ନୂଆଦିଲ୍ଲୀ: ଚଳିତ ବର୍ଷ ଶେଷ ଭାଗରେ ଭାରତରେ ବ୍ରିକ୍ସ ଦେଶମାନଙ୍କ ବାର୍ଷିକ ସମ୍ମିଳନୀ ବୈଠକ ଅନୁଷ୍ଠିତ ହେବା ପୂର୍ବରୁ ବ୍ରିକ୍ସ ଦେଶମାନଙ୍କ ବୈଦେଶିକ ମନ୍ତ୍ରୀଙ୍କ ବୈଠକ ମେ ୧୪ ଓ ୧୫ ତାରିଖରେ ନୂଆଦିଲ୍ଲୀରେ ଅନୁଷ୍ଠିତ ହେଉଛି। ବିଦେଶ ମନ୍ତ୍ରୀ ଏସ୍ ଜୟଶଙ୍କର ଏହି ବୈଠକରେ ଅଧ୍ୟକ୍ଷତା କରିବେ। ତେବେ ବ୍ରିକ୍ସ ବୈଠକ ଆରମ୍ଭ ହେବା ପୂର୍ବରୁ ଏହା ଉପରେ ଇରାନ-ଆମେରିକା ଯୁଦ୍ଧର ପ୍ରଭାବ ଦେଖିବାକୁ ମିଳିଛି। ଇରାନ ବିଦେଶ ମନ୍ତ୍ରୀ ଅବାସ ଆରାଘଚି ବୈଠକରେ ଭାଗ ନେବାକୁ ବୁଧବାର ନୂଆଦିଲ୍ଲୀରେ ଆସି ପହଞ୍ଚିଥିଲେ। ଗୁରୁବାର ବିଦେଶ ମନ୍ତ୍ରୀ ଜୟଶଙ୍କର ଆରାଘଚିଙ୍କୁ ଭେଟିଥିଲେ। ଦୁହେଁ ହାତ ମିଳାଇବା ସହିତ କିଛି ସମୟ କଥା ହୋଇଥିଲେ।
ଜୟଶଙ୍କରଙ୍କୁ ଭେଟିଲେ ଆରାଘଚି
ଏହାପୂର୍ବରୁ ଆରାଘଚିଙ୍କୁ ଭାରତରେ ସ୍ବାଗତ କରାଯାଇଥିଲା। ବିଦେଶ ମନ୍ତ୍ରଣାଳୟର ପ୍ରବକ୍ତା ରଣଧୀର ଜୟସ୍ବାଲ ‘ଏକ୍ସ’ରେ ଏକ ପୋଷ୍ଟ କରି ଆରାଘଚିଙ୍କୁ ସ୍ବାଗତ କରିଛନ୍ତି। ତେବେ ଆରାଘଚି ଯେଉଁ ବିମାନରେ ଭାରତ ପହଞ୍ଚିଛନ୍ତି, ତାକୁ ନେଇ ଏବେ ଚର୍ଚ୍ଚା ଚାଲିଛି। ଆରାଘଚି ଆସିଥିବା ବିମାନର ନାମ ‘ମିନାବ ୧୬୮’ ରହିଛି। ଆମେରିକା-ଇରାନ ଯୁଦ୍ଧରେ ଇରାନର ମିନାବର ଏକ ସ୍କୁଲ ଉପରେ ଆମେରିକାର ଆକ୍ରମଣରେ ୧୬୮ ଜଣ ଝିଅଙ୍କ ମୃତ୍ୟୁକୁ ଏହା ଦର୍ଶାଉଛି। ମିନାବ ୧୬୮ ବିମାନ ଇରାନ ପାଇଁ ଏକ ଶକ୍ତିଶାଳୀ ପ୍ରତୀକ ପାଲଟି ଯାଇଛି। ତେହେରାନ ଏହାକୁ ଇରାନର ନାଗରିକଙ୍କ ଉପରେ ଆମେରିକା-ଇସ୍ରାଏଲର ଆକ୍ରମଣର ପ୍ରମାଣ ଭାବେ ଉପସ୍ଥାପନ କରୁଛି।
‘ବ୍ରିକ୍ସ’ ବିଦେଶ ମନ୍ତ୍ରୀଙ୍କ ବୈଠକରେ ଅଂଶଗ୍ରହଣ କରିବେ
