ନୂଆଦିଲ୍ଲୀ,୧୦।୧୧: ଏହା ନିଶ୍ଚିତ ଯେ ଆଇପିଏଲ (IPL) ୨୦୨୭ରେ ହାର୍ଦ୍ଦିକ ପାଣ୍ଡ୍ୟା ଏବଂ ଅର୍ଶଦୀପ ସିଂହ ନୂତନ ଦଳ ସହ ରହିବେ। କିଛି ଦିନ ପୂର୍ବରୁ ଆସିଥିବା ଖବର ଅନୁଯାୟୀ, ମୁମ୍ବାଇ ଦଳ ହାର୍ଦ୍ଦିକ ପାଣ୍ଡ୍ୟାଙ୍କ ବଦଳରେ ପଞ୍ଜାବ କିଙ୍ଗ୍ସରୁ ଅର୍ଶଦୀପ ସିଂହଙ୍କୁ ନିଜ ଦଳରେ ସାମିଲ କରିଛି। ଯଦିଓ ଏନେଇ କୌଣସି ଆନୁଷ୍ଠାନିକ ଘୋଷଣା କରାଯାଇନାହିଁ, ତଥାପି ଅର୍ଶଦୀପ ସିଂହଙ୍କ ପିତା ନିଶ୍ଚିତ କରିଛନ୍ତି ଯେ ତାଙ୍କ ପୁଅ ମୁମ୍ବାଇ ଦଳକୁ ଯାଉଛନ୍ତି।
ଅର୍ଶଦୀପ ସିଂହ ପଞ୍ଜାବ କିଙ୍ଗ୍ସ ସହିତ ନିଜର ଆଇପିଏଲ କ୍ୟାରିୟର୍ ଆରମ୍ଭ କରିଥିଲେ ଏବଂ ସେବେଠାରୁ ସେ ଏହି ଦଳ ପାଇଁ ଖେଳି ଆସୁଥିଲେ। କିନ୍ତୁ ବର୍ତ୍ତମାନ ସେ ଏକ ନୂତନ ଦଳର ପ୍ରତିନିଧିତ୍ୱ କରିବେ। ତାଙ୍କ ପିତା ଦର୍ଶନ ସିଂହ ଦୁଃଖ ପ୍ରକାଶ କରି କହିଛନ୍ତି ଯେ, ତାଙ୍କ ପୁଅ ଆଉ ଆଇପିଏଲରେ ପଞ୍ଜାବ ପାଇଁ ଖେଳିବେ ନାହିଁ।
ବରିଷ୍ଠ ସାମ୍ବାଦିକ ବିମଳ କୁମାରଙ୍କ ସହ କଥାବାର୍ତ୍ତା ବେଳେ ଅର୍ଶଦୀପ ସିଂହଙ୍କ ପିତା ଏହି କଥା ପ୍ରକାଶ କରିଛନ୍ତି। ଯେତେବେଳେ ତାଙ୍କୁ ପଚରାଗଲା, ‘ଅର୍ଶଦୀପଙ୍କ ଫ୍ରାଞ୍ଚାଇଜ ବଦଳିବା ନେଇ ଚର୍ଚ୍ଚା ହେଉଛି, ଏ ବିଷୟରେ କ’ଣ ପୂର୍ବରୁ କୌଣସି ଆଲୋଚନା ହୋଇଥିଲା?’ ସେତେବେଳେ ତାଙ୍କ ପିତା ଉତ୍ତର ଦେଲେ, ‘ନା, କୌଣସି ଆଲୋଚନା ହୋଇନଥିଲା; ଆମେ ମଧ୍ୟ ହଠାତ ଏହି ଅଦଳବଦଳ (ଟ୍ରେଡ) ବିଷୟରେ ଜାଣିବାକୁ ପାଇଲୁ। ବର୍ତ୍ତମାନ ସୁଦ୍ଧା ହୁଏତ ଏକ ଆମନ୍ତ୍ରଣ ଆସିସାରିଥିବ, କିନ୍ତୁ ନିଜର ମୂଳ ସ୍ଥାନ ପ୍ରତି ମଣିଷର ଏକ ଗଭୀର ଓ ଆଜୀବନ ମମତା ରହିଥାଏଯାହାକୁ କେହି କେବେ ଭୁଲିପାରନ୍ତି ନାହିଁ। ପଞ୍ଜାବ କିଙ୍ଗସ ତାଙ୍କ ପାଇଁ ଏକ ପ୍ରକାରର ସେହି ‘ମୂଳ ସ୍ଥାନ’ ଥିଲା; ସେଠାରେ ଏକ ଦୃଢ଼ ଆବେଗିକ ସମ୍ପର୍କ ରହିଥିଲା, ଯାହା ସ୍ବାଭାବିକ କଥା। ତଥାପି, ପ୍ରତ୍ୟେକ ଫ୍ରାଞ୍ଚାଇଜ ନିଜ ଦଳର ସନ୍ତୁଳନକୁ ଅଗ୍ରାଧିକାର ଦେଇଥାଏ ଏବଂ ଏହି ଆଧାରରେ ହିଁ ଏହି ଅଦଳବଦଳ କରାଯାଇଥିବାରୁ, ଆମେ ମୁମ୍ବାଇ ଇଣ୍ଡିଆନ୍ସ ସହ ଯୋଡ଼ି ହେବାକୁ ନେଇ ମଧ୍ୟ ସମ୍ପୂର୍ଣ୍ଣ ଖୁସି ଅଛୁ।’
ସୂଚନାଯୋଗ୍ୟ, ପାଣ୍ଡ୍ୟା ମଧ୍ୟ ମୁମ୍ବାଇ ସହିତ ନିଜର ଆଇପିଏଲ (IPL) କ୍ୟାରିୟର ଆରମ୍ଭ କରିଥିଲେ। ପରବର୍ତ୍ତୀ ସମୟରେ, ୨୦୨୨ ମସିହାରେ ସେ ଗୁଜୁରାଟ ଟାଇଟନ୍ସକୁ ଚାଲିଯାଇଥିଲେ। ୨୦୨୪ରେ ସେ ମୁମ୍ବାଇକୁ ଫେରିଲେଏଥର ଅଧିନାୟକ ଭାବରେ। ତେବେ, ତାଙ୍କ ନେତୃତ୍ୱରେ ଦଳ ବିଶେଷ ଭଲ ପ୍ରଦର୍ଶନ କରିପାରିଲା ନାହିଁ। ଚଳିତ ସିଜିନରେ ତାଙ୍କର ଦଳ ଛାଡ଼ିବା ଏକପ୍ରକାର ନିଶ୍ଚିତ ହୋଇଯାଇଥିଲା। ତାଙ୍କୁ ନିଜ ଦଳରେ ସାମିଲ କରିବା ପାଇଁ ରାଜସ୍ଥାନ ରୟାଲ୍ସ, ଚେନ୍ନାଇ ସୁପର କିଙ୍ଗସ ଏବଂ କୋଲକାତା ନାଇଟ ରାଇଡର୍ସ ପ୍ରତିଯୋଗିତାରେ ଥିଲେ, କିନ୍ତୁ ପଞ୍ଜାବ ହଠାତ ଏଥିରେ ପ୍ରବେଶ କଲା ଏବଂ ତାଙ୍କୁ ନିଜ ଦଳରେ ସାମିଲ କରିବାରେ ସଫଳ ହେଲା। ତଥାପି, ଏ ବିଷୟରେ କୌଣସି ଫ୍ରାଞ୍ଚାଇଜ ପକ୍ଷରୁ ଆନୁଷ୍ଠାନିକ ଘୋଷଣା କରାଯାଇନାହିଁ।
ସୌଜନ୍ୟ ଧରିତ୍ରୀ
