Iran Oil Exports: ବୁନ୍ଦାଏ ବି ତେଲ ଛାଡିବୁ ନାହିଁ: ଆମେରିକାକୁ ନାଲି ଆଖି ଦେଖାଇଲା ଇରାନ

ତେହେରାନ:ଇରାନ ଏବଂ ଆମେରିକା ମଧ୍ୟରେ ଉତ୍ତେଜନା କମିବାର କୌଣସି ସଙ୍କେତ ଦେଖାଯାଉନାହିଁ। ହର୍ମୁଜ୍ ପ୍ରଣାଳୀରେ ଆକ୍ରମଣ ବନ୍ଦ ହୋଇଥିଲେ ମଧ୍ୟ ଉଭୟ ପକ୍ଷରୁ ଲଗାତାର ବୟାନବାଜି ଜାରି ରହିଛି। ଫଳରେ ଉପସାଗରରେ ଉତ୍ତେଜନା ବୃଦ୍ଧି ପାଇଛି। ଇରାନର ସର୍ବୋଚ୍ଚ ସୁରକ୍ଷା ସଂସ୍ଥାର ନୂତନ ମୁଖ୍ୟ ମୋହସେନ ରେଜାଇ ସୋସିଆଲ ମିଡିଆ ପ୍ଲାଟଫର୍ମ ଏକ୍ସରେ ଇରାନର ପଡ଼ୋଶୀମାନଙ୍କୁ କଠୋର ଚେତାବନୀ ଜାରି କରିଛନ୍ତି। ତାଙ୍କ ବକ୍ତବ୍ୟକୁ ଇରାନର ସରକାରୀ ଗଣମାଧ୍ୟମ ସେୟାର କରିଛି।

ତୈଳ ରପ୍ତାନିକୁ ଅବରୋଧ

ସେ ଚେତାବନୀ ଦେଇଛନ୍ତି ଯେ,ଆମେରିକାର ନୂତନ କଠୋର ଆର୍ଥିକ ପଦକ୍ଷେପ ପାଇଁ ଯେକୌଣସି ଦେଶର ସମର୍ଥନକୁ ଇରାନ ଯୁଦ୍ଧ କାର୍ଯ୍ୟ ଭାବରେ ବିବେଚନା କରିବ। ସେ ଏହା ମଧ୍ୟ କହିଛନ୍ତି ଯେ ଯଦି ଆମେରିକାର ପ୍ରତିବନ୍ଧକ ଜାରି ରହେ, ତେବେ ଇରାନ ଉପସାଗରର ଯେକୌଣସି ସ୍ଥାନରୁ ତୈଳ ରପ୍ତାନିକୁ ଅବରୋଧ କରିବ। ଟ୍ରମ୍ପ କିଛି ପଦକ୍ଷେପ ନେଲେ ଆମେ ଜୋରଦାର ଜବାବ ଦେବୁ। ଇରାନ ପର୍ସିଆନ୍ ଗଲ୍ଫ ଦେଇ ହର୍ମୁଜ୍ ପ୍ରଣାଳୀର ବିକଳ୍ପ ଭାବରେ ବିବେଚନା କରାଯାଉଥିବା ଅନ୍ୟାନ୍ୟ ତୈଳ ପରିବହନ ମାର୍ଗଗୁଡ଼ିକୁ ଟାର୍ଗେଟ କରିବ। ଆମେ ହର୍ମୁଜ ଏବଂ ପାରସ୍ୟରୁ ବୁନ୍ଦାଏ ବି ତେଲ ବାହାରକୁ ଯିବାକୁ ଦେବୁ ନାହିଁ। ଚଳିତ ମାସରେ ଏହି ପଦବୀରେ ନିଯୁକ୍ତ ହେବା ପରେ ଏହା ରେଜାଇଙ୍କର ଦ୍ୱିତୀୟ ବଡ଼ ଚେତାବନୀ।

ସୌଜନ୍ୟ ସମ୍ବାଦ