Congress: ସରକାରଙ୍କ ଚାପରୁ ମୁକ୍ତ ହେଉ ନ୍ୟାୟପାଳିକା: ପୂର୍ବତନ ସୁପ୍ରିମକୋର୍ଟ ବିଚାରପତିଙ୍କ ପୁସ୍ତକ ଉଦ୍ଧୃତ କରି ମୋଦୀ ସରକାରଙ୍କୁ ଘେରିଲା କଂଗ୍ରେସ

ନୂଆଦିଲ୍ଲୀ: ପୂର୍ବତନ ସୁପ୍ରିମକୋର୍ଟ ବିଚାରପତି ଜଷ୍ଟିସ୍ ସଞ୍ଜୟ କିଶନ କୌଲଙ୍କ ଆଗାମୀ ପୁସ୍ତକ ‘ୱିଦାଉଟ୍ ଫିଅର୍ ଅର୍ ଫେଭର୍‌’ର କିଛି ଅଂଶ ଉଦ୍ଧୃତ କରି କଂଗ୍ରେସ ରବିବାର ମୋଦୀ ସରକାରଙ୍କ ଉପରେ ତୀବ୍ର ଆକ୍ରମଣ କରିଛି। କଂଗ୍ରେସ କହିଛି ଯେ, ନ୍ୟାୟିକ ନିଯୁକ୍ତିରେ ସରକାରଙ୍କ ହସ୍ତକ୍ଷେପ ଓ ମାମଲା ବଣ୍ଟନରେ ହସ୍ତକ୍ଷେପର ଦାବି ନ୍ୟାୟପାଳିକାର ସ୍ୱାଧୀନତା ଉପରେ ଗମ୍ଭୀର ପ୍ରଶ୍ନ ଉଠାଇଥାଏ। କଂଗ୍ରେସ କହିଛି ଯେ, ସମ୍ବିଧାନକୁ ସୁରକ୍ଷା ଦେବା ପାଇଁ ଦାୟିତ୍ୱରେ ଥିବା ସଂସ୍ଥା କ୍ଷମତାରେ ଥିବା ଲୋକଙ୍କ ଚାପରୁ ସମ୍ପୂର୍ଣ୍ଣ ମୁକ୍ତ ରହିବା ଉଚିତ।

କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ ଏକ ଗଣମାଧ୍ୟମ ରିପୋର୍ଟ ଉଦ୍ଧୃତ କରି କହିଛନ୍ତି, ଭାରତର ପୂର୍ବତନ ମୁଖ୍ୟ ବିଚାରପତି ଡିୱାଇ ଚନ୍ଦ୍ରଚୂଡ଼ ନ୍ୟାୟିକ ନିଯୁକ୍ତି କ୍ଷେତ୍ରରେ ସରକାରଙ୍କ ପ୍ରତି ଅତ୍ୟଧିକ ସମ୍ମାନଜନକ ଥିଲେ। ‘ଏକ୍ସ’ରେ ଏକ ପୋଷ୍ଟ କରି ରମେଶ କହିଛନ୍ତି ଯେ, ପୂର୍ବତନ ସୁପ୍ରିମକୋର୍ଟ ବିଚାରପତି ଜଷ୍ଟିସ୍ ସଞ୍ଜୟ କିଶନ କୌଲଙ୍କ ଏକ ପୁସ୍ତକ ମୋଦୀ ସରକାରଙ୍କ କାର୍ଯ୍ୟକାଳରେ ନ୍ୟାୟପାଳିକାର ସ୍ୱାଧୀନତା ଉପରେ ଗମ୍ଭୀର ପ୍ରଶ୍ନ ଉଠାଇଛି।
ରମେଶ କହିଛନ୍ତି ଯେ, ଜଷ୍ଟିସ କୌଲ ଅନେକ ଚିନ୍ତାଜନକ ଘଟଣା ଉପରେ ଆଲୋକପାତ କରିଛନ୍ତି, ଯେଉଁଥିରେ ନ୍ୟାୟିକ ନିଯୁକ୍ତିରେ ସରକାରଙ୍କ ହସ୍ତକ୍ଷେପ, କଲେଜିୟମ ବୈଠକ ପୂର୍ବରୁ ସରକାରୀ ଅନୁମୋଦନ ହାସଲ କରିବାର ପ୍ରୟାସ ଓ ସଂଖ୍ୟାଲଘୁ ସମ୍ପ୍ରଦାୟର ବିଚାରପତିଙ୍କ ଜାତି ବିଷୟରେ ସରକାରଙ୍କ ପ୍ରଶ୍ନ ସାମିଲ ଅଛି। ପୂର୍ବରୁ ଅନେକ ଲୋକ ଖୋଲାଖୋଲି ଆଲୋଚନା କରିବାକୁ ସଂକୋଚ କରୁଥିବା ବିଷୟଗୁଡ଼ିକୁ ଜଷ୍ଟିସ୍ କୌଲ ମାପଚୁପ ଓ ସୁଚିନ୍ତିତ ଭାଷାରେ ଲିପିବଦ୍ଧ କରିଛନ୍ତି।

ରମେଶ କହିଛନ୍ତି ଯେ, ଜଷ୍ଟିସ୍ କୌଲଙ୍କ ପୁସ୍ତକ ମୋଦୀ ସରକାରଙ୍କ ଅଧୀନରେ ନ୍ୟାୟପାଳିକାର ସ୍ୱାଧୀନତା ଉପରେ ଗମ୍ଭୀର ପ୍ରଶ୍ନ ଉଠାଇଛି। ଗୋଟିଏ ମାମଲା ଜଷ୍ଟିସ କୌଲଙ୍କ ବିନା ପରାମର୍ଶ‌ରେ ଅନ୍ୟ ଖଣ୍ଡପୀଠକୁ ହସ୍ତାନ୍ତର କରିଦେଇଥିଲେ। ରମେଶ କହିଛନ୍ତି ଯେ, ଏହି ଘଟଣା ସୁପ୍ରିମକୋର୍ଟର ଦୈନନ୍ଦିନ କାର୍ଯ୍ୟରେ କେତେଦୂର ପର୍ଯ୍ୟନ୍ତ ସରକାରୀ ହସ୍ତକ୍ଷେପ ରହିଛି ତାହା ଦର୍ଶାଉଛି। ଏହାଦ୍ବାରା ଗଣତନ୍ତ୍ର ଦୁର୍ବଳ ହେଉଛି ବୋଲି କଂଗ୍ରେସ ନେତା ଦର୍ଶାଇଛନ୍ତି।

ସୌଜନ୍ୟ ସମ୍ବାଦ