Sevayat.: ପୂଜାପଣ୍ଡା ସେବାୟତଙ୍କ ନାଁରେ ହୋଇଛି ସାହିର ନାମ

ପୁରୁଣା ଭୁବନେଶ୍ବର: ପୁରୁଣା ଭୁବନେଶ୍ବର ରଥରୋଡ଼୍‌ରେ ରହିଛି ପୂଜାପଣ୍ଡାସାହି। ପୁରୁଣା ଭୁବନେଶ୍ବରର ସବୁଠୁ ଛୋଟସାହି ଏହି ପୂଜାପଣ୍ଡାସାହିର ରାସ୍ତା ଖୁବ୍‌ସଂକୀର୍ଣ୍ଣ। ପୂର୍ବରୁ ଏଠାରେ ୧୦ ପୂଜାପଣ୍ଡା ପରିବାର, ୪ ମହାରଣା ପରିବାର, ୩ ଦାଶ ବ୍ରାହ୍ମଣ ପରିବାର ରହୁଥିଲେ। ଏବେ ପୂଜାପଣ୍ଡାସାହିରେ ପ୍ରାୟ ୨୫ ପରିବାର ରହୁଛନ୍ତି। ତେବେ ସେଥିରୁ ମାତ୍ର ୫ଟି ପୂଜାପଣ୍ଡା ପରିବାର ଏବେ ସାହିରେ ବାସ କରୁଛନ୍ତି। ଯିବା ଆସିବା, ଗାଡ଼ି ରଖିବା ସମସ୍ୟା ଯୋଗୁ ଅନ୍ୟ ପୂଜାପଣ୍ଡା ପରିବାରମାନେ ଅନ୍ୟତ୍ର ଘରଡିହ କିଣି ଘର କରି ରହୁଛନ୍ତି। ପୂଜାପଣ୍ଡା ସେବାୟତମାନେ ଶ୍ରୀଲିଙ୍ଗରାଜ ମହାପ୍ରଭୁଙ୍କୁ  ଧାର୍ଯ୍ୟ ନୀତିରେ ପ୍ରତିଦିନ ପିଢ଼ାରେ ବସାଇ ସଂସ୍କାର କରିବା ସହ ପ୍ରସାଦ ସମର୍ପଣ କରିଥାନ୍ତି। ସକାଳେ ପଞ୍ଚ ଉପଚାରରେ ଗୋପାଳବଲ୍ଲଭ, ଭୋଗମଣ୍ଡପ ଓ ବୀରକିଶୋର ବଲ୍ଲଭ ନୀତି କରିଥାନ୍ତି। ସକାଳ ଧୂପ ଷୋଡ଼ଶ ଉପଚାରରେ ଓ ଦ୍ବିପ୍ରହର ଧୂପରେ ଦଶ ଉପଚାର ପୂଜା କରିବା ସହ ଦ୍ବିପ୍ରହରରେ ପଞ୍ଚ ଉପଚାର ପୂଜା କରିଥାନ୍ତି। ସେହିପରି ସନ୍ଧ୍ୟାରେ ଷୋଡ଼ଶ ଉପଚାରରେ ସନ୍ଧ୍ୟା ଧୂପ କରିବା ସହ ଶେଷରେ ପହୁଡ଼ ପୂର୍ବରୁ ବଡ଼ସିଂହାର ପଞ୍ଚ ଉପଚାର ପୂଜା କରନ୍ତି। ଏହି ସେବାୟତ ରୁକୁଣା ରଥଯାତ୍ରାରେ ଛେରାପହଁରା କରିଥାନ୍ତି। ଏଥିସହ ଠାକୁରେ ରଥରେ ଥିବା ସମୟରେ ସବୁ ନୀତି କରନ୍ତି। ଏବେ ଏହି ସାହିରେ ୫ ପୂଜାପଣ୍ଡା ପରିବାର ବ୍ୟତୀତ ଜଣେ ଦାଶ ବ୍ରାହ୍ମଣଙ୍କ ପରିବାର, ୨ଟି ମହାରଣା ପରିବାର, ଓ ଅନ୍ୟ କିଛି ପରିବାର ଭଡ଼ାରେ ଆସି ରହୁଛନ୍ତି।