ଭୁବନେଶ୍ୱର: କମିଶରେଟ୍ ପୋଲିସ୍ରେ ଦିନକୁ ଦିନ ଅପରାଧ ବଢ଼ିବାରେ ଲାଗିଛି। ଗତ ଦୁଇ ମାସ ମଧ୍ୟରେ ଟୁଇନ୍ ସିଟରେ ୪୩ ଜଣ ଦୁଷ୍କର୍ମର ଶିକାର ହୋଇଥିବା ବେଳେ ୧୫ ହତ୍ୟା ଅଭିଯୋଗ ହୋଇଥିବା ପୋଲିସ୍ ରିପୋର୍ଟ କହୁଛି । କଟକ ଅପେକ୍ଷା ଭୁବନେଶ୍ଵରରେ ଅଧିକ ମହିଳା, ଯୁବତୀ ଓ ନାବାଳିକା ବଳାହାର ଶିକାର ହୋଇଛନ୍ତି। ଗତ ଜାନୁଆରୀରେ କଟକରେ ୬ ଜଣ ମହିଳା ବଳାହାରର ଶିକାର ହୋଇଥିବା ନେଇ ବିଭିନ୍ନ ଥାନାରେ ଅଭିଯୋଗ କରିଥିଲେ। ଭୁବନେଶ୍ୱରରେ ଏହି ସଂଖ୍ୟା ୧୦ ଥିଲା।
ଦୁଷ୍କର୍ମ ମାମଲା ବଢିଛି:
ଫେବ୍ରୁଆରୀରେ କଟକରେ ୯ ଜଣ ଓ ଭୁବନେଶ୍ଵରରେ ୧୮ ଜଣ ଦୁଷ୍କର୍ମର ଶିକାର ହୋଇଥିଲେ। ଦୁଇ ମାସରେ ୪୩ ଜଣ ଦୁଷ୍କର୍ମ ଶିକାର ହୋଇଛନ୍ତି। ସେମାନଙ୍କ ମଧ୍ୟରୁ ୯ ଜଣ ନାବାଳିକା ଥିବା ଜଣାପଡିଛି । ଏ ସବୁ ମାମଲା ମଧ୍ୟରୁ ବିବାହ ପ୍ରତିଶ୍ରୁତି ଦେଇ ବଳାତ୍କାର ମାମଲା ଅଧିକ। ଦୁଇ ମାସରେ କଟକ ଓ ଭୁବନେଶ୍ଵରେ ୧୫ଟି ହତ୍ୟା ମାମଲା ରୁଜୁ ହୋଇଛି। ଜାନୁଆରୀ ଅପେକ୍ଷା ଫେବ୍ରୁଆରୀରେ ଅଧିକ ହତ୍ୟାକାଣ୍ଡ ଘଟିଛି। ଏହି ଦୁଇ ମାସ ଭିତରେ ମାତ୍ର ଗୋଟିଏ ଡକାୟତି ହୋଇଛି। ତା’ପୁଣି ଭୁବନେଶ୍ଵରରେ।
ବଢିଛି ଚୋରି-ରାହାଜାନୀ:
ଚୋରିରେ ଦିନକୁ ଦିନ ନୂଆ ରେକର୍ଡ କରୁଛି କମିଶନରେଟ୍ ପୋଲିସ୍। ଦୁଇ ମାସରେ ୪୧୮ଟି ଚୋରି ହୋଇଛି। ଜାନୁଆରୀରେ ଭୁବନେଶ୍ୱରରେ ୧୬୦ଟି ଓ କଟକରେ ୫୫ଟି ଚୋରି ହୋଇଥିଲା। ଫେବ୍ରୁଆରୀରେ ଭୁବନେଶ୍ଵର ୧୫୦ଟି ଓ କଟକରେ ୫୩ଟି ଚୋରି ହୋଇଥିବା ନେଇ ବିଭିନ୍ନ ଥାନାରେ ଅଭିଯୋଗ ହୋଇଛି। ଏହି ଦୁଇ ମାସରେ ୫୩ ଟି ଲୁଟ୍ ଅଭିଯୋଗ ହୋଇଛି। ୧୭ ସୁନାଚେନ୍ ଲୁଟ ହୋଇଥିବା ବେଳେ ବାକି ମୋବାଇଲ୍ ଓ ଭ୍ୟାନିଟି ଲୁଟ ହୋଇଛି। ବଢ଼ିବାରେ ଲାଗିଛି ଠକେଇ ମାମଲା।
ଠକେଇ ମାମଲା କେତେ?
ଜାନୁଆରୀରେ ଟୁଇନ୍ ସିଟିରେ ୩୨୦ଟି ଠକେଇ ମାମଲା ରୁଜୁ ହୋଇଥିଲା । କଟକରେ ୯୪ଟି ଠକେଇ ମାମଲା ରୁଜୁ ହୋଇଥିବା ବେଳେ ଭୁବନେଶ୍ଵରରେ ଥିଲା ୨୨୬। ଦୁର୍ଘଟଣା ମଧ୍ୟ ଉପର ମୁହାଁ ହୋଇଛି। ଜାନୁଆରୀରେ କଟକ ୟୁପିଡିରେ ୪୧ଟି ଦୁର୍ଘଟଣା ମାମଲା ରୁଜୁ ହୋଇଥିଲା । ଏଥିରେ ୧୧ ଜଣଙ୍କ ମୃତ୍ୟୁ ହୋଇଥିଲା। ଫେବ୍ରୁଆରରେ କଟକରେ ୩୭ଟି ଦୁର୍ଘଟଣା ଘଟିଥିଲା। ଏଥିରେ ୯ ଜଣଙ୍କ ଜୀବନ ଯାଇଛି। ଜାନୁ ଆରୀରେ ଭୁବନେଶ୍ଵର ୟୁପିଡିରେ ୮୦ ଦୁର୍ଘଟଣାରେ ୧୨ ଜୀବନ ଯାଇଥି ଲା। ଫେବ୍ରୁଆରୀରେ ଭୁବନେଶ୍ଵରରେ ୭୧ଟି ଦୁର୍ଘଟଣା ଘଟିଥିଲା। ଏଥିରେ ୧୦ ଜଣଙ୍କ ଜୀବନ ଯାଇଛି।
ସୌଜନ୍ୟ Prameya News7