ଇରାନ ବିବାଦ ଓ ବ୍ରିକ୍ସ ବ୍ଲକ୍ର ଭବିଷ୍ୟତ ଦିଗକୁ ନେଇ ବିଭାଜନ ଗଭୀର ହେଉଥିବାରୁ ବ୍ରିକ୍ସ ସଦସ୍ୟ ଓ ଅଂଶୀଦାର ଦେଶଗୁଡ଼ିକର ବୈଦେଶିକ ମନ୍ତ୍ରୀ ଓ ବରିଷ୍ଠ ପ୍ରତିନିଧିମଣ୍ଡଳୀ ଏହି ସମାବେଶରେ ଯୋଗଦେବେ ବୋଲି ଆଶା କରାଯାଉଛି। ଇରାନ ବ୍ରିକ୍ସ ଦେଶମାନଙ୍କୁ ବିଶେଷକରି ବ୍ରିକ୍ସର ଅଧ୍ୟକ୍ଷ ଥିବା ଭାରତକୁ ଆମେରିକା-ଇସ୍ରାଏଲ ସାମରିକ ଅଭିଯାନ ବିରୋଧରେ ଦୃଢ଼ କୂଟନୈତିକ ଆଭିମୁଖ୍ୟ ଗ୍ରହଣ କରିବାକୁ ଚାପ ପକାଇ ଆସୁଛି। ଗତ ମାସରେ ଉପସାଗରରେ ଶକ୍ତି ଭିତ୍ତିଭୂମି ଉପରେ ଆକ୍ରମଣ ସହିତ ଜଡିତ ଅଭିଯୋଗକୁ ନେଇ ଇରାନ ଓ ସଂଯୁକ୍ତ ଆରବ ଏମିରେଟ୍ସ ମଧ୍ୟରେ ମତଭେଦ ଦେଖାଦେବା ପରେ ବ୍ରିକ୍ସ ଅଧିକାରୀମାନେ ଏହି ବିବାଦ ଉପରେ ଏକ ମିଳିତ ବିବୃତି ଜାରି କରିପାରି ନଥିଲେ। କୂଟନୀତିଜ୍ଞମାନେ କହିଛନ୍ତି ଯେ ସେହି ମତଭେଦ ବୈଦେଶିକ ମନ୍ତ୍ରୀଙ୍କ ସମ୍ମିଳନୀ ପୂର୍ବରୁ ଏକ ସହମତି ସ୍ଥିତି ଗଠନ କରିବା ପାଇଁ ଭାରତର ପ୍ରୟାସକୁ ଜଟିଳ କରିଥିଲା। ବିବାଦର ସମାଧାନ ପାଇଁ ସ୍ୱାଧୀନ ଭୂମିକା ଗ୍ରହଣ କରିବାକୁ ତେହେରାନ ପୂର୍ବରୁ ନୂଆଦିଲ୍ଲୀକୁ ଅନୁରୋଧ କରିଥିଲା। ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ବେଜିଂ ଗସ୍ତ ଯୋଗୁଁ ଚୀନର ଶୀର୍ଷ କୂଟନୀତିଜ୍ଞ ୱାଙ୍ଗ ୟି ବ୍ରିକ୍ସ ସମ୍ମିଳନୀରେ ଯୋଗ ଦେବେ ନାହିଁ। ଭାରତରେ ଅବସ୍ଥାପିତ ଚୀନ୍ ରାଷ୍ଟ୍ରଦୂତ ଜୁ ଫେଇହୋଙ୍ଗଙ୍କୁ ବୈଠକରେ ବେଜିଂର ପ୍ରତିନିଧିତ୍ବ କରିବେ। ରୁଷ୍ ବୈଦେଶିକ ମନ୍ତ୍ରୀ ସର୍ଗେ ଲାଭରୋଭ ବୈଠକରେ ସାମିଲ ହେବା ନେଇ ନିଶ୍ଚିତ କରିଛନ୍ତି। ଏହି ଗସ୍ତ ସମୟରେ ବୈଦେଶିକ ମନ୍ତ୍ରୀମାନେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ମଧ୍ୟ ଭେଟିବାର କାର୍ଯ୍ୟକ୍ରମ ରହିଛି।
ସୌଜନ୍ୟ ସମ୍ବାଦ