ନୂଆଦିଲ୍ଲୀ: ପାଞ୍ଚଟି ରାଜ୍ୟରେ ଚାଲିଥିବା ୨୦୨୬ ବିଧାନସଭା ନିର୍ବାଚନ ପ୍ରକ୍ରିୟା ଆଜି ଶେଷ ହୋଇଛି । ସମସ୍ତଙ୍କ ନଜର ଏବେ ମେ ୪ ତାରିଖ ଭୋଟ ଗଣତି ଉପରେ ରହିଛି, ଯେଉଁଦିନ ଜନତାଙ୍କ ପ୍ରକୃତ ରାୟ ସାମ୍ନାକୁ ଆସିବ। ଏହା ପୂର୍ବରୁ ଆଜି ବିଭିନ୍ନ ସଂସ୍ଥାର ଏକଜିଟ୍ ପୋଲ୍ ଜାରି ହୋଇଛି ଏବଂ ଏହା ଆଞ୍ଚଳିକ ରାଜନୀତିରେ ବଡ଼ ପରିବର୍ତ୍ତନର ସଙ୍କେତ ଦେଉଛି। ବିଭିନ୍ନ ସଂସ୍ଥାର ବୁଥ୍ ବାହୁଡ଼ା ମତ ଅନୁଯାୟୀ ପଶ୍ଚିମବଙ୍ଗରେ ବିଜେପି ନୂଆ ଇତିହାସ ସୃଷ୍ଟି କରି କ୍ଷମତାକୁ ଆସିବ ଏବଂ କେରଳରେ ୟୁଡିଏଫ୍ର ପ୍ରତ୍ୟାବର୍ତ୍ତନ ହେବ । ଆସାମ ଓ ପୁଡୁଚେରୀରେ ଏନ୍ଡିଏ କ୍ଷମତା ବଜାୟ ରଖିବ ବୋଲି ପ୍ରମୁଖ ଏକ୍ଜିଟ ପୋଲ୍ ଆକଳନ କରିଛନ୍ତି। ତାମିଲନାଡୁରେ ଡିଏମ୍କେ ମେଣ୍ଟ ପୁଣି ଥରେ କ୍ଷମତା କାଏମ ରଖି ଇତିହାସ ସୃଷ୍ଟି କରିବ ବୋଲି ଆକଳନ କରାଯାଇଛି।
ମପଶ୍ଚିମବଙ୍ଗରେ ୨୯୪ଟି ଆସନ ପାଇଁ ହୋଇଥିବା ନିର୍ବାଚନରେ ୯୦ ପ୍ରତିଶତରୁ ଅଧିକ ମତଦାନ ବିଶ୍ଳେଷକଙ୍କୁ ଚକିତ କରିଛି। ଏଠାରେ ବିଜେପି ତୃଣମୂଳ କଂଗ୍ରେସ (ଟିଏମସି) ଗଡ଼କୁ ଭାଙ୍ଗିବାରେ ସଫଳ ହୋଇଥିବା ବିଭିନ୍ନ ଏକ୍ଜିଟ ପୋଲ ପୂର୍ବାନୁମାନ କରିଛନ୍ତି। ୭ଟି ମୁଖ୍ୟ ଏକ୍ଜିଟ ପୋଲ୍ ମଧ୍ୟରୁ ୫ଟି ବିଜେପିର ବହୁମତ ଆକଳନ କରିଛନ୍ତି। ମାଟ୍ରିଜ (୧୪୬–୧୬୧ ଆସନ) ଏବଂ ପି ମାର୍କ (୧୫୦–୧୭୫ ଆସନ) ପରି ସଂସ୍ଥାଗୁଡ଼ିକ ବିଜେପି ମ୍ୟାଜିକ୍ ନମ୍ବର ୧୪୮ ଅତିକ୍ରମ କରିବ ବୋଲି ଦର୍ଶାଇଛନ୍ତି। ତେବେ ପିପୁଲ୍ସ ପଲ୍ସ ଟିଏମସିକୁ ୧୭୭–୧୮୭ ଆସନ ଦେଇ ମମତା ବାନାର୍ଜୀଙ୍କ ପ୍ରତ୍ୟାବର୍ତ୍ତନର ସୂଚନା ଦେଇଛି। ଅନ୍ୟପଟେ ଆସାମରେ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମାଙ୍କ ନେତୃତ୍ୱରେ ବିଜେପି ନେତୃତ୍ୱାଧୀନ ଏନଡିଏ ଲଗାତାର ତୃତୀୟ ଥର ପାଇଁ କ୍ଷମତା ବଜାୟ ରଖିବା ନିଶ୍ଚିତ ଜଣାପଡୁଛି। ଏକ୍ସିସ ମାଇଁ ଇଣ୍ଡିଆ ଆକଳନ ଅନୁଯାୟୀ ଏନ୍ଡିଏ ୮୮–୧୦୦ ଆସନ ପାଇପାରେ, ଯେଉଁଠି କଂଗ୍ରେସ ମେଣ୍ଟ ମାତ୍ର ୨୦–୩୬ ଆସନରେ ସୀମିତ ରହିବାର ସମ୍ଭାବନା ଅଛି।
କେରଳରେ ଏକ ବଡ଼ ଓଲଟପାଲଟ ଦେଖିବାକୁ ମିଳିପାରେ। ସମସ୍ତ ୬ଟି ପ୍ରମୁଖ ଏକ୍ଜିଟ ପୋଲ୍ ଏଠାରେ ୟୁଡିଏଫ୍ (ୟୁଡିଏଫ୍) ସରକାର ଗଠନ କରିବ ବୋଲି ଭବିଷ୍ୟବାଣୀ କରିଛନ୍ତି। ୟୁଡିଏଫ୍ ପ୍ରାୟ ୭୦–୮୦ ଆସନ ଏବଂ ୪୪% ଭୋଟ୍ ସେ ୟାର ସହ କ୍ଷମତାକୁ ଫେରିବ ବୋଲି ଆକଳନରୁ ଜଣାପଡ଼ିଛି। ଅନ୍ୟପକ୍ଷରେ ତାମିଲନାଡୁରେ ମୁଖ୍ୟମନ୍ତ୍ରୀ ଏମ୍.କେ. ଷ୍ଟାଲିନଙ୍କ ଡିଏମ୍କେ ମେଣ୍ଟ ପୁଣି ବିଜୟୀ ହେବା ସମ୍ଭାବନା ଅଧିକ। ଏକ ନୂଆ ବିକାଶ କ୍ରମରେ ଅଭିନେତା ବିଜୟଙ୍କ ନୂତନ ଦଳ ଟିଭିକେ ପ୍ରାୟ ୧୦–୨୪ଟି ଆସନ ପାଇ ରାଜ୍ୟ ରାଜନୀତିରେ ତୃତୀୟ ଶକ୍ତି ଭାବେ ଉଭା ହେବାର ସଙ୍କେତ ଦେଉଛି। ପୁଡୁଚେରୀରେ ଏନ୍ଡିଏ (ଏଆଇଏନ୍ଆର୍ସି-ବିଜେପି) ପୁଣି କ୍ଷମତାକୁ ଫେରିବା ସମ୍ଭାବନା ରହିଛି। ଏଠାରେ ଏନ୍ଡିଏ ୧୬–୨୦ଟି ଆସନ ଜିତିପାରନ୍ତି ବୋଲି ଆକଳନ କରାଯାଇଛି।
ସୌଜନ୍ୟ ସମ୍ବାଦ