Foreign rescue team: ବିଦେଶୀ ଉଦ୍ଧାରକାରୀ ଦଳ ପ୍ରତ୍ୟାଖ୍ୟାନକୁ ନେଇ ଅଡ଼ୁଆ: ଏନ୍‌ଡିଆର୍‌ଏଫ୍ ପଠାଇବାକୁ ଭାରତର ସ୍ୱତନ୍ତ୍ର ପ୍ରସ୍ତାବ

କାଠମାଣ୍ଡୁ: ନେପାଳ ଦ୍ୱାରା ବିଦେଶୀ ଉଦ୍ଧାରକାରୀ ଦଳକୁ ପ୍ରତ୍ୟାଖ୍ୟାନ କରାଯିବା ଚର୍ଚ୍ଚା ମଧ୍ୟରେ ଭାରତୀୟ ବୈଦେଶିକ ବ୍ୟାପାର ମନ୍ତ୍ରଣାଳୟ  ଶୁକ୍ରବାର ଏକ ସ୍ପଷ୍ଟୀକରଣ ଜାରି କରିଛି। ପ୍ରଳୟଙ୍କରୀ ବନ୍ୟାରେ ଏ ପର୍ଯ୍ୟନ୍ତ  ପ୍ରାୟ ୬୦୦ ଲୋକଙ୍କ ମୃତ୍ୟୁ ଘଟିଥିବା ବେଳେ ଭାରତ ସରକାର ନିଜର ଜାତୀୟ ବିପର୍ଯ୍ୟୟ ପ୍ରଶମନ ବାହିନୀ (ଏନ୍‌ଡିଆର୍‌ଏଫ୍‌)ର ସ୍ୱତନ୍ତ୍ର ଟିମ୍ ଏବଂ ଆନୁଷଙ୍ଗିକ ଯନ୍ତ୍ରପାତି ପଠାଇବା ପାଇଁ ନେପାଳ କର୍ତ୍ତୃପକ୍ଷଙ୍କୁ ପ୍ରସ୍ତାବ ଦେଇଛନ୍ତି। ବୈଦେଶିକ ମନ୍ତ୍ରଣାଳୟର ମୁଖପାତ୍ର ରଣଧୀର ଜୈସୱାଲ କହିଛନ୍ତି ଯେ ନିଖୋଜ ଥିବା ନିଜ ନାଗରିକମାନଙ୍କୁ ଚିହ୍ନଟ କରିବା ଏବଂ ସେମାନଙ୍କ ସହ ସମ୍ପର୍କ ସ୍ଥାପନ କରିବା ଭାରତର ସର୍ବୋଚ୍ଚ ପ୍ରାଥମିକତା ଅଟେ। ବର୍ତ୍ତମାନ ସୁଦ୍ଧା ୩୨୦ ଜଣ ଭାରତୀୟ ଏବଂ ୧୦୦ ଜଣ ଭାରତୀୟ ବଂଶୋଦ୍ଭବଙ୍କ ସହ କୌଣସି ଯୋଗାଯୋଗ ହୋଇପାରି ନାହିଁ।  ୨୦୧୫ ମସିହାର ନେପାଳ ମହାଭୂକମ୍ପ ସମୟରେ ବିଦେଶୀ ସେନା ଯୋଗୁଁ ସୃଷ୍ଟି ହୋଇଥିବା ପରିଚାଳନାଗତ ଜଟିଳତାକୁ ଦୃଷ୍ଟିରେ ରଖି ବାଲେନ ଶାହ ଏହି ନିଷ୍ପତ୍ତି ନେଇଥାଇପାରନ୍ତି ବୋଲି ‘ଦି କାଠମାଣ୍ଡୁ ପୋଷ୍ଟ’ ରିପୋର୍ଟ ପ୍ରକାଶ କରିଛି।

ନିଖୋଜ ନାଗରିକଙ୍କୁ ଠାବ କରିବା ସର୍ବୋଚ୍ଚ ପ୍ରାଥମିକତା

ଏହି ପ୍ରତିକୂଳ ପରିସ୍ଥିତି ସତ୍ତ୍ୱେ ଭାରତ ପକ୍ଷରୁ ନେପାଳକୁ ଏକ ସ୍ୱତନ୍ତ୍ର ସୁଡ଼ଙ୍ଗ ଉଦ୍ଧାରକାରୀ ଦଳ  ଏବଂ ଏକ ମୋବାଇଲ ମେଡିକାଲ  ପଠାଯାଉଛି।  ସେମାନେ  ଗତ ଦୁଇ ଦିନ ଧରି ଟ୍ରିଶୂଳୀ-୩ଏ ଜଳବିଦ୍ୟୁତ ପ୍ରକଳ୍ପ ସୁଡ଼ଙ୍ଗ ଭିତରେ ଅତ୍ୟନ୍ତ ସଙ୍କଟାପନ୍ନ ଅବସ୍ଥାରେ ଫସି ରହିଥିବା ପ୍ରାୟ ୧୦୦ ଜଣ ଶ୍ରମିକଙ୍କୁ ଉଦ୍ଧାର କରିବା ପାଇଁ ଯୁଦ୍ଧକାଳୀନ ଭିତ୍ତିରେ କାର୍ଯ୍ୟ କରିବେ। ବିଦେଶ ମନ୍ତ୍ରୀ ଏସ୍‌ ଜୟଶଙ୍କର ଶୁକ୍ରବାର ନେପାଳ ବିଦେଶ  ମନ୍ତ୍ରୀଙ୍କ ସହ ଟେଲିଫୋନରେ ଆଲୋଚନା କରି ଭାରତ ପକ୍ଷରୁ ସମସ୍ତ   ସହାୟତାର ପ୍ରତିଶ୍ରୁତି ଦେଇଛନ୍ତି। ନେପାଳ ପ୍ରଶାସନର ଅନୁରୋଧକ୍ରମେ ଧୋଇଯାଇଥିବା ରାସ୍ତା ଓ ସେତୁଗୁଡ଼ିକୁ ପୁନଃକାର୍ଯ୍ୟକ୍ଷମ କରିବା ପାଇଁ ଭାରତ ପକ୍ଷରୁ ତୁରନ୍ତ ପୋର୍ଟେବଲ୍ ‘ବେଲି ବ୍ରିଜ୍’ ପଠାଯାଇଛି। ନେପାଳ ସେନାର ପ୍ରଶଂସନୀୟ ଉଦ୍ୟମ ଯୋଗୁଁ ଏପର୍ଯ୍ୟନ୍ତ ବିଭିନ୍ନ ଦୁର୍ଗମ ସ୍ଥାନରୁ ପ୍ରାୟ ୮୫ ଜଣ ଭାରତୀୟଙ୍କୁ ସୁରକ୍ଷିତ ଉଦ୍ଧାର କରାଯାଇଛି।  ଯେଉଁଥିରେ ତାମିଲନାଡୁର ୨୧ ଜଣ ପର୍ଯ୍ୟଟକ ସାମିଲ ଅଛନ୍ତି ଏବଂ ସେମାନେ ଶୁକ୍ରବାର ଅପରାହ୍ନରେ ନୂଆଦିଲ୍ଲୀ ବିମାନବନ୍ଦରରେ ଅବତରଣ କରିଛନ୍ତି।

ସୌଜନ୍ୟ ସମ୍ବାଦ