Financial power: ମୁଖ୍ୟମନ୍ତ୍ରୀଙ୍କ ଆର୍ଥିକ କ୍ଷମତା ୧୦୦ କୋଟିକୁ ବଢ଼ିଲା

ଅର୍ଥ ବିଭାଗ ସୂଚନା ମୁତାବକ ସାମଗ୍ରୀ କ୍ରୟ, କନ୍‌ସଲ୍‌ଟାନ୍ସି ସେବା ଓ ସେବାର ଆଉଟ୍‌ସୋର୍ସିଂ ଭଳି ତିନି ପ୍ରକାର ବିଷୟ ପାଇଁ ମୁଖ୍ୟମନ୍ତ୍ରୀଙ୍କଠାରୁ ଆରମ୍ଭ କରି ସଚିବଙ୍କ ପର୍ଯ୍ୟନ୍ତ ଆର୍ଥିକ କ୍ଷମତା ବୃଦ୍ଧି କରାଯାଇଛି। ବିଭାଗୀୟ ମୁଖ୍ୟମାନେ ୧୦ କୋଟି ଟଙ୍କା ପର୍ଯ୍ୟନ୍ତ ସାମଗ୍ରୀ କ୍ରୟ ଓ ୧ କୋଟି ଟଙ୍କା ପର୍ଯ୍ୟନ୍ତ କନ୍‌ସଲ୍‌ଟାନ୍ସି ଓ ଆଉଟ୍‌ସୋର୍ସିଂ ସେବା ମଞ୍ଜୁର କରିପାରିବେ। ପ୍ରଶାସନିକ ବିଭାଗର ସଚିବମାନେ ୨୦ କୋଟି ଟଙ୍କା ପର୍ଯ୍ୟନ୍ତ ସାମଗ୍ରୀ କ୍ରୟ ଓ ୫ କୋଟି ଟଙ୍କା ପର୍ଯ୍ୟନ୍ତର ସେବା ସମ୍ପର୍କିତ ପ୍ରସ୍ତାବ ଅନୁମୋଦନ କରିପାରିବେ। ପ୍ରଶାସନିକ ବିଭାଗର ମନ୍ତ୍ରୀମାନଙ୍କୁ ୫୦ କୋଟି ଟଙ୍କା ପର୍ଯ୍ୟନ୍ତ ସାମଗ୍ରୀ କ୍ରୟ ଓ ୧୦ କୋଟି ଟଙ୍କା ପର୍ଯ୍ୟନ୍ତ ସେବା ସମ୍ପର୍କିତ ପ୍ରସ୍ତାବ ନିଷ୍ପତ୍ତି ନେବା କ୍ଷମତା ଦିଆଯାଇଛି।

ରାଜସ୍ବ ବୋର୍ଡ ସଦସ୍ୟ, ପିସିସିଏଫ୍‌, ରାଜସ୍ବ କମିସନର ଓ ଜିଲ୍ଲାପାଳମାନଙ୍କ ପାଇଁ ଆବାସିକ କୋଠ, ଅଣ-ଆବାସିକ କୋଠା, ଯୋଗାଯୋଗ, ଜଳସେଚନ, ଜନସ୍ବାସ୍ଥ୍ୟ ଓ ବିଦ୍ୟୁତ୍‌, ସ୍ବଚ୍ଛତା ଓ ପରିମଳ, ସର୍କିଟ୍‌ ହାଉସ୍‌, ଆଇବି, ପାନୀୟ ଜଳ ‌ଯୋଗାଣ ସମ୍ପର୍କିତ ଆର୍ଥିକ କ୍ଷମତାକୁ ମଧ୍ୟ ବୃଦ୍ଧି କରାଯାଇଛି। ରାଜସ୍ବ ଓ ବିପର୍ଯ୍ୟୟ ପରିଚାଳନା, ପୂର୍ତ୍ତ, ଜଳ ସମ୍ବଳ, ଶକ୍ତି, ଗ୍ରାମୀଣ ବିକାଶ, ଗୃହ ଓ ନଗର ଉନ୍ନୟନ, ପଞ୍ଚାୟତିରାଜ, ପାନୀୟ ଜଳ ଓ ଏସ୍‌ଟି-ଏସ୍‌ସି ଉନ୍ନୟନ, ସଂଖ୍ୟାଲଘୁ ଓ ଅନ୍ୟାନ୍ୟ ପଛୁଆ ବର୍ଗ କଲ୍ୟାଣ ବିଭାଗର ଆର୍ଥିକ କ୍ଷମତାକୁ ମଧ୍ୟ ବୃଦ୍ଧି କରାଯାଇଛି। ଯୋଗାଯୋଗ, ଜଳସେଚନ, ଜନସ୍ବାସ୍‌ଥ୍ୟ ଓ ବିଦ୍ୟୁତ୍‌ କ୍ଷେତ୍ରରେ ସେମାନେ ୨୦୦ କୋଟି ଟଙ୍କା ପର୍ଯ୍ୟନ୍ତର ପ୍ରସ୍ତାବ ଅନୁମୋଦନ କରିପାରିବେ।

