ୱାସିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ପୁଣି ଥରେ ତାଙ୍କ ନିଜ ଦେଶର ନିର୍ବାଚନ ବ୍ୟବସ୍ଥା ଉପରେ ପ୍ରଶ୍ନ ଉଠାଇ ଏକ ବଡ଼ ବୟାନ ଦେଇଛନ୍ତି। ସେ କହିଛନ୍ତି ଯେ, ଆମେରିକା ନିର୍ବାଚନରେ ଜାଲିଆତି, ଚୋରି ହୋଇଛି ଏବଂ ସାରା ବିଶ୍ୱରେ ଏହା ଏକ ତାମସା ପାଲଟିଛି। ତାଙ୍କ ବୟାନ ପରେ, ଆମେରିକାରେ ନିର୍ବାଚନ ସଂସ୍କାର ଉପରେ ବିତର୍କ ପୁଣି ଥରେ ତୀବ୍ର ହୋଇଛି। ପୂର୍ବରୁ ଜୋ ବାଇଡେନଙ୍କ ବିଜୟ ପରେ ଟ୍ରମ୍ପ ଆମେରିକା ନିର୍ବାଚନ ବ୍ୟବସ୍ଥା ବିରୋଧରେ ସ୍ୱର ଉଠାଇଥିଲେ। ଏବେ ସେ ମଧ୍ୟବର୍ତ୍ତୀକାଳୀନ ନିର୍ବାଚନ ପୂର୍ବରୁ ନିର୍ବାଚନ ପ୍ରସଙ୍ଗ ଉଠାଇଛନ୍ତି।

ଡୋନାଲ୍ଡ ଟ୍ରମ୍ପ ‘ସେଭ୍ ଆମେରିକା ଆକ୍ଟ୩ ନାମକ ଏକ ପ୍ରମୁଖ ନିର୍ବାଚନ ସଂସ୍କାର ଆଇନ ପ୍ରଣୟନ କରିବାକୁ ରିପବ୍ଲିକାନ ନେତାମାନଙ୍କୁ ନିବେଦନ କରିଛନ୍ତି। ଟ୍ରମ୍ପ ତାଙ୍କ ସୋସିଆଲ ମିଡିଆ ପ୍ଲାଟଫର୍ମ, ଟ୍ରୁଥ୍ ସୋସିଆଲରେ ଲେଖିଛନ୍ତି ଯେ, ଯଦି ନିର୍ବାଚନ ବ୍ୟବସ୍ଥା ସ୍ଥିର ନହୁଏ, ତେବେ ଦେଶର ଭବିଷ୍ୟତ ବିପଦରେ ପଡ଼ିପାରେ। ସେ ଏହି ପ୍ରସ୍ତାବ ମଧ୍ୟରେ ତିନୋଟି ପ୍ରମୁଖ ପରିବର୍ତ୍ତନର ରୂପରେଖା ଦେଇଛନ୍ତି।

ପ୍ରଥମ ହେଉଛି ପ୍ରତ୍ୟେକ ଭୋଟରଙ୍କ ପାଇଁ ସେମାନଙ୍କର ପରିଚୟପତ୍ର ଅର୍ଥାତ୍ ଭୋଟର ପରିଚୟପତ୍ର ଦେଖାଇବା ବାଧ୍ୟତାମୂଳକ କରାଯିବା ଉଚିତ।

ଦ୍ବିତୀୟ: ଭୋଟ ଦେବା ପୂର୍ବରୁ ନାଗରିକତାର ପ୍ରମାଣ ଦେବା ବାଧ୍ୟତାମୂଳକ

ତୃତୀୟରେ ଅସୁସ୍ଥତା, ଅକ୍ଷମତା, ସାମରିକ ସେବା କିମ୍ବା ଯାତ୍ରା ଭଳି ବିଶେଷ ପରିସ୍ଥିତି ବ୍ୟତୀତ, ମେଲ୍-ଇନ୍ ବାଲଟଗୁଡ଼ିକୁ ପ୍ରାୟତଃ ବାଦ୍ ଦିଆଯିବା ଉଚିତ।

