ନୂଆଦିଲ୍ଲୀ: ଦେଶର ପ୍ରମୁଖ ସହରଗୁଡ଼ିକରେ ପେଟ୍ରୋଲ ଓ ଡିଜେଲ ମୂଲ୍ୟ ପୁଣି ଥରେ ବୃଦ୍ଧି ପାଇଛି, ଯାହା ଗତ ଏକ ସପ୍ତାହ ମଧ୍ୟରେ ଦ୍ୱିତୀୟ ବଡ଼ ଦରବୃଦ୍ଧି ଅଟେ। ସୋମବାର ତୈଳ କମ୍ପାନୀଗୁଡ଼ିକ ଖୁଚୁରା ମୂଲ୍ୟରେ ସଂଶୋଧନ କରିବା ପରେ ରାଜଧାନୀ ନୂଆଦିଲ୍ଲୀରେ ପେଟ୍ରୋଲ ୮୭ ପଇସା ମହଙ୍ଗା ହୋଇ ଲିଟର ପିଛା ୯୮.୬୪ ଟଙ୍କାରେ ପହଞ୍ଚିଛି। ସେହିପରି ଡିଜେଲ ଦର ମଧ୍ୟ ୯୧ ପଇସା ବୃଦ୍ଧି ପାଇ ଲିଟର ପିଛା ୯୧.୫୮ ଟଙ୍କା ହୋଇଯାଇଛି। ଗତ ଶୁକ୍ରବାର ଦେଶବ୍ୟାପୀ ଲିଟର ପିଛା ୩ ଟଙ୍କା ବୃଦ୍ଧି ପରେ ପୁଣି ଦରବୃଦ୍ଧି ସାଧାରଣ ଖାଉଟିଙ୍କ ପରିବହନ ଓ ଘରୋଇ ବଜେଟ୍ ଉପରେ ବୋଝ ଆହୁରି ବଢ଼ାଇ ଦେଇଛି। ଦେଶର ଚାରୋଟି ମହାନଗର ମଧ୍ୟରେ କୋଲକାତାରେ ପେଟ୍ରୋଲ ସବୁଠାରୁ ମହଙ୍ଗା (୯୬ ପଇସା ବୃଦ୍ଧି ସହ ୧୦୯ଟଙ୍କା ୭୦ ପଇସା) ହୋଇଥିବା ବେଳେ ଚେନ୍ନାଇରେ ଏହା ୧୦୪.୪୯ ଟଙ୍କାରେ ପହଞ୍ଚିଛି।

ବ୍ୟାରେଲ ପିଛା ୧୧୧ ଆମେରିକୀୟ ଡଲାର ପାର୍

ଏହି କ୍ରମାଗତ ତେଲ ଦର ବୃଦ୍ଧି ପଛରେ ବିଶ୍ୱ ବଜାରର ଦୁଇଟି ବଡ଼ କାରଣ ରହିଛି। ପ୍ରଥମତଃ, ମଧ୍ୟପ୍ରାଚ୍ୟରେ ଜାରି ରହିଥିବା ଯୁଦ୍ଧ ଏବଂ ”ହର୍ମୁଜ ପ୍ରଣାଳୀ”ରେ ସୃଷ୍ଟି ହୋଇଥିବା ବାଧା ଯୋଗୁଁ ଆନ୍ତର୍ଜାତୀୟ ବଜାରରେ ଅଶୋଧିତ ତୈଳ ଦର ବ୍ୟାରେଲ ପିଛା ୧୧୧ ଆମେରିକୀୟ ଡଲାର ପାର୍ କରିଯାଇଛି। ଦ୍ୱିତୀୟତଃ, ଋଷିଆରୁ ସାମୁଦ୍ରିକ ପଥରେ ଆସୁଥିବା ଶସ୍ତା ତେଲ ଉପରେ ଆମେରିକାର ଡୋନାଲ୍ଡ ଟ୍ରମ୍ପ ପ୍ରଶାସନ ପକ୍ଷରୁ ମିଳିଥିବା କଟକଣା କୋହଳ ଅବଧି ଗତ ଶନିବାର ସମାପ୍ତ ହୋଇଯାଇଛି। ଗତ ଦୁଇ ବର୍ଷ ହେବ ଭାରତ ଋଷିଆରୁ ରିହାତି ଦରରେ ତେଲ ଆମଦାନୀ କରି ନିଜର ଆର୍ଥିକ ସନ୍ତୁଳନ ରକ୍ଷା କରୁଥିଲା। ଏହି ସୁବିଧା ବନ୍ଦ ହେବା ଯୋଗୁଁ ଏବଂ ଭାରତ ନିଜର ୮୫% ତେଲ ଆମଦାନୀ କରୁଥିବାରୁ ତୈଳ କମ୍ପାନୀଗୁଡ଼ିକ ଘରୋଇ ବଜେଟ୍ ସଂଶୋଧନ କରିବାକୁ ବାଧ୍ୟ ହୋଇଛନ୍ତି। ଏହି ଦରବୃଦ୍ଧି କେବଳ ପେଟ୍ରୋଲ ପମ୍ପରେ ସୀମିତ ନରହି ଖାଦ୍ୟ ସାମଗ୍ରୀ, ବିମାନ ଯାତ୍ରା ଓ ମାଲ୍ ପରିବହନ ଖର୍ଚ୍ଚ ବଢ଼ାଇବା ସହ ଦେଶରେ ସାମଗ୍ରିକ ମୁଦ୍ରାସ୍ଫୀତି ବୃଦ୍ଧିର ଆଶଙ୍କା ସୃଷ୍ଟି କରିଛି।

ସୌଜନ୍ୟ ସମ୍ବାଦ