Meta fined Rs 3500 crore: ମେଟାକୁ ୩୫୦୦ କୋଟି ଟଙ୍କା ଜରିମାନା: ପିଲାମାନଙ୍କ ପାଇଁ କ୍ଷତିକାରକ ସାଜିଛି ଫେସବୁକ୍-ଇନଷ୍ଟାଗ୍ରାମ

ନ୍ୟୁ ମେକ୍ସିକୋ: ଆମେରିକାର ନ୍ୟୁ ମେକ୍ସିକୋ ରାଜ୍ୟର ଏକ କୋର୍ଟ ସୋସିଆଲ ମିଡିଆ କମ୍ପାନି ମେଟାକୁ ପିଲାମାନଙ୍କ ମାନସିକ ସ୍ୱାସ୍ଥ୍ୟକୁ କ୍ଷତି ପହଞ୍ଚାଇବା ଏବଂ ଏହାର ପ୍ଲାଟଫର୍ମରେ ଯୌନ ନିର୍ଯାତନାମୂଳକ ବିଷୟବସ୍ତୁ ଲୁଚାଇବା ଅଭିଯୋଗ ଆଧାରରେ ଦୋଷୀ ସାବ୍ୟସ୍ତ କରିଛନ୍ତି। ପ୍ରାୟ ସାତ ସପ୍ତାହ ଧରି ଚାଲିଥିବା ବିଚାର ପରେ ଏହି ଐତିହାସିକ ରାୟ ଆସିଛି। ଏହି ରାୟକୁ ଟେକ୍ କମ୍ପାନଗୁଡ଼ିକୁ ଉତ୍ତରଦାୟୀ କରିବା ଦିଗରେ ଏକ ପ୍ରମୁଖ ପଦକ୍ଷେପ ଭାବରେ ଦେଖାଯାଉଛି। ଫେସବୁକ୍, ଇନଷ୍ଟାଗ୍ରାମ୍ ଏବଂ ହ୍ୱାଟ୍ସଆପ୍ ପରିଚାଳନା କରୁଥିବା ମେଟା ସୁରକ୍ଷା ଅପେକ୍ଷା ଲାଭକୁ ପ୍ରାଥମିକତା ଦେଇଛି ଏବଂ ରାଜ୍ୟର ଅନଫେୟାର ପ୍ରାକ୍ଟିସ୍ ଆକ୍ଟର ଉଲ୍ଲଂଘନ କରିଛି ବୋଲି ଖଣ୍ଡପୀଠ ଜାଣିପାରିଛନ୍ତି। କମ୍ପାନି ପିଲାମାନଙ୍କ ଦୁର୍ବଳତାର ସୁଯୋଗ ନେଇ ପ୍ଲାଟଫର୍ମର ବିପଦ ବିଷୟରେ ଭ୍ରାମକ ଦାବି କରିଛି ବୋଲି ବିଚାରକ ମଣ୍ଡଳୀ କହିଛନ୍ତି।

ପ୍ରତ୍ୟେକ ଉଲ୍ଲଂଘନକୁ ପୃଥକ ଭାବରେ ବିଚାର କରି କୋର୍ଟ ମୋଟ ୩୭୫ ନିୟୁତ ଡଲାର (୩୫,୨୦୦କୋଟି ଟଙ୍କା) ଜରିମାନା ଲଗାଇଛନ୍ତି। ଏହି ପରିମାଣ ପ୍ରସିକ୍ୟୁସନର ଅନୁରୋଧ ଅପେକ୍ଷା ଯଥେଷ୍ଟ କମ୍ ବୋଲି ବିଚାରକ ମଣ୍ଡଳୀ କହିଛନ୍ତି।। କୋର୍ଟ ସ୍ୱୀକାର କରିଛନ୍ତି ଯେ, ମେଟାର ପ୍ଲାଟଫର୍ମ ଯୋଗୁ ହଜାର ହଜାର ପିଲା ପ୍ରଭାବିତ ହୋଇଛନ୍ତି। ରାୟ ପରେ ମେଟାର ସେୟାର ପ୍ରାୟ ୫% ବୃଦ୍ଧି ପାଇଛି, ଯାହା ସୂଚାଇ ଦେଉଛି ଯେ, ନିବେଶକମାନେ କୋର୍ଟଙ୍କ ରାୟ ନେଇ ଚିନ୍ତିତ ନାହାନ୍ତି। ଏହି ରାୟ କେବଳ ଉତ୍ତରଦାୟିତ୍ୱ ନିର୍ଣ୍ଣୟ କରିଛି। ମେଟାର ସେବାଗୁଡ଼ିକୁ ସାର୍ବଜନୀନ କ୍ଷତି ବୋଲି ବିବେଚନା କରାଯିବ କି ନାହିଁ ଏବଂ କମ୍ପାନିକୁ ଶିଶୁ ସୁରକ୍ଷା କାର୍ଯ୍ୟକ୍ରମ ପାଇଁ ଦେୟ ଦେବାକୁ ପଡିବ କି ନାହିଁ ତାହା ବିଚାରପତିଙ୍କ ଉପରେ ନିର୍ଭର କରିବ। ଏହି ପର୍ଯ୍ୟାୟ ମେ‘ ମାସରେ ଆରମ୍ଭ ହେବ। ମେଟା ଘୋଷଣା କରିଛି, ଆମେ ରାୟ ବିରୋଧରେ ଆବେଦନ କରିବୁ। କମ୍ପାନି କହିଛି, ଆମେ ସୁରକ୍ଷାକୁ ଉନ୍ନତ କରିବା ପାଇଁ ନିରନ୍ତର କାର୍ଯ୍ୟ କରୁଛୁ। କ୍ଷତିକାରକ ବିଷୟବସ୍ତୁକୁ ସମ୍ପୂର୍ଣ୍ଣ ଭାବରେ ଅବରୋଧ କରିବା ଏକ ଆହ୍ବାନମୂଳକ କାର୍ଯ୍ୟ।

