Judgement: ୪୫୪ ଫାର୍ମାସି ଅଫିସରଙ୍କ ନିଯୁକ୍ତି ଉପରେ ରୋକ୍‌ ଲଗାଇଲେ ପଞ୍ଜାବ ହାଇକୋର୍ଟ

ପଞ୍ଜାବ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ଅଧୀନରେ ନିଯୁକ୍ତି ପାଇଁ ଜୁଲାଇ ୧୯ରେ ହୋଇଥିବା ଲିଖିତ ପରୀକ୍ଷାକୁ ବାତିଲ କରିବା ଦାବିରେ କେଶବ କମ୍ବୋଜ ଓ ଅନ୍ୟମାନେ ଦାଖଲ କରିଥିବା ଆବେଦନ ଉପରେ ଶୁଣାଣି କରି କୋର୍ଟ ଏହି ରୋକ୍ ଲଗାଇଛନ୍ତି। ଆବେଦନକାରୀ ଅଭିଯୋଗ କରିଥିଲେ ଯେ ଏକ ସଂଗଠିତ ଠକେଇ ଯୋଗୁ ପରୀକ୍ଷାର ନିରପେକ୍ଷତା ପ୍ରଭାବିତ ହୋଇଛି। ଏହି ମାମଲାରେ ପରବର୍ତ୍ତୀ ଶୁଣାଣି ସେପ୍ଟେମ୍ବର ୧୭ରେ ହେବ। ସେପର୍ଯ୍ୟନ୍ତ ୪୫୪ ଫାର୍ମାସି ଅଫିସରଙ୍କ ନିଯୁକ୍ତି ଉପରେ ରୋକ୍ ବଳବତ୍ତର ରହିବ। କୋର୍ଟଙ୍କ ଏହି ଆଦେଶକୁ ନେଇ ବିଜେପି ଗୁରୁବାର ଆମ୍ ଆଦମୀ ପାର୍ଟି (ଆପ୍)ର ସୁପ୍ରିମୋ ଅରବିନ୍ଦ କେଜ୍ରିୱାଲଙ୍କୁ ଟାର୍ଗେଟ୍ କରିଛି। ପଞ୍ଜାବ ସରକାରଙ୍କ ନିଯୁକ୍ତି ପ୍ରକ୍ରିୟା ଉପରେ କୋର୍ଟଙ୍କ ଆଦେଶ ଗମ୍ଭୀର ପ୍ରଶ୍ନ ଉଠାଇଛି ବୋଲି ଦଳ କହିଛି।