Rohit Sharma ହିଟମ୍ୟାନ୍‌ ବ୍ୟାକ୍‌: IPL 2027 ରେ କ୍ୟାପ୍ଟେନ ଅବତାରରେ ଫେରିବେ ରୋହିତ !

ରୋହିତ ଶର୍ମାଙ୍କ ନେତୃତ୍ୱରେ ମୁମ୍ବାଇ ଇଣ୍ଡିଆନ୍ସ ୨୦୧୩, ୨୦୧୫, ୨୦୧୭, ୨୦୧୯ ଓ ୨୦୨୦ରେ ଆଇପିଏଲ୍‌ ଟ୍ରଫି ଜିତିଥିଲା । ଏହି ସଫଳତା ତାଙ୍କୁ ଫ୍ରାଞ୍ଚାଇଜିର ସବୁଠାରୁ ସଫଳ ଅଧିନାୟକଙ୍କ ମଧ୍ୟରେ ସ୍ଥାନ ଦେଇଛି । ତେବେ ୨୦୨୪ ସିଜନ୍‌ ପୂର୍ବରୁ ରୋହିତଙ୍କ ସ୍ଥାନରେ ହାର୍ଦ୍ଦିକ ପାଣ୍ଡ୍ୟାଙ୍କୁ ଅଧିନାୟକ କରାଯାଇଥିଲା । ହାର୍ଦ୍ଦିକଙ୍କ ପ୍ରଥମ ସିଜନ୍‌ରେ ମୁମ୍ବାଇ ପଏଣ୍ଟ ଟେବୁଲ୍‌ର ଶେଷ ସ୍ଥାନରେ ରହିଥିଲା । ୨୦୨୫ରେ ଦଳ ପ୍ଲେଅଫ୍‌କୁ ଫେରିଥିଲେ ମଧ୍ୟ ଟ୍ରଫି ଜିତିପାରି ନଥିଲା । ଏବେ ରୋହିତଙ୍କୁ ପୁଣି ନେତୃତ୍ୱ ଦେବା ନେଇ ରିପୋର୍ଟ ପ୍ରକାଶ ପାଇବା ପରେ ଚର୍ଚ୍ଚା ବଢ଼ିଛି ।

ରୋହିତଙ୍କ ସମ୍ଭାବ୍ୟ ପ୍ରତ୍ୟାବର୍ତ୍ତନ ମଧ୍ୟରେ ହାର୍ଦ୍ଦିକଙ୍କ ଭବିଷ୍ୟତକୁ ନେଇ ଆଲୋଚନା ଚାଲିଛି । କୋଲକାତା ନାଇଟ୍‌ ରାଇଡର୍ସ ଓ ରାଜସ୍ଥାନ ରୟାଲ୍ସ ସହ ତାଙ୍କ ନାମ ଯୋଡ଼ାଯାଇଥିବା ରିପୋର୍ଟ ରହିଛି । ରାଜସ୍ଥାନ ସହ ହାର୍ଦ୍ଦିକଙ୍କୁ ନେଇ ସମ୍ଭାବ୍ୟ ଟ୍ରେଡ୍‌ ଆଲୋଚନା ହୋଇଥିବା ମଧ୍ୟ କୁହାଯାଉଛି । ଏଥିରେ ଯଶସ୍ୱୀ ଜୟସ୍ୱାଲଙ୍କ ନାମ ଚର୍ଚ୍ଚାକୁ ଆସିଛି । ଯଦି ଏପରି ଟ୍ରେଡ୍‌ ହୁଏ, ତେବେ ମୁମ୍ବାଇ ଜଣେ ଯୁବ ଭାରତୀୟ ଓପନର୍‌ଙ୍କୁ ପାଇପାରେ । କିନ୍ତୁ ଏପର୍ଯ୍ୟନ୍ତ କୌଣସି ଟ୍ରେଡ୍‌ ନେଇ ଅଧିକାରିକ ଘୋଷଣା ହୋଇନାହିଁ ।