Puri Jagannath: ରତ୍ନଭଣ୍ଡାର ଗଣତିମଣତିର ପରବର୍ତ୍ତୀ ପର୍ଯ୍ୟାୟ କେବେ ଆରମ୍ଭ ହେବ ଜଣାଇ ଦିଆଯିବ: ଶ୍ରୀମନ୍ଦିର ମୁଖ୍ୟ ପ୍ରଶାସକ

ଆଜି ସକାଳ ଧୂପ ପରେ ୧୧ଟା ୩୦ ମିନିଟ୍‌ରେ ସ୍ବତନ୍ତ୍ର ଦଳ ଶ୍ରୀମନ୍ଦିର ଭିତରେ ପ୍ରବେଶ କରିଥିଲେ। ଠିକ୍‌ ୭ଟା ୫୩ ମିନିଟ୍‌ରେ ଗଣତି ଶେଷ ହୋଇଥିଲା। ଭିତରେ ଥିବା ୬ଟି ଆଲମାରିରୁ ଏବେ ୫ମ ଆଲମାରି ରତ୍ନ ଗଣତି ଚାଲିଛି। ସବୁ ରତ୍ନର ଫଟୋଗ୍ରାଫି, ଭିଡିଓଗ୍ରାଫି, ଥ୍ରିଡି ମ୍ୟାପିଂ ସହ କାଟାଲଗ୍‌ ପ୍ରସ୍ତୁତ କରାଯାଉଛି। ରତ୍ନ ବିଶାରଦଙ୍କ ଦ୍ବାରା ରତ୍ନପଥରଗୁଡ଼ିକ ଚିହ୍ନଟ ହେଉଥିବାରୁ ଗୋଟିଏ ଗୋଟିଏ ରତ୍ନ ପରୀକ୍ଷା କରି ଗଣତି କରିବାକୁ ଘଣ୍ଟାଏ ଲାଗୁଛି। ଅତିରିକ୍ତ ବ୍ୟବସ୍ଥାବଳୀ ଆଧାରରେ ସମ୍ପୂର୍ଣ୍ଣ ନିର୍ଭୁଲ୍‌ ଭାବରେ ପକ୍ରିୟା ଜାରି ରହିଥିବା ସେ କହିଛନ୍ତି।

ଗତକାଲି ରତ୍ନ ଭଣ୍ଡାର ଭିତରେ ଥିବା ତିନିଟି କାଠବାକ୍ସର ମାପ ନିଆଯାଇଥିଲା। ସେହି ମାପରେ ନୂଆ ବାକ୍ସ ତିଆରି ହେବ। କାଠବାକ୍ସରୁ ରତ୍ନ ଗଣା ସରିବା ପରେ ନୂଆ ବାକ୍ସରେ ରଖାଯିବ। ଆଲମାରିରୁ ଗଣତି ସରିଯିବା ପରେ ଏହି କାଠବାକ୍ସ ଖୋଲାଯିବ। କାଠବାକ୍ସକୁ ଖୋଲି ଅଳଙ୍କାର ଗଣତି କରିବା ଭିତର ରତ୍ନଭଣ୍ଡାରର ସୀମିତ ଜାଗାରେ ସମ୍ଭବ ନ ଥିବାରୁ ଏହାକୁ ଖଟଶେଜ ଘରେ ଗଣତି କରାଯିବ। ଏଣୁ ଏହି ଖଟଶେଜ ଘରକୁ ତା ପୂର୍ବରୁ ପ୍ରସ୍ତୁତ କରାଯାଉଛି।

ଏହି ପକ୍ରିୟାରେ ଉଚ୍ଚସ୍ତରୀୟ କମିଟି ଅଧ୍ୟକ୍ଷ ଡ. ବିଶ୍ବନାଥ ରଥ, ଅଧିକୃତ ସେବକ, ଛତିଶା ନିଯୋଗ ନାୟକ, ତଢ଼ଉକରଣ, ଦେଉଳକରଣ, ଭଣ୍ଡାର ମେକାପ ସେବକ, ପରିଚାଳନା କମିଟି ସଦସ୍ୟ ଓ ଯେଉଁମାନେ ଅଧିକୃତ ବ୍ୟକ୍ତିବିଶେଷ ଅଛନ୍ତି ସମସ୍ତେ ସମର୍ପଣ ଭାବ ନେଇ ସହଯୋଗ କରୁଛନ୍ତି ବୋଲି କହିଛନ୍ତି ଡ. ପାଢ଼ୀ।