CBSE: ଇଂରାଜୀକୁ ସ୍ୱଦେଶୀ ଭାଷା କୁହାଯାଇପାରିବ କି? ସିବିଏସ୍ଇର ତିନି-ଭାଷା ନୀତିକୁ ନେଇ ସୁପ୍ରିମ୍କୋର୍ଟଙ୍କ ପ୍ରଶ୍ନ
ସିବିଏସ୍ଇର ତିନି-ଭାଷା ନୀତିକୁ ନେଇ ବୁଧବାର ସୁପ୍ରିମ୍କୋର୍ଟରେ ହୋଇଥିବା ଶୁଣାଣି ସମୟରେ ଇଂରାଜୀ ଭାଷାକୁ ସ୍ୱଦେଶୀ ଭାଷା ଭାବେ ବିବେଚନା କରାଯାଇପାରିବ କି ନାହିଁ ବୋଲି ଅଦାଲତ ପ୍ରଶ୍ନ ଉଠାଇଛନ୍ତି।
ନୂଆଦିଲ୍ଲୀ: ସିବିଏସ୍ଇର ତିନି-ଭାଷା ନୀତିକୁ ନେଇ ବୁଧବାର ସୁପ୍ରିମ୍କୋର୍ଟରେ ହୋଇଥିବା ଶୁଣାଣି ସମୟରେ ଇଂରାଜୀ ଭାଷାକୁ ସ୍ୱଦେଶୀ ଭାଷା ଭାବେ ବିବେଚନା କରାଯାଇପାରିବ କି ନାହିଁ ବୋଲି ଅଦାଲତ ପ୍ରଶ୍ନ ଉଠାଇଛନ୍ତି। ଜାତୀୟ ଶିକ୍ଷା ନୀତି ଏବଂ ସିବିଏସ୍ଇର ଭାଷା ନୀତିକୁ ଚ୍ୟାଲେଞ୍ଜ କରି ଦାଖଲ ହୋଇଥିବା ଏକ ଆବେଦନର ଶୁଣାଣି ବେଳେ ଏହି ପ୍ରଶ୍ନ ଉଠିଥିଲା।
ଶୁଣାଣି ସମୟରେ ଖଣ୍ଡପୀଠ କହିଛନ୍ତି ଯେ, ତିନି-ଭାଷା ନୀତିର ମୂଳ ଉଦ୍ଦେଶ୍ୟ ହେଉଛି ଛାତ୍ରଛାତ୍ରୀଙ୍କ ମଧ୍ୟରେ ଭାରତୀୟ ଭାଷାର ପ୍ରସାର ଓ ସୁରକ୍ଷାକୁ ପ୍ରୋତ୍ସାହନ ଦେବା। ଏଭଳି ସ୍ଥିତିରେ ଇଂରାଜୀକୁ ଭାରତର ସ୍ୱଦେଶୀ ଭାଷା ଭାବେ ଗ୍ରହଣ କରାଯାଇପାରିବ କି ନାହିଁ, ତାହା ବିଚାରଯୋଗ୍ୟ ପ୍ରଶ୍ନ ବୋଲି ଅଦାଲତ ମନ୍ତବ୍ୟ ଦେଇଛନ୍ତି। ଆବେଦନକାରୀଙ୍କ ପକ୍ଷରୁ ଯୁକ୍ତି ରଖାଯାଇଥିଲା ଯେ, କେତେକ ବିଦ୍ୟାଳୟରେ ଇଂରାଜୀକୁ ତୃତୀୟ ଭାଷା ଭାବେ ଗଣନା କରାଯାଉଛି। ଏହା ଫଳରେ ଭାରତୀୟ ଭାଷା ଶିକ୍ଷାର ଉଦ୍ଦେଶ୍ୟ ବାଧାପ୍ରାପ୍ତ ହେଉଛି। ଏହା ଉପରେ ଅଦାଲତ ପ୍ରଶ୍ନ କରିଥିଲେ ଯେ, ଯଦି ତିନି-ଭାଷା ନୀତି ଭାରତୀୟ ଭାଷାକୁ ପ୍ରୋତ୍ସାହନ ଦେବା ପାଇଁ ପ୍ରସ୍ତୁତ ହୋଇଛି, ତେବେ ଇଂରାଜୀକୁ ସେହି ଶ୍ରେଣୀରେ କିପରି ରଖାଯାଇପାରିବ?
ଶୁଣାଣି ବେଳେ ସିବିଏସ୍ଇ ପକ୍ଷରୁ କୁହାଯାଇଥିଲା ଯେ, ତିନି-ଭାଷା ନୀତିର କାର୍ଯ୍ୟକାରିତା ସମ୍ପର୍କରେ ବିଭିନ୍ନ ରାଜ୍ୟ ଓ ବିଦ୍ୟାଳୟରେ ଭିନ୍ନ ଭିନ୍ନ ବ୍ୟବସ୍ଥା ରହିଛି। ତେଣୁ ଏହି ପ୍ରସଙ୍ଗକୁ ବ୍ୟାପକ ଭାବେ ବିଚାର କରାଯିବା ଆବଶ୍ୟକ। କେନ୍ଦ୍ର ସରକାରଙ୍କ ପକ୍ଷରୁ ମଧ୍ୟ ଏହି ବିଷୟରେ ବିସ୍ତୃତ ଜବାବ ଦାଖଲ କରାଯିବ ବୋଲି ଅଦାଲତଙ୍କୁ ଜଣାଯାଇଥିଲା।
ସୁପ୍ରିମ୍କୋର୍ଟ କହିଛନ୍ତି, ଏହି ମାମଲା କେବଳ ଗୋଟିଏ ବିଦ୍ୟାଳୟ କିମ୍ବା ଗୋଟିଏ ରାଜ୍ୟ ସହ ଜଡ଼ିତ ନୁହେଁ। ଏହା ଜାତୀୟ ସ୍ତରରେ ଭାଷା ଶିକ୍ଷା ନୀତି ସହ ଜଡ଼ିତ ଏକ ଗୁରୁତ୍ୱପୂର୍ଣ୍ଣ ପ୍ରସଙ୍ଗ। ସେଥିପାଇଁ ତିନି-ଭାଷା ନୀତିର ଉଦ୍ଦେଶ୍ୟ, ତାହାର ପ୍ରୟୋଗ ଓ ଭାରତୀୟ ଭାଷାର ସ୍ଥିତିକୁ ଧ୍ୟାନରେ ରଖି ଏହାର ବିଚାର କରାଯିବ। ଅଦାଲତ ଏହି ମାମଲାରେ ସିବିଏସ୍ଇ ଓ କେନ୍ଦ୍ର ସରକାରଙ୍କୁ ବିସ୍ତୃତ ଜବାବ ଦାଖଲ କରିବାକୁ କହିଛନ୍ତି। ପରବର୍ତ୍ତୀ ଶୁଣାଣିରେ ତିନି-ଭାଷା ନୀତିର ବ୍ୟାଖ୍ୟା, ଇଂରାଜୀର ସ୍ଥାନ ଓ ଭାରତୀୟ ଭାଷାକୁ ପ୍ରୋତ୍ସାହନ ଦେବା ସମ୍ପର୍କିତ ବିଭିନ୍ନ ପ୍ରସଙ୍ଗ ଉପରେ ବିସ୍ତୃତ ଆଲୋଚନା ହେବ ବୋଲି ଜଣାପଡ଼ିଛି।
ସୌଜନ୍ୟ ସମ୍ବାଦ
