, କାରଣ ଏହାଦ୍ୱାରା ପୋଲିସର ସନ୍ଦେହ ହୋଇପାରେ। ଏହା ବଦଳରେ ତାଙ୍କ ମୃତ୍ୟୁକୁ ଏକ ସଡ଼କ ଦୁର୍ଘଟଣା ଭାବେ ଦେଖାଇବାକୁ କଥା ହୋଇଥିବା ଅଭିଯୋଗ ହୋଇଛି।
ସୌଜନ୍ୟ ଧରିତ୍ରୀ
