Indonesia: ଇଣ୍ଡୋନେସିଆ ପ୍ରାକୃତିକ ବିପର୍ଯ୍ୟୟ: ୭.୪ ତୀବ୍ରତାଯୁକ୍ତ ଭୂମିକମ୍ପ

ଜାକର୍ତ୍ତା: ଉତ୍ତର-ପୂର୍ବ ଇଣ୍ଡୋନେସିଆର ମୋଲୁକ୍କା ସାଗର ଅଞ୍ଚଳରେ ଏକ ଶକ୍ତିଶାଳୀ ୭.୪ତୀବ୍ରତାଯୁକ୍ତ ଭୂମିକମ୍ପ ଅନୁଭୂତ ହୋଇଛି। ଯାହା ଫଳରେ ସମଗ୍ର ଅଞ୍ଚଳରେ ଆତଙ୍କ ଖେଳିଯାଇଛି। ଯୁକ୍ତରାଷ୍ଟ୍ର ଭୂତତ୍ତ୍ୱ ସର୍ବେକ୍ଷଣ (ୟୁଏସ୍‌ଜିଏସ୍) ଅନୁଯାୟୀ, ଗୁରୁବାର ସ୍ଥାନୀୟ ସମୟ ପ୍ରାୟ ସକାଳ ୬ଟା ୪୫ ରେ ଭୂମିକମ୍ପ ହୋଇଛି। ଭୂମିକମ୍ପ ଭୂପୃଷ୍ଠର ପ୍ରାୟ ୩୫ କିଲୋମିଟର ଗଭୀରତା ହୋଇଥିବା ରେକର୍ଡ କରାଯାଇଛି। ଏହାର କେନ୍ଦ୍ରସ୍ଥଳ ଇଣ୍ଡୋନେସିଆର ଟେର୍ନାଟେ ସହରରୁ ପ୍ରାୟ ୧୨୭ କିଲୋମିଟର ପଶ୍ଚିମ-ଉତ୍ତରପଶ୍ଚିମରେ ଅବସ୍ଥିତ ଥିବା ଭୂତତ୍ତ୍ୱ ସର୍ବେକ୍ଷଣ ସଂସ୍ଥା କହିଛି।

ଭୂମିକମ୍ପ ପରେ ସୁନାମି ଚେତାବନୀ ଜାରି କରାଯାଇଛି। ଆମେରିକା ସୁନାମି ସତର୍କତା ପ୍ରଣାଳୀ ଏକ ସତର୍କତା ଜାରି କରି କହିଛି ଯେ, ଭୂମିକମ୍ପ ସମୁଦ୍ରରେ ବିପଜ୍ଜନକ ଲହରୀ ସୃଷ୍ଟି କରିପାରେ, ଯାହା ନିକଟବର୍ତ୍ତୀ ଉପକୂଳ ଅଞ୍ଚଳକୁ ପ୍ରଭାବିତ କରିପାରେ। ଇଣ୍ଡୋନେସିଆର ଉପକୂଳ ଅଞ୍ଚଳ, ଫିଲିପାଇନ୍ସ ଏବଂ ମାଲେସିଆରେ ସୁନାମି ବିପଦକୁ ବିଶେଷ ଭାବରେ ସତର୍କ କରାଯାଇଛି। ଏଜେନ୍ସି ଅନୁଯାୟୀ, ଭୂମିକମ୍ପ କେନ୍ଦ୍ରଠାରୁ ପ୍ରାୟ ୧,୦୦୦ କିଲୋମିଟର ପରିଧି ମଧ୍ୟରେ ଥିବା ଅଞ୍ଚଳଗୁଡ଼ିକରେ ଲୋକଙ୍କୁ ସତର୍କ ରହିବାକୁ ପରାମର୍ଶ ଦିଆଯାଇଛି।

ପୂର୍ବ ଇଣ୍ଡୋନେସିଆର ଟେର୍ନାଟେ ସହର ଏବଂ ଏହାର ଆଖପାଖ ଦ୍ୱୀପପୁଞ୍ଜ ପାଇଁ ଏକ ସ୍ୱତନ୍ତ୍ର ସତର୍କ ସୂଚନା ଜାରି କରାଯାଇଛି। ସ୍ଥାନୀୟ କର୍ତ୍ତୃପକ୍ଷଙ୍କୁ ସତର୍କ କରାଯାଇଛି, ଏବଂ ଲୋକମାନଙ୍କୁ ବେଳାଭୂମିରୁ ଦୂରେଇ ରହିବାକୁ ଅନୁରୋଧ କରାଯାଇଛି। ଭୂମିକମ୍ପରେ ବଡ଼ ଧରଣର ମୃତାହତ କିମ୍ବା ସମ୍ପତ୍ତି କ୍ଷୟକ୍ଷତିର କୌଣସି ସରକାରୀ ରିପୋର୍ଟ ମିଳି ନଥିବା ବେଳେ, ପରିସ୍ଥିତି ଉପରେ କଡ଼ା ନଜର ରଖାଯାଇଛି।

ସୂଚନାଯୋଗ୍ୟ,ଇଣ୍ଡୋନେସିଆ ବିଶ୍ୱର ସବୁଠାରୁ ଅଧିକ ଭୂମିକମ୍ପ ପ୍ରବଣ ଦେଶ ମଧ୍ୟରୁ ଗୋଟିଏ। ଏହା ପୃଥିବୀର ଏକ ଅତ୍ୟନ୍ତ ଭୂକମ୍ପୀୟ କ୍ଷେତ୍ର ରିଙ୍ଗ ଅଫ୍ ଫାୟାରରେ ଅବସ୍ଥିତ। ଏହି ଅଞ୍ଚଳରେ ଅନେକ ଟେକ୍ଟୋନିକ୍ ପ୍ଲେଟ୍ ଧକ୍କା ପାଆନ୍ତି, ଯାହା ଫଳରେ ବାରମ୍ବାର ଭୂମିକମ୍ପ ଏବଂ ଜ୍ୱାଳାମୁଖୀ ଉଦ୍‌ଗିରଣ ଘଟିଥାଏ । ଏହି କାରଣରୁ ଇଣ୍ଡୋନେସିଆ ବାରମ୍ବାର ଏପରି ପ୍ରାକୃତିକ ବିପର୍ଯ୍ୟୟର ସମ୍ମୁଖୀନ ହୋଇଥାଏ।

ସୌଜନ୍ୟ ସମ୍ବାଦ