Reserve Bank Gold Transfer: ବଦଳୁଥିବା ଭୂରାଜନୈତିକ ପରିସ୍ଥିତିରେ ସମସ୍ତେ ସୁନା ଗଚ୍ଛିତ କରି ରଖିବାକୁ ଗୁରୁତ୍ୱ ଦେଉଛନ୍ତି। ଏଥିରେ ଭାରତ ବି ପଛରେ ପଡ଼ି ନାହିଁ। ଆର୍‌ବିଆଇ ଏକ ବଡ଼ ପଦକ୍ଷେପ ନେଇ ୧୦୪.୨୩ ମେଟ୍ରିକ ଟନ ଦେଶର ସୁନା ଭଣ୍ଡାରକୁ ସ୍ଥାନାନ୍ତର କରିଛି।

୨୦୨୬ ମାର୍ଚ୍ଚରେ ଶେଷ ହୋଇଥିବା ୬ ମାସରେ ଆର୍‌ବିଆଇ ଏହାର ବୈଦେଶିକ ଭଣ୍ଡାରରୁ ଘରୋଇ ବଜାରକୁ ୧୦୪.୨୩ ମେଟ୍ରିକ୍ ଟନ୍ ସୁନା ସ୍ଥାନାନ୍ତର କରିଛି। ବ୍ୟାଙ୍କର ଅର୍ଦ୍ଧବାର୍ଷିକ ବୈଦେଶିକ ମୁଦ୍ରା ରିପୋର୍ଟରେ ଏହି ସୂଚନା ଦିଆଯାଇଛି।

ଏହାର ଅର୍ଥ ହେଉଛି ଭାରତୀୟ ରିଜର୍ଭ ବ୍ୟାଙ୍କ (RBI) ଏହାର କୋଷାଗାରରୁ ୧୦୪.୨୩ ମେଟ୍ରିକ୍ ଟନ୍ ସୁନା ଭାରତକୁ (ଦେଶ ଭିତରେ) ଫେରାଇ ଆଣିଛି। ସାଧାରଣତଃ, ବିଶ୍ୱର ଦେଶଗୁଡ଼ିକ ସୁରକ୍ଷା କିମ୍ବା ବାଣିଜ୍ୟ ଉଦ୍ଦେଶ୍ୟରେ ସେମାନଙ୍କର କିଛି ସୁନା ବିଦେଶରେ (ଯେପରିକି ‘ବ୍ୟାଙ୍କ ଅଫ୍ ଇଂଲଣ୍ଡ’ର ସୁରକ୍ଷିତ ଭଣ୍ଡାରରେ) ରଖନ୍ତି। ଆବଶ୍ୟକ ସ୍ଥଳେ ସେଗୁଡ଼ିକୁ ଦେଶ ଭିତରକୁ ଅଣାଯାଏ। ଆଉ ବର୍ତ୍ତମାନର ପରିସ୍ଥିତିରେ ଗୁରୁତ୍ୱକୁ ଦେଖି ଭାରତ ସୁନା ନିଜ ଦେଶକୁ ଫେରାଇ ଆଣିବାକୁ ଚେଷ୍ଟା କରୁଛି।

ସମ୍ବାଦ ସରବରାହ ସଂସ୍ଥା ପିଟିଆଇ ଅନୁଯାୟୀ, ୨୦୨୬ ମାର୍ଚ୍ଚ ଶେଷରେ ଆରବିଆଇର ମୋଟ ସୁନା ଭଣ୍ଡାର ସାମାନ୍ୟ ବୃଦ୍ଧି ପାଇ ୮୮୦.୫୨ ମେଟ୍ରିକ୍ ଟନ୍ ହୋଇଛି, ଯାହା ସେପ୍ଟେମ୍ବର ୨୦୨୫ ଶେଷରେ ୮୮୦.୧୮ ମେଟ୍ରିକ୍ ଟନ୍ ଥିଲା।

RBIରିପୋର୍ଟରେକେଉଁ ସୂଚନା ଦିଆଯାଇଛି?

