Explosion: ପେଟ୍ରୋଲ୍‌ ପମ୍ପରେ ବିସ୍ଫୋରଣ: ଢାଙ୍କୁଣି ଉଡ଼ି ମୁଣ୍ଡରେ ବାଜିଲା, ଜଣେ ମୃତ

ନୀଳଗିରି: ବାଲେଶ୍ବର ଜିଲ୍ଲା ନୀଳଗିରି ଏନ୍‌ଏସି ଅଧୀନ ୭ ନମ୍ବର ୱାର୍ଡ ବାଳିଗୋହିରିସ୍ଥିତ ସତ୍ୟସାଇ ଫିଲିଂ ଷ୍ଟେସନ୍‌ (ପେଟ୍ରୋଲ୍‌ ପମ୍ପ)ରେ ଭୟଙ୍କର ବିସ୍ଫୋରଣ ଘଟି ଜଣଙ୍କର ମୃତ୍ୟୁ ହୋଇଛି। ଏକ ପୁରୁଣା ଟାଙ୍କିକୁ ସ୍କ୍ରାପ୍‌ ପାଇଁ ଗ୍ୟାସ୍‌ କଟର୍‌ରେ କାଟିବାବେଳେ ଏହି ଅଘଟଣ ଘଟିଛି। ଏହାକୁ ନେଇ ଘଟଣାସ୍ଥଳରେ ତୀବ୍ର ଉତ୍ତେଜନା ପ୍ରକାଶ ପାଇଛି। କ୍ଷତିପୂରଣ ଦାବିରେ ଲୋକେ ରାଜପଥ ଅବରୋଧ କରିଛନ୍ତି। ମୃତକଙ୍କ ପରିବାରକୁ ୧୫ ଲକ୍ଷ ଟଙ୍କା ସହାୟତା ପ୍ରଦାନ ପରେ ପରିସ୍ଥିତି ଶାନ୍ତ ପଡ଼ିଛି।

ସୂଚନାଯୋଗ୍ୟ, ନୀଳଗିରି-ଶେରଗଡ଼ ମୁଖ୍ୟରାସ୍ତାକଡ଼ରେ ଦୀପ୍ତିକାନ୍ତ ମହାପାତ୍ରଙ୍କର ଏକ ପେଟ୍ରୋଲ୍‌ ପମ୍ପ ରହିଛି। ଏଠାରେ ଏକ ପୁରୁଣା ଟାଙ୍କିକୁ ସ୍କ୍ରାପ୍‌ ଭା‌ବେ ବିକ୍ରି ପାଇଁ ଆଜି ପୂର୍ବାହ୍ଣ ୯ଟା ସମୟରେ କଟକସ୍ଥିତ ଏକ ସଂସ୍ଥାର ୩ ଜଣ କର୍ମଚାରୀ ଗ୍ୟାସ୍‌ କଟର୍‌ରେ କାଟୁଥିଲେ। ଯେହେତୁ ପୂର୍ବରୁ ଏଥିରେ ଇନ୍ଧନ ରହିଥିଲା, ତେଣୁ କାଟିବା ସମୟରେ ଆବଶ୍ୟକ ସତର୍କତାମୂଳକ ପଦକ୍ଷେପ ଗ୍ରହଣ କରାଯିବାର ଥିଲା। ସେମାନେ ଟାଙ୍କିର ଗୋଟିଏ ମୁଣ୍ଡକୁ କାଟିବାବେଳେ ଗ୍ୟାସ୍‌ କଟରର ନିଆଁଝୁଲ ଭିତରକୁ ଯିବାରୁ ଟାଙ୍କିର ଅପରପାର୍ଶ୍ବରେ ବିସ୍ଫୋରଣ ହୋଇଥିଲା। ବିସ୍ଫୋରଣ ଏତେ ଶକ୍ତିଶାଳୀ ଥିଲା ‌ଯେ ଟାଙ୍କିର ଢାଙ୍କୁଣି ଉଡ଼ିଯାଇ କିଛିଦୂରରେ କାମ କରୁଥିବା ପେଟ୍ରୋଲ ପମ୍ପ କର୍ମଚାରୀ ରେମୁଣା ବ୍ଲକ୍‌ ଅଧୀନ ବିମୁରିଆ ଗ୍ରାମର ବୀରେନ୍ଦ୍ର ସିଂହ (୬୨)ଙ୍କ ମୁଣ୍ଡରେ ବାଜିଥିଲା। ‌ଫଳରେ ଘଟଣାସ୍ଥଳରେ ସେ ପ୍ରାଣ ହରାଇଥିଲେ। ବିସ୍ଫୋରଣ ଶବ୍ଦରେ ନିକଟସ୍ଥ ଏକ ଗାଡ଼ି ସୋ-ରୁମ୍‌ ଓ ହରମୋହନ ମହାପାତ୍ରଙ୍କ ଘର ଆଂଶିକ କ୍ଷତିଗ୍ରସ୍ତ ହୋଇଥିଲା।