Saudi Arabia: ସାଉଦି ଆରବ ଉପରେ ଆକ୍ରମଣ ଜାରି; ବନ୍ଦ ପାଇଁ ହୁତିଙ୍କୁ ମିଳିଲା ୯,୫୨୧ କୋଟିର ଅଫର

ରିୟାଦ: ଇରାନ ସମର୍ଥିତ ହୁତି ବିଦ୍ରୋହୀମାନେ ସାଉଦି ଆରବ ଉପରେ ଲଗାତାର ଆକ୍ରମଣ କରୁଛନ୍ତି। ଏହି ଆକ୍ରମଣକୁ ରୋକିବାରେ ସାଉଦି ଆରବର ବାୟୁ ପ୍ରତିରକ୍ଷା ବ୍ୟବସ୍ଥା ପ୍ରଭାବହୀନ ପ୍ରମାଣିତ ହୋଇଛି। ବର୍ତ୍ତମାନ ଯୁଦ୍ଧକ୍ଷେତ୍ରରେ ସାଉଦି ପଛୁଆ ଥିବା ପରି ମନେ ହେଉଛି। ଇସ୍ରାଏଲୀ ଗଣମାଧ୍ୟମ ଅନୁଯାୟୀ, ଆକ୍ରମଣ ବନ୍ଦ କରିବା ପାଇଁ ସାଉଦି ହୁତିଙ୍କୁ ପର୍ଯ୍ୟାପ୍ତ ପରିମାଣର ଅର୍ଥ ପ୍ରଦାନ କରିବାକୁ ଏକ ଲୋଭନୀୟ ଅଫର୍ ଦେଇଛି।

ଇସ୍ରାଏଲୀ ଗଣମାଧ୍ୟମ ରିପୋର୍ଟ ଅନୁଯାୟୀ, ସାଉଦି ଆରବ ହାଉଥିମାନଙ୍କୁ ୧ ବିଲିୟନ ଆମେରିକୀୟ ଡଲାରର ଅଫର୍ ପ୍ରଦାନ କରିଛି। ଯାହାକି ଭାରତୀୟ ମୁଦ୍ରାରେ ପ୍ରାୟ ୯,୫୨୧ କୋଟି ଟଙ୍କା ହେବ। ଏହି ପ୍ରସ୍ତାବ ଇରାନ ମଧ୍ୟସ୍ଥତାରେ ହୋଇଥିବା ଏକ ଚୁକ୍ତିର ଅଂଶ ଯାହାର ଉଦ୍ଦେଶ୍ୟ ହେଉଛି ଅସ୍ତ୍ରବିରତି କାର୍ଯ୍ୟକାରୀ କରିବା ଏବଂ ସାଉଦି ଆରବ ଉପରେ ଆକ୍ରମଣ ବନ୍ଦ କରିବା। ସାଉଦି ପ୍ରତିରକ୍ଷା ମନ୍ତ୍ରୀ ପ୍ରିନ୍ସ ଖାଲିଦ ବିନ୍ ସଲମାନ ହୁତିଙ୍କ ସହିତ ଅସ୍ତ୍ରବିରତି ଆଲୋଚନା ପାଇଁ ତେହେରାନ ଯାତ୍ରା କରିଥିଲେ। ଏହି ପ୍ରସ୍ତାବିତ ଚୁକ୍ତି ଅନୁଯାୟୀ, ଇରାନ ମାଧ୍ୟମରେ ହୁତିମାନଙ୍କୁ ୧ ବିଲିୟନ ଆମେରିକୀୟ ଡଲାର ପ୍ରଦାନ କରାଯିବ।

