ନୂଆଦିଲ୍ଲୀ: କକ୍ରୋଚ୍ ଜନତା ପାର୍ଟି (ସିଜେପି) ନେତା ଅଭିଜିତ୍ ଦୀପକେ ଆଜି ଏକ ସାମ୍ବାଦିକ ସମ୍ମିଳନୀରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଓ ଗୃହମନ୍ତ୍ରୀ ଅମିତ ଶାହଙ୍କୁ କଡ଼ା ସମାଲୋଚନା କରିଛନ୍ତି। ମୁଖ୍ୟ ନିର୍ବାଚନ କମିସନର ଜ୍ଞାନେଶ କୁମାରଙ୍କୁ ସୁରକ୍ଷା ଦେବା ପାଇଁ ପ୍ରଧାନମନ୍ତ୍ରୀ ସରକାରୀ ସମ୍ବଳ ଓ କଳର ବ୍ୟବହାର କରୁଥିବା ସେ ଅଭିଯୋଗ କରିଛନ୍ତି। ଜ୍ଞାନେଶ କୁମାରଙ୍କ ଇସ୍ତଫା ଦାବି କରିବାରୁ ଆନ୍ଦୋଳନକାରୀ ଓ ବିରୋଧୀ ଦଳ ନେତାଙ୍କୁ ଟାର୍ଗେଟ୍ କରାଯାଉଥିବା ସେ କହିଛନ୍ତି।
ଏଆଇଏସ୍ଏ (ଅଲ୍ ଇଣ୍ଡିଆ ଷ୍ଟୁଡେଣ୍ଟ୍ସ ଆସୋସିଏସନ୍) କାର୍ଯ୍ୟକର୍ତ୍ତା ନେହା ବୋରା ଓ ଅଭିନେତା ପ୍ରକାଶ ରାଜଙ୍କ ସହ ସାମ୍ବାଦିକ ସମ୍ମିଳନୀରେ ଯୋଗ ଦେଇ ଦୀପକେ ଆନ୍ଦୋଳନକାରୀ ଓ ବିରୋଧୀ ନେତାଙ୍କୁ ଅଟକ ରଖାଯିବା ନେଇ ପ୍ରଶ୍ନ ଉଠାଇଛନ୍ତି। ସିଜେପି ନେତା ସୌରଭ ଦାସ ଓ ଆଶୁତୋଷ ରାଙ୍କା ଗିରଫ ହୋଇ ନ୍ୟାୟିକ ହାଜତକୁ ଯିବା ପରେ ଦୀପକେ ଏହି ସାମ୍ବାଦିକ ସମ୍ମିଳନୀ କରିଛନ୍ତି। ଦୀପକେ କହିଛନ୍ତି, ଦିଲ୍ଲୀର ଯୁବଗୋଷ୍ଠୀ ଓ ବିଭିନ୍ନ ସଂଗଠନର ସଦସ୍ୟମାନେ ଏବେ ରାସ୍ତାରେ ଲଢ଼ୁଛନ୍ତି। ସେମାନଙ୍କୁ ରାସ୍ତାରେ ଘୋଷାଡ଼ି ନିଆଯାଉଛି। ନେହା, ଆୟେଶା, ବିଲାଜ୍ ଓ ଈଶାଙ୍କୁ ମଧ୍ୟ ଘୋଷାଡ଼ି ନିଆଯାଇଛି। କେବଳ ଜ୍ଞାନେଶ କୁମାରଙ୍କୁ ସୁରକ୍ଷା ଦେବା ପାଇଁ ଏସବୁ କରାଯାଉଛି କି ବୋଲି ସେ ପ୍ରଶ୍ନ କରିଛନ୍ତି। ସରକାର ନିଜ ନାଗରିକଙ୍କ ବିରୋଧରେ ଯୁଦ୍ଧ ଆରମ୍ଭ କରିଛନ୍ତି ବୋଲି ସେ ଅଭିଯୋଗ କରିଛନ୍ତି।
କେନ୍ଦ୍ର ସରକାର ଦିଲ୍ଲୀକୁ ‘ଭାରତ-ପାକିସ୍ତାନ ସୀମା’ରେ ପରିଣତ କରି ଦେଇଛନ୍ତି
ମୁଖ୍ୟ ନିର୍ବାଚନ କମିସନରଙ୍କୁ ସୁରକ୍ଷା ଦେବା ପାଇଁ କେନ୍ଦ୍ର ସରକାର ଦିଲ୍ଲୀକୁ ‘ଭାରତ-ପାକିସ୍ତାନ ସୀମା’ରେ ପରିଣତ କରିଦେଇଥିବା ଦୀପକେ କହିଛନ୍ତି। ଇସ୍ତଫା ଦାବିରେ ଆନ୍ଦୋଳନ ପୂର୍ବରୁ ରେଳ ଓ ମେଟ୍ରୋ ସେବା ପ୍ରଭାବିତ ହୋଇଥିବା ସହ ବହୁ ସଂଖ୍ୟାରେ ସୁରକ୍ଷାକର୍ମୀ ମୁତୟନ ହୋଇଥିବା ସେ ଉଲ୍ଲେଖ କରିଛନ୍ତି। ଛାତ୍ର ସଂଗଠନର ସଦସ୍ୟ, ବିରୋଧୀ ନେତା ଓ ପୂର୍ବତନ ମୁଖ୍ୟମନ୍ତ୍ରୀଙ୍କୁ ରାସ୍ତାରେ ଘୋଷାଡ଼ି ନିଆଯାଇଥିବା ମଧ୍ୟ ସେ ଅଭିଯୋଗ କରିଛନ୍ତି। ଏପରିକି ତ୍ରିରଙ୍ଗା ଉଡ଼ାଇବାକୁ ମଧ୍ୟ ଆଇନର ଉଲ୍ଲଂଘନ ବୋଲି କୁହାଯାଉଛି। ଜ୍ଞାନେଶ କୁମାର ପ୍ରଧାନମନ୍ତ୍ରୀଙ୍କୁ ଏପରି କ’ଣ ଦେଇଛନ୍ତି ଯେ ତାଙ୍କୁ ସୁରକ୍ଷା ଦେବା ପାଇଁ ଏତେ ପଦକ୍ଷେପ ନିଆଯାଉଛି ବୋଲି ଦୀପକେ ପ୍ରଶ୍ନ କରିଛନ୍ତି।
ସୌଜନ୍ୟ ସମ୍ବାଦ
