Judgement: ପିସିପିଏନ୍‌ଡିଟି ଆଇନ ଅଧୀନ ଅପରାଧର ତଦନ୍ତ କରିପାରିବ ନାହିଁ ପୁଲିସ: ସୁପ୍ରିମ୍‌କୋର୍ଟ

ଜଷ୍ଟିସ୍‌ ସଞ୍ଜୟ କାରୋଲ ଓ ଏନ୍‌. କୋଟୀଶ୍ୱର ସିଂହଙ୍କ ଖଣ୍ଡପୀଠ ଏହି ରାୟ ଦେଇଛନ୍ତି। ପିସିପିଏନ୍‌ଡିଟି ଆଇନ ଅଧୀନରେ ପୁଲିସର ମାମଲା ରୁଜୁ କରିବା ଓ ତଦନ୍ତ କରିବାର କ୍ଷମତା ସମ୍ପର୍କିତ ଏକ ମାମଲାର ଶୁଣାଣି କରି ଖଣ୍ଡପୀଠ ଏହି ସ୍ପଷ୍ଟୀକରଣ ଦେଇଛନ୍ତି। ଏହି ଆଇନର ମାମଲାଗୁଡ଼ିକ ବୈଷୟିକ ପ୍ରକୃତିର ହୋଇଥିବା ସହ ଏଥିରେ ଚିକିତ୍ସା ବିଜ୍ଞାନ ସମ୍ପର୍କିତ ଜ୍ଞାନ ଓ ସମ୍ବେଦନଶୀଳତା ଆବଶ୍ୟକ ବୋଲି କୋର୍ଟ କହିଛନ୍ତି।

ଖଣ୍ଡପୀଠ କହିଛନ୍ତି, ପିସିପିଏନ୍‌ଡିଟି ଆଇନର ଉଦ୍ଦେଶ୍ୟ ହେଉଛି ଗର୍ଭସ୍ଥ ଶିଶୁର ଲିଙ୍ଗ ନିର୍ଣ୍ଣୟ ପାଇଁ ଗର୍ଭପୂର୍ବ ନିଦାନ ପ୍ରଣାଳୀର ବ୍ୟବହାରକୁ ନିଷେଧ କରିବା। ଏହା ଏକ ବିଶେଷ ଆଇନ ହୋଇଥିବାରୁ ଏଥିରେ ଥିବା ବ୍ୟବସ୍ଥା ଅନୁସାରେ ନିର୍ଦ୍ଦିଷ୍ଟ କର୍ତ୍ତୃପକ୍ଷ ହିଁ ତଦନ୍ତ ଓ ଆଇନଗତ କାର୍ଯ୍ୟାନୁଷ୍ଠାନ ନେବେ। ପୁଲିସ ଏହି ଆଇନ ଅଧୀନ ଅପରାଧର ମୁଖ୍ୟ ତଦନ୍ତକାରୀ ଭାବେ କାମ କରିପାରିବ ନାହିଁ। ଆଇନର ବ୍ୟବସ୍ଥା ଅନୁସାରେ ପୁଲିସର ଭୂମିକା ସହାୟକ ଭାବେ ସୀମିତ ରହିବ ବୋଲି କୋର୍ଟ କହିଛନ୍ତି।