Election: ପଶ୍ଚିମବଙ୍ଗ ନିର୍ବାଚନରେ ୪୯ ଜଣ ଡାକ୍ତରଙ୍କୁ ନିୟୋଜିତ କଲେ ନିର୍ବାଚନ ଆୟୋଗ

କୋଲକାତା: ପଶ୍ଚିମବଙ୍ଗର ଜଣେ ଜିଲ୍ଲା ନିର୍ବାଚନ ଅଧିକାରୀ (ଡିଇଓ) ମାର୍ଚ୍ଚ ଶେଷ ସୁଦ୍ଧା ରାଜ୍ୟ ସରକାରଙ୍କ ଏକ ଡାକ୍ତରଖାନାର ୪୯ ଜଣ ଡାକ୍ତରଙ୍କୁ ନିର୍ବାଚନ ଡ୍ୟୁଟିରେ ଯୋଗଦେବାକୁ କହିଥିଲେ। ନିର୍ବାଚନ ଆୟୋଗଙ୍କ ନିର୍ଦ୍ଦେଶାବଳୀ ଅନୁଯାୟୀ, ସରକାରୀ ଡାକ୍ତରଖାନାର ଡାକ୍ତରମାନଙ୍କୁ ସାଧାରଣତଃ ବିଧାନସଭା କିମ୍ବା ସଂସଦୀୟ ନିର୍ବାଚନରେ ନିର୍ବାଚନ ଡ୍ୟୁଟି ନ୍ୟସ୍ତ କରାଯାଏ ନାହିଁ କାରଣ ଡାକ୍ତର, ନର୍ସ ଓ ଏଏନ୍‌ଏମ୍‌ଙ୍କ ସମେତ ଡାକ୍ତରୀ କର୍ମଚାରୀଙ୍କୁ ଅତ୍ୟାବଶ୍ୟକ ସେବା ଅଧୀନରେ ଶ୍ରେଣୀଭୁକ୍ତ କରାଯାଏ। ବିରୋଧ ପରେ ଡିଇଓ ଉକ୍ତ ନିର୍ଦ୍ଦେଶକୁ ପ୍ରତ୍ୟାହାର କରିଛନ୍ତି।

ଏହି ମାମଲାରେ ଡାକ୍ତରଖାନାର ପ୍ରାୟ ଅଧା କର୍ମଚାରୀ ପଶ୍ଚିମବଙ୍ଗ ନିର୍ବାଚନ ପ୍ରକ୍ରିୟାରେ ନିୟୋଜିତ ହେବାକୁ କୁହାଯାଇଛି ବୋଲି କଲେଜ ପ୍ରିନ୍ସିପାଲ ରାମପ୍ରସାଦ ରାୟ କହିଛନ୍ତି। ହୁଗୁଳି ଜିଲ୍ଲା ଡିଇଓ ଚଳିତ ମାସର ଦ୍ୱିତୀୟ ସପ୍ତାହ ଆରମ୍ଭରେ ଜିଲ୍ଲାର ଆରାମବାଗସ୍ଥିତ ପ୍ରଫୁଲ୍ଲଚନ୍ଦ୍ର ସେନ୍ ସରକାରୀ ମେଡିକାଲ୍ କଲେଜ ଓ ହସ୍ପିଟାଲର ୪୯ ଜଣ ଡାକ୍ତରଙ୍କୁ ରିକ୍ୟୁଜିସନ୍ ନୋଟିସ୍ ଜାରି କରି ମତଦାନ କେନ୍ଦ୍ରରେ ପ୍ରିଜାଇଡିଂ ଅଫିସର ଭାବରେ କାର୍ଯ୍ୟ କରିବାକୁ ନିର୍ଦ୍ଦେଶ ଦେଇଥିଲେ।

ସୌଜନ୍ୟ ସମ୍ବାଦ