ଏକ କୂଟନୈତିକ ସୂତ୍ର ଦାବି କରିଛି ଯେ, ସାଉଦି ମନ୍ତ୍ରୀ ହର୍କୁଲେସ୍ ସାମରିକ ପରିବହନ ବିମାନରେ ତାଙ୍କ ସହିତ ଟଙ୍କା ନେଇ ତେହେରାନ ଯାଇଥିଲେ। ତେବେ ରିପୋର୍ଟ ଅନୁସାରେ, କୌଣସି ସାଉଦି ଅଧିକାରୀ ଟଙ୍କା ହସ୍ତାନ୍ତର ହୋଇଥିବା ନିଶ୍ଚିତ କରିନାହାନ୍ତି। ତୁର୍କୀ ଗୁଇନ୍ଦା ମୁଖ୍ୟ ଇବ୍ରାହିମ୍ କାଲିନ୍ ଏବଂ ପାକିସ୍ତାନର ସେନା ମୁଖ୍ୟ ଫିଲ୍ଡ ମାର୍ଶାଲ୍ ଅସୀମ ମୁନିର ଏହି ଆଲୋଚନାରେ ସାମିଲ ହୋଇଥିବା ଜଣାପଡ଼ିଛି। ରାଷ୍ଟ୍ରପତି ମାସୁଦ ପେଜେଶକିୟାନ୍, ସର୍ବୋଚ୍ଚ ଜାତୀୟ ସୁରକ୍ଷା ପରିଷଦର ସେକ୍ରେଟାରୀ ଜେନେରାଲ ମୋହସେନ୍ ରେଜାଏଇ ଏବଂ ଇସଲାମିକ୍ ରିଭଲ୍ୟୁସନରୀ ଗାର୍ଡ କର୍ପସର ବରିଷ୍ଠ ଅଧିକାରୀମାନଙ୍କ ସମେତ ଇରାନୀ ଅଧିକାରୀମାନେ ମଧ୍ୟ ଉପସ୍ଥିତ ଥିଲେ।

ରିପୋର୍ଟ ଅନୁଯାୟୀ,ସାଉଦି ବିମାନବନ୍ଦର ଏବଂ ତୈଳ ଡିପୋ ଉପରେ ବଢୁଥିବା ଆକ୍ରମଣ ମଧ୍ୟରେ ଇରାନ ସାଉଦି ଆରବ ଏବଂ ହୁତିଙ୍କ ମଧ୍ୟରେ ମଧ୍ୟସ୍ଥତା କରିବାକୁ ପ୍ରସ୍ତାବ ଦେଇଥିଲା। ଏହି ଆକ୍ରମଣ ଯୋଗୁଁ ସାଉଦି ଆରବର ଯଥେଷ୍ଟ ଆର୍ଥିକ କ୍ଷତି ଘଟିଛି। ହର୍ମୁଜ୍ ପ୍ରଣାଳୀରେ ଟ୍ୟାଙ୍କର ଉପରେ ଇରାନୀ ଆକ୍ରମଣ ମଧ୍ୟ ଉପସାଗରୀୟ ଅଞ୍ଚଳରୁ ତୈଳ ରପ୍ତାନିକୁ ବାଧା ଦେଇଛି।

ସାଉଦି ବିଦେଶ ମନ୍ତ୍ରଣାଳୟ ଏକ ସରକାରୀ ବିବୃତିରେ ଏହି ଗସ୍ତ ବିଷୟରେ କହିଛି, ପ୍ରତିରକ୍ଷା ମନ୍ତ୍ରୀ ପ୍ରିନ୍ସ ଖାଲିଦ ବିନ୍ ସଲମାନ ଏବଂ ମକ୍କା ମିଳିତ ପ୍ରତିରକ୍ଷା ମେଣ୍ଟର ସଦସ୍ୟ ଦେଶଗୁଡ଼ିକର ପ୍ରତିନିଧିଙ୍କ ତେହେରାନ ଗସ୍ତ ହେଉଛି ମେଣ୍ଟର ପ୍ରୟାସର ଏକ ଅଂଶ। ଯାହାର ଲକ୍ଷ୍ୟ ହେଉଛି ବର୍ତ୍ତମାନର ସଙ୍କଟରେ ସାମିଲ ପକ୍ଷମାନଙ୍କ ମଧ୍ୟରେ ଉତ୍ତେଜନା ହ୍ରାସ କରିବା, ଆଲୋଚନା ଏବଂ କୂଟନୈତିକ ସମାଧାନକୁ ପ୍ରୋତ୍ସାହିତ କରିବା ଏବଂ କତାର ତଥା ପାକିସ୍ତାନ ଦ୍ୱାରା କରାଯାଉଥିବା ମଧ୍ୟସ୍ଥତା ପ୍ରୟାସକୁ ସମର୍ଥନ କରିବା।

ଇସ୍ରାଏଲୀ ଗଣମାଧ୍ୟମ ସହିତ କଥାବାର୍ତ୍ତା ସମୟରେ, ଜଣେ ସାଉଦି ଅଧିକାରୀ ଆର୍ଥିକ କାରବାରର ରିପୋର୍ଟକୁ ନିଶ୍ଚିତ କରିନଥିଲେ ମଧ୍ୟ ହୁତିଙ୍କ ସହିତ ବିବାଦର ଏକ ଅଂଶ ତିନି ବର୍ଷ ପୂର୍ବେ ହୋଇଥିବା ଚୁକ୍ତିନାମା କାର୍ଯ୍ୟକାରୀ କରିବା ସହିତ ଜଡିତ ବୋଲି ସୂଚନା ପ୍ରଦାନ କରିଥିଲେ। ଏହି ଚୁକ୍ତିନାମା ଅନୁଯାୟୀ, ସାଉଦି ଆରବ ହୁତିଙ୍କୁ ପ୍ରତ୍ୟକ୍ଷ ଆର୍ଥିକ ସହାୟତା ପ୍ରଦାନ କରିବାର ଥିଲା ଯାହା ଦ୍ୱାରା ବିବାଦର ସମାଧାନ ପାଇଁ ପ୍ରୟାସ ଆଗକୁ ବଢିବ। ଏହି ପାଣ୍ଠିର ଏକ ଅଂଶ ସରକାରୀ କର୍ମଚାରୀଙ୍କ ଦରମା ପ୍ରଦାନ କରିବା ଏବଂ ହୁତି ନିୟନ୍ତ୍ରିତ ଅଞ୍ଚଳରେ ବେସାମରିକ ଭିତ୍ତିଭୂମି ପୁନଃନିର୍ମାଣ କରିବା ଥିଲା।

ରିପୋର୍ଟ ଅନୁଯାୟୀ, ପ୍ରତିବଦଳରେ ହୁତିମାନେ ଅସ୍ତ୍ରବିରତି ପାଳନ କରିବେ ଏବଂ ସାଉଦି ଆରବ ଉପରେ ଆକ୍ରମଣ ବନ୍ଦ କରିବେ। ସାମ୍ପ୍ରତିକ ମାସଗୁଡ଼ିକରେ ହୁତିମାନେ ସାଉଦି ଆରବ ପୂର୍ବ ଚୁକ୍ତିନାମାରୁ ଓହରିଯାଇଛି ବୋଲି ଦାବି କରି ସେମାନଙ୍କର ଆକ୍ରମଣ ଆରମ୍ଭ କରିଥିଲେ। ଇସ୍ରାଏଲୀ ଗଣମାଧ୍ୟମ ଏହା ମଧ୍ୟ ରିପୋର୍ଟ କରିଛି ଯେ, ସାଉଦି ଆରବ ସାମରିକ ବ୍ଲାକମେଲ୍ ଚାପରେ ନୂତନ ଅସ୍ତ୍ରବିରତି ଗ୍ରହଣ କରିବ ନାହିଁ ବୋଲି ଆଭିମୁଖ୍ୟ ବଜାୟ ରଖିଛି। ଏହା ସହିତ ହୁତିମାନେ ୟେମେନର ଆନ୍ତର୍ଜାତୀୟ ସ୍ତରରେ ସ୍ୱୀକୃତିପ୍ରାପ୍ତ ସରକାରଙ୍କଠାରୁ ଦଖଲ କରାଯାଇଥିବା ଅଞ୍ଚଳ ଫେରାଇ ନଦେବା ପର୍ଯ୍ୟନ୍ତ ସେମାନଙ୍କୁ ପାଣ୍ଠି ଯୋଗାଇବାକୁ ସାଉଦି ଆରବ ବିରୋଧ କରିଛି।

ସୌଜନ୍ୟ ସମ୍ବାଦ