ମେଟା ଏପରି ବୈଶିଷ୍ଟ୍ୟ ନିଶା ସୃଷ୍ଟି କରୁଛି

ନ୍ୟୁ ମେକ୍ସିକୋର ଆଟର୍ଣ୍ଣି ଜେନେରାଲ କହିଛନ୍ତି, କମ୍ପାନିର ପ୍ଲାଟଫର୍ମଗୁଡ଼ିକ ପିଲାମାନଙ୍କୁ ଅଧିକ ସମୟ ପାଇଁ ନିୟୋଜିତ ରଖିବା ପାଇଁ ଆଲଗୋରିଦମ ଚଲାଇଥାଏ, ଯାହା ବିପଦକୁ ବୃଦ୍ଧି କରେ। ମେଟା ଏପରି ବୈଶିଷ୍ଟ୍ୟ ଡିଜାଇନ୍ କରିଛି ଯାହା ଯୁବପିଢ଼ିଙ୍କ ଉପରେ ନିଶା ସୃଷ୍ଟି କରୁଛି ଏବଂ ଏନେଇ ଜଡିତ ବିପଦକୁ ଲୁଚାଇ ରଖିଛି। ଏହି ମାମଲାରେ, ଏଜେନ୍ସିଗୁଡ଼ିକ ପିଲାମାନଙ୍କ ନାମରେ ସୃଷ୍ଟି ହୋଇଥିବା ନକଲି ପ୍ରୋଫାଇଲ୍ ବ୍ୟବହାର କରିଥିଲେ, ଯାହା ଯୌନ ନିର୍ଯାତନାପୂର୍ଣ୍ଣ ମେସେଜ୍ ପାଇଥିଲା। ସେଭଳି କ୍ଷେତ୍ରରେ ମେଟାର ପ୍ରତିକ୍ରିୟା ଅପର୍ଯ୍ୟାପ୍ତ ଥିବା ଦେଖାଯାଇଥିଲା।ପୂର୍ବରୁ ଆମେରିକାର ୪୦ ରୁ ଅଧିକ ରାଜ୍ୟ ମେଟା ବିରୋଧରେ ମାମଲା ଦାୟର କରି ଦାବି କରିଛନ୍ତି ଯେ, ସୋସିଆଲ ମିଡିଆ ପ୍ଲାଟଫର୍ମ ଯୁବପିଢ଼ିଙ୍କ ମାନସିକ ସ୍ୱାସ୍ଥ୍ୟକୁ ଗମ୍ଭୀର ଭାବରେ କ୍ଷତି ପହଞ୍ଚାଉଛି। ସୋସିଆଲ ମିଡିଆ ସହିତ ଜଡିତ ଅନେକ ଅଭିଭାବକ ଗୋଷ୍ଠୀ ଏହି ନିଷ୍ପତ୍ତିକୁ ଏକ ଐତିହାସିକ ରାୟ ବୋଲି କହିଛନ୍ତି। ଏହା ପିଲାମାନଙ୍କୁ ଅନଲାଇନ୍ ବିପଦରୁ ସୁରକ୍ଷା ଦେବା ପାଇଁ ଲଢ଼େଇରେ ଏକ ବଡ଼ ପଦକ୍ଷେପ ଅଭିହିତ କରିଛନ୍ତି।

ସୌଜନ୍ୟ ସମ୍ବାଦ