ତୃଣମୂଳ କଂଗ୍ରେସ ସାଂସଦ ଅଭିଷେକ ବାନାର୍ଜୀଙ୍କ ଉପରେ ଆକ୍ରମଣ ମାମଲାରେ ରାଜନୀତି ତୀବ୍ର ହେବାରେ ଲାଗିଛି। ଅଭିଷେକଙ୍କୁ କୋଲକାତାର ଏକ ଡାକ୍ତରଖାନାରେ ଭର୍ତ୍ତି କରାଯିବା ସମୟରେ ମମତା ବାନାର୍ଜୀ ହସ୍ପିଟାଲର ସିଇଓଙ୍କୁ ଧମକ ଦେଉଥିବାର…
କୋଲକାତା: ତୃଣମୂଳ କଂଗ୍ରେସ ସାଂସଦ ଅଭିଷେକ ବାନାର୍ଜୀଙ୍କ ଉପରେ ଆକ୍ରମଣ ମାମଲାରେ ରାଜନୀତି ତୀବ୍ର ହେବାରେ ଲାଗିଛି। ଅଭିଷେକଙ୍କୁ କୋଲକାତାର ଏକ ଡାକ୍ତରଖାନାରେ ଭର୍ତ୍ତି କରାଯିବା ସମୟରେ ମମତା ବାନାର୍ଜୀ ହସ୍ପିଟାଲର ସିଇଓଙ୍କୁ ଧମକ ଦେଉଥିବାର ଏକ ଅଡିଓ କ୍ଲିପ୍ ଭାଇରାଲ ହୋଇଛି। ଏହାକୁ ନେଇ ରାଜନୀତି ତୀବ୍ର ହୋଇଛି। ଭାଇରାଲ ରେକର୍ଡିଂରେ ମମତା ବେଲେ ଭ୍ୟୁ ହସ୍ପିଟାଲର ସିଇଓ ପ୍ରଦୀପ ଟଣ୍ଡନଙ୍କୁ ଗାଳିଗୁଲଜ କରୁଥିବା ଶୁଣିବାକୁ ମିଳୁଛି।
ଦକ୍ଷିଣ ୨୪ ପ୍ରଗଣାର ସୋନାରପୁରରେ ଆକ୍ରମଣ ପରେ ଅଭିଷେକଙ୍କୁ ବେଲେ ଭ୍ୟୁ ହସ୍ପିଟାଲରେ ଭର୍ତ୍ତି କରାଯାଇଥିଲା। ମମତା ଅଭିଯୋଗ କରିଛନ୍ତି ଯେ, ଡାକ୍ତରଖାନା ଅଭିଷେକଙ୍କ ଆଘାତକୁ କମ୍ କରି ଦେଖାଇବାକୁ ଚେଷ୍ଟା କରିଛି। କେବଳ ଏତିକି ନୁହେଁ, ସରକାରଙ୍କ ନିର୍ଦ୍ଦେଶରେ ସେ ଅଭିଷେକଙ୍କୁ ହସ୍ପିଟାଲରେ ଭର୍ତ୍ତି କରିବାକୁ ମଧ୍ୟ ମନା କରିଦେଇଥିବା ମମତା ଅଭିଯୋଗ କରିଛନ୍ତି। ଭାଇରାଲ ହୋଇଥିବା ଅଡିଓ କ୍ଲିପ୍ରେ ମମତା କହୁଥିବାର ଶୁଣିବାକୁ ମିଳିଛି, କ୍ଷମା କରିବେ ମିଷ୍ଟର ଟଣ୍ଡନ, ଆପଣ ଭୁଲ୍ କାମ କରିଛନ୍ତି। ମମତା ଆହୁରି କହିଛନ୍ତି, ମନେରଖନ୍ତୁ ଆମେ ଆପଣଙ୍କୁ କେତେ ସାହାଯ୍ୟ କରିଛୁ। ଈଶ୍ବର ଆପଣଙ୍କୁ କ୍ଷମା କରିବେ ନାହିଁ। ଆପଣ ଲୋକମାନଙ୍କୁ ବିଭ୍ରାନ୍ତ କରୁଛନ୍ତି। ଆପଣ ଲଜ୍ଜିତ ହେବା ଉଚିତ। ସମସ୍ତେ ଆପଣଙ୍କ ଅହଂକାରକୁ ମନେ ରଖିବେ। ଆପଣ ଡାକ୍ତରଖାନା ଚଳାଉଛନ୍ତି ଓ ବିଜେପି କ୍ଷମତାରେ ଅଛି। ଆସନ୍ତାକାଲି, ଯଦି କେନ୍ଦ୍ର ସରକାର ନ ରହନ୍ତି, ତେବେ ଆମେ ଏହାର ଯତ୍ନ ନେବୁ।
ଉଲ୍ଲେଖଯୋଗ୍ୟ, ମମତା ବାନାର୍ଜୀଙ୍କ ଏହି ଭିଡିଓ ସେହି ସମୟରେ ଲିକ୍ ହୋଇଛି ଯେତେବେଳେ ସୋନାରପୁରରେ ପୁତୁରାଙ୍କ ଉପରେ ଆକ୍ରମଣ ହୋଇଥିଲା। ନିର୍ବାଚନୀ ହିଂସାରେ ନିହତ ଜଣେ ତୃଣମୂଳ କଂଗ୍ରେସ କର୍ମୀଙ୍କ ପରିବାର ସଦସ୍ୟଙ୍କୁ ଭେଟିବାକୁ ଆସିଥିବା ଅଭିଷେକଙ୍କ ସାମ୍ନାରେ ଲୋକମାନେ ‘ଚୋର-ଚୋର’ ସ୍ଲୋଗାନ ଦେଇଥିଲେ। ଏହା ପରେ ତାଙ୍କ ଉପରକୁ ଅଣ୍ଡା ଓ ଟେକା ମାଡ଼ କରାଯାଇଥିଲା। ସୁରକ୍ଷା କର୍ମୀଙ୍କ ଉପସ୍ଥିତିରେ ଅଭିଷେକଙ୍କୁ ଆକ୍ରମଣ କରାଯାଇଥିଲା। ତାଙ୍କ ସାର୍ଟ ମଧ୍ୟ ଛିଣ୍ଡି ଯାଇଥିଲା। ଏହି ଘଟଣା ସହ ଜଡିତ ଅନେକ ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି, ଯେଉଁଥିରେ ଅଭିଷେକଙ୍କୁ ସୁରକ୍ଷା କର୍ମୀମାନେ ହେଲମେଟ୍ ପିନ୍ଧାଇ ସ୍ଥାନାନ୍ତର କରୁଥିବା ଦେଖିବାକୁ ମିଳିଛି। ଅଭିଷେକ ବାନାର୍ଜୀ ଏହି ଆକ୍ରମଣ ପାଇଁ ଭାରତୀୟ ଜନତା ପାର୍ଟିକୁ ଦାୟୀ କରିଛନ୍ତି। ମମତା କହିଛନ୍ତି ଯେ, ଅଭିଷେକଙ୍କ ଆଘାତ ଗୁରୁତର ଅଛି, କିନ୍ତୁ ଏହା ପରେ ମଧ୍ୟ ତାଙ୍କୁ ଭର୍ତ୍ତି କରିବାକୁ ଅନୁମତି ଦିଆଯାଇ ନାହିଁ।