ରାଜ୍ୟ ସରକାର କ୍ଷତିର ରାଇଟ୍‌-ଅଫ୍‌ ସୀମାକୁ ମଧ୍ୟ ସଂଶୋଧନ କରିଛନ୍ତି। ସଚିବମାନେ ୨୦ ଲକ୍ଷ ଟଙ୍କା ପର୍ଯ୍ୟନ୍ତ, ମନ୍ତ୍ରୀମାନେ ୫୦ ଲକ୍ଷ ଟଙ୍କା ପର୍ଯ୍ୟନ୍ତ ଓ ମୁଖ୍ୟମନ୍ତ୍ରୀ ୫ କୋଟି ପର୍ଯ୍ୟନ୍ତ କ୍ଷତିକୁ ରାଇଟ୍‌-ଅଫ୍‌ କରିପାରିବେ। ୫ କୋଟି ଟଙ୍କାରୁ ଅଧିକ ମୂଲ୍ୟର କ୍ଷତି ରାଇଟ୍‌ ଅଫ୍‌ ପାଇଁ କ୍ୟାବିନେଟ୍‌ ଅନୁମୋଦନ ଆବଶ୍ୟକ ହେବ ବୋଲି ଅର୍ଥ ବିଭାଗ ପକ୍ଷରୁ କୁହାଯାଇଛି। ସେହିପରି, ଆକସ୍ମିକ ବ୍ୟୟ କ୍ଷେତ୍ରରେ ଜିଲ୍ଲାପାଳଙ୍କ ଆର୍ଥିକ କ୍ଷମତା ୧ କୋଟି ଟଙ୍କା ଓ ଅଧସ୍ଥନ କାର୍ଯ୍ୟାଳୟ ମୁଖ୍ୟଙ୍କ ଆର୍ଥିକ କ୍ଷମତା ୮ ଲକ୍ଷ ଟଙ୍କା ଧାର୍ଯ୍ୟ କରାଯାଇଛି।

ସରକାରଙ୍କ ଏହି ପଦକ୍ଷେପ ପ୍ରଶାସନିକ ବାଧାହ୍ରାସ କରିବ, କ୍ଷେତ୍ରସ୍ତରୀୟ ଅଧିକାରୀଙ୍କୁ ସଶକ୍ତ କରିବ ଓ ରାଜ୍ୟରେ ବିକାଶମୂଳକ କାର୍ଯ୍ୟକ୍ରମଗୁଡ଼ିକର କାର୍ଯ୍ୟକାରିତାକୁ ତ୍ୱରାନ୍ୱିତ କରିବ ବୋଲି ଆଶା କରାଯାଉଛି। ଶାସନରେ ଦକ୍ଷତା ବୃଦ୍ଧି ଏବଂ ସମୟାନୁବର୍ତ୍ତୀ ସେବା ପ୍ରଦାନ ପାଇଁ ଏହି ସଂସ୍କାର ପଦକ୍ଷେପ ଗ୍ରହଣ କରାଯାଇଛି ବୋଲି ଅର୍ଥ ବିଭାଗ ପକ୍ଷରୁ କୁହାଯାଇଛି।