(୧) ରିପୋର୍ଟରେ କୁହାଯାଇଛି ଯେ ମାର୍ଚ୍ଚ ୨୦୨୬ରେ ଘରୋଇ ସ୍ତରରେ ସୁନାର ପରିମାଣ ୨୯୦.୩୭ ମେଟ୍ରିକ୍ ଟନ୍ ଥିଲା, ଯାହା ଗତ ବର୍ଷ ସେପ୍ଟେମ୍ବରରେ ୫୭୫.୮୨ ମେଟ୍ରିକ୍ ଟନ୍ ଏବଂ ମାର୍ଚ୍ଚ ୨୦୨୫ରେ ୫୧୧.୯୯ ମେଟ୍ରିକ୍ ଟନ୍ ଥିଲା।
(୨) ଏହା ମଧ୍ୟ କୁହାଯାଇଛି ଯେ ୧୯୭.୬୭ ମେଟ୍ରିକ୍ ଟନ୍ ସୁନା ବ୍ୟାଙ୍କ ଅଫ୍ ଇଂଲଣ୍ଡ ଏବଂ ବ୍ୟାଙ୍କ ଫର୍ ଇଣ୍ଟରନ୍ୟାସନାଲ୍ ସେଟେଲମେଣ୍ଟ୍ସ (BIS) ପାଖରେ ସୁରକ୍ଷିତ ହେପାଜତରେ ରଖାଯାଇଥିଲା। ସେହିପରି ମାର୍ଚ୍ଚ ୨୦୨୬ ସୁଦ୍ଧା ୨.୮୦ ମେଟ୍ରିକ୍ ଟନ୍ ସୁନା ସୁନା ଭଣ୍ଡାର ଭାବରେ ରଖାଯାଇଥିଲା
​​​​​​​(୩) ସେପ୍ଟେମ୍ବର ମାସରେ, ଆରବିଆଇ ରିପୋର୍ଟ ଅନୁସାରେ ବ୍ୟାଙ୍କ ଅଫ୍ ଇଂଲଣ୍ଡ ଏବଂ BIS ପାଖରେ ୨୯୦.୩୭ ମେଟ୍ରିକ୍ ଟନ୍ ସୁନା ଥିଲା,ଓ ୧୩.୯୯ ମେଟ୍ରିକ୍ ଟନ୍ ସୁନା ଭଣ୍ଡାର ଆକାରେ ରହିଥିଲା।
(୪) ବର୍ତ୍ତମାନ ଏହି ମୂଲ୍ୟବାନ ଧାତୁର ମୂଲ୍ୟ ବୃଦ୍ଧି ଯୋଗୁ ଭାରତର ବୈଦେଶିକ ମୁଦ୍ରା ଭଣ୍ଡାରରେ ସୁନାର ଅଂଶ ମାର୍ଚ୍ଚ ମାସରେ ୧୬.୭ ପ୍ରତିଶତକୁ ବୃଦ୍ଧି ପାଇଛି, ଯାହା ୬ ମାସ ପୂର୍ବେ ୧୩.୯୨ ପ୍ରତିଶତ ଥିଲା।

ବିଦେଶରେ କେତେ ନିବେଶ ହୋଇଛି?

ଆରବିଆଇର ରିପୋର୍ଟ ଅନୁସାରେ, ମୋଟ ୫୫୨.୨୮ ବିଲିୟନ ଆମେରିକୀୟ ଡଲାରର ବୈଦେଶିକ ମୁଦ୍ରା ସମ୍ପତ୍ତି ମଧ୍ୟରୁ ୪୬୫.୬୧ ବିଲିୟନ ଆମେରିକୀୟ ଡଲାର ସିକ୍ୟୁରିଟିଜରେ ନିବେଶ କରାଯାଇଛି। ୪୬.୮୩ ବିଲିୟନ ଆମେରିକୀୟ ଡଲାର ଅନ୍ୟ କେନ୍ଦ୍ରୀୟ ବ୍ୟାଙ୍କ ଏବଂ BIS ରେ ଜମା ହୋଇଥିବା ବେଳେ ବାକି ୩୯.୮୪ ବିଲିୟନ ଆମେରିକୀୟ ଡଲାର ବିଦେଶର ବାଣିଜ୍ୟିକ ବ୍ୟାଙ୍କଗୁଡିକରେ ଜମା ରଖାଯାଇଛି।

ବିଦେଶୀ ମୁଦ୍ରା ସମ୍ପତ୍ତିର ବ୍ୟବହାର ଢାଞ୍ଚାରେ ସାମାନ୍ୟ ପରିବର୍ତ୍ତନ କରାଯାଇଛି। ଯେଉଁଥିରେ ବିଦେଶୀ ବାଣିଜ୍ୟିକ ବ୍ୟାଙ୍କଗୁଡ଼ିକରେ ସିକ୍ୟୁରିଟିଜ୍ ଏବଂ ଡିପୋଜିଟ୍ ନିବେଶରେ ସାମାନ୍ୟ ହ୍ରାସ ଏବଂ ଅନ୍ୟ କେନ୍ଦ୍ରୀୟ ବ୍ୟାଙ୍କ ଏବଂ BISରେ ଡିପୋଜିଟ୍‌ରେ ବୃଦ୍ଧି ଦେଖିବାକୁ ମିଳିଛି। ରିପୋର୍ଟ ଅନୁଯାୟୀ, ମାର୍ଚ୍ଚ ୨୦୨୬ ଶେଷରେ ରିଜର୍ଭ ବ୍ୟାଙ୍କର ନେଟ୍ ଫରୱାର୍ଡ ଆସେଟ୍ସ (ଦେୟଯୋଗ୍ୟ) ୧୦୩.୦୬ ବିଲିୟନ ଆମେରିକୀୟ ଡଲାର ଥିଲା।

ସୌଜନ୍ୟ Prameya News7