ତେହେରାନ: ଆମେରିକା-ଇସ୍ରାଏଲ ପକ୍ଷରୁ ଫେବ୍ରୁଆରି ୨୮ରେ ଇରାନ ଉପରେ ଆକ୍ରମଣ ହୋଇଥିଲା। ଆକ୍ରମଣରେ ଇରାନ ସର୍ବୋଚ୍ଚ ନେତା ଆୟାତୋଲ୍ଲା ଅଲି ଖେମିନିଙ୍କ ମୃତ୍ୟୁ ହୋଇଥିଲା। ଏଥିରେ ଆଇଆରଜିସିର ଅନେକ ଶୀର୍ଷ ଜେନେରାଲ ମଧ୍ୟ ପ୍ରାଣ ହରାଇଥିଲେ। ତେବେ ଏହି ଘଟଣା ୨୦୦୩ ମସିହାର ଇରାକ ଆକ୍ରମଣ ଘଟଣାକୁ ମନେ ପକାଇ ଦେଇଛି। ୨୦୦୩ରେ ଆମେରିକା ମାତ୍ର ଅଳ୍ପ ସମୟ ମଧ୍ୟରେ ସଦ୍ଦାମ ହୁସେନଙ୍କ ସୈନ୍ୟ ଢାଞ୍ଚାକୁ ପୂରା ନଷ୍ଟ କରିଦେଇଥିଲା।
କିନ୍ତୁ ଆମେରିକା -ଇସ୍ରାଏଲ ମିଳିତ ଆକ୍ରମଣର ୧୪ ଦିନ ପରେ ବି ଇରାନ ଏହି ଯୁଦ୍ଧରେ ଅପରାଜେୟ ଭାବେ ମଧ୍ୟପ୍ରାଚ୍ୟ ଉପରେ ଭୟଙ୍କର ପାଲଟା ଆକ୍ରମଣ ଜାରି ରଖିଛି। ଇରାନର ଏହି ଆକ୍ରମଣ ଓ ଅଦ୍ଭୁତପୂର୍ବ ପ୍ରତିରକ୍ଷା ପଛରେ ଜଣେ ବ୍ୟକ୍ତିଙ୍କ ଦୂରଦର୍ଶୀ ଓ ବିରଳ ସୈନ ରଣନୀତି ରହିଛି ବୋଲି ଚର୍ଚ୍ଚା ହେଉଛି। ସେ ହେଉଛନ୍ତି ମେଜର ଜେନେରାଲ ମହମ୍ମନ ଅଲି ଜାଫରି। ଜେନେରାଲ ଜାଫ୍ରି ୨୦୦୩ ଇରାକ ଉପରେ ଆମେରିକା ଆକ୍ରମଣକୁ ଭଲ ଭାବେ ଅଧ୍ୟୟନ କରିଥିଲେ। ସେ ଦେଖିଥିଲେ ସଦ୍ଦାମ ହୁସେନଙ୍କ ବିନା ନିର୍ଦ୍ଦେଶରେ ଇରାକ ସେନା ପାଦେ ଆଗକୁ ଘୁଞ୍ଚୁୂ ନଥିଲେ। ବାଗଦାଦ ସହିତ ସମ୍ପର୍କ ତୁଟିବା ପରେ ପୂରା ସେନା ପଙ୍ଗୁ ହୋଇଯାଇଥିଲା। ଇରାନ ଏହି ତ୍ରୁଟି ଦୋହରାଇବନି ବୋଲି ଜାଫରି ପଣ କରିଥିଲେ। ଆଇଆରଜିସିର ରଣନୈତିକ ଅଧ୍ୟୟନ କେନ୍ଦ୍ରର ପୂର୍ବତନ ନିର୍ଦ୍ଦେଶକ ଜାଫରି ୨୦୦୫ରେ ଦାୟିତ୍ବ ନେବା ପରେ ଏପରି ଏକ ଢାଞ୍ଚା ପ୍ରସ୍ତୁତ କଲେ ଯେଉଁମାନେ କି ଶେଷ ନିଃଶ୍ବାସ ପର୍ଯ୍ୟନ୍ତ ଲଢ଼ି ପାରିବେ। ଜାଫରି ମୋଜେକ ଡିଫେନ୍ସ ସିଷ୍ଟମ ଲାଗୁ କରିଥିଲେ, ଯେଉଁଥିରେ ସେ ସେନାକୁ ଛୋଟ ଛୋଟ ଦଳରେ ବିଭାଜନ କରିଥିଲେ। ଇରାନର ୩୧ ପ୍ରଦେଶରେ ୩୧ଟି ଅର୍ଦ୍ଧ ସ୍ବାୟତ୍ତ ୟୁନିଟ୍ ଗଠନ କରିଥିଲେ। ପ୍ରତ୍ୟେକ ପ୍ରାନ୍ତରେ ନିଜସ୍ବ ସ୍ବତନ୍ତ୍ର ମୁଖ୍ୟାଳୟ, ସଂଚାର ପ୍ରଣାଳୀ, କ୍ଷେପଣାସ୍ତ୍ର ଓ ଡ୍ରୋନ୍ ଭଣ୍ଡାର ଓ ଗୁପ୍ତ ସମ୍ପତ୍ତି ରହିଥିଲା। ପ୍ରାନ୍ତ କମାଣ୍ଡରଙ୍କୁ ମିଶନ ପାଇଁ ନିର୍ଦ୍ଦେଶ ଦିଆଯାଇଥିଲା। ଯଦି କୌଣସି କାରଣ ଯୋଗୁ ତେହେରାନ ସହିତ ସେମାନଙ୍କର ସମ୍ପର୍କ ତୁଟି ଯାଏ ତେବେ ସେମାନଙ୍କ ପକ୍ଷରୁ ଆକ୍ରମଣ ଜାରି ରହିବ। ୧୩ ମାର୍ଚ୍ଚର ଘଟଣା ପ୍ରମାଣିତ କରିଦେଇଛି ଯେ, ଜାଫରିଙ୍କ ଅଟୋ ପାଇଲଟ ମଡେଲ କାମ କରୁଛି। ଆମେରିକା ଇରାନର ଶୀର୍ଷ କମାଣ୍ଡରଙ୍କୁ ହତ୍ୟା କରିବା ସତ୍ତ୍ବେ ଇରାନ ଜୋରଦାର ଜବାବୀ ହାମ୍ଲା ଜାରି ରଖିଛି। ବାହାରିନ୍, କତର, ୟୁଏଇ ଓ ଜୋର୍ଡାନରେ ଥିବା ଆମେରିକା ବେସ୍ ଉପରେ କ୍ଷେପଣାସ୍ତ୍ର ଓ ଡ୍ରୋନରେ ଆକ୍ରମଣ କରିଥିଲା। ମୋଜେକ ପ୍ରତିରକ୍ଷା ଇରାନକୁ ଏହି ଯୁଦ୍ଧରେ ବିଜୟୀ ମଧ୍ୟ କରିପାରେ।
ସୌଜନ୍ୟ ସମ୍ବାଦ