ପୂର୍ବରୁ, ମାର୍ଚ୍ଚ ୩୧ ତାରିଖରେ ଟ୍ରମ୍ପ ଏକ କାର୍ଯ୍ୟନିର୍ବାହୀ ନିର୍ଦ୍ଦେଶରେ ସ୍ୱାକ୍ଷର କରିଥିଲେ ଯେଉଁଥିରେ ପ୍ରତ୍ୟେକ ରାଜ୍ୟକୁ ଯୋଗ୍ୟ ଭୋଟରଙ୍କ ତାଲିକା ପ୍ରସ୍ତୁତ କରିବାକୁ ଏବଂ କେବଳ ଯାଞ୍ଚ୍ ହୋଇଥିବା ଭୋଟରମାନଙ୍କୁ ମେଲ୍-ଇନ୍ ବାଲଟ୍ ପଠାଇବାକୁ ନିର୍ଦ୍ଦେଶ ଦିଆଯାଇଥିଲା। ଟ୍ରମ୍ପ ଏହାକୁ ସମ୍ପୂର୍ଣ୍ଣ ଆଇନଗତ ଏବଂ ସୁରକ୍ଷିତ ବୋଲି ବର୍ଣ୍ଣନା କରିଥିଲେ। ତେବେ ନିର୍ବାଚନ ବିଶେଷଜ୍ଞ ଏବଂ ବିରୋଧୀ ଦଳଗୁଡ଼ିକ ଏହି ଆଦେଶକୁ ଦୃଢ଼ ବିରୋଧ କରିଛନ୍ତି, ଏହା ସମ୍ବିଧାନର ଉଲ୍ଲଂଘନ କରୁଛି ବୋଲି ଯୁକ୍ତି ଦେଇଛନ୍ତି। ଭୋଟ ଅଧିକାର ସମର୍ଥକ ଏବଂ ଡେମୋକ୍ରାଟିକ୍ ନେତାମାନେ ଏହାକୁ କୋର୍ଟରେ ଚ୍ୟାଲେଞ୍ଜ କରିଛନ୍ତି। ପ୍ରାୟ ଗୋଟିଏ ବର୍ଷ ପୂର୍ବେ ଜାରି ହୋଇଥିବା ଏକ ନିର୍ବାଚନ-ସମ୍ବନ୍ଧୀୟ ଆଦେଶ ଉପରେ ଫେଡେରାଲ୍ କୋର୍ଟ ରୋକ ଲଗାଇଥିଲେ। କୋର୍ଟ କହିଥିଲେ, ରାଷ୍ଟ୍ରପତିଙ୍କ ପାଖରେ ସିଧାସଳଖ ନିର୍ବାଚନ ନୀତି ନିର୍ଣ୍ଣୟ କରିବାର ସାମ୍ବିଧାନିକ କ୍ଷମତା ନାହିଁ। ଟ୍ରମ୍ପ ଦୀର୍ଘ ଦିନ ଧରି ମେଲ୍-ଇନ୍ ବାଲଟ୍ ମାଧ୍ୟମରେ ଜାଲିଆତି ହେଉଥିବା ଏବଂ ଅଣ-ନାଗରିକଙ୍କ ଦ୍ୱାରା ଭୋଟ୍ ଦିଆଯାଉଥିବା ଅଭିଯୋଗ କରିଆସୁଛନ୍ତି। ବିଶେଷଜ୍ଞମାନଙ୍କ ମଧ୍ୟରେ ଏହି ଦାବି ନେଇ ମତଭେଦ ରହିଛି। ଠୋସ୍ ପ୍ରମାଣର ଅସ୍ତିତ୍ୱ ଉପରେ ବିତର୍କ ଜାରି ରହିଛି। ସେଭ୍ ଆମେରିକା ଆଇନ ବର୍ତ୍ତମାନ ଆମେରିକା କଂଗ୍ରେସରେ ଅଟକି ରହିଛି। ଡେମୋକ୍ରାଟିକ୍ ପାର୍ଟି ଏହାକୁ ବିରୋଧ କରୁଛି, ଏବଂ ଏହାକୁ ସେନେଟ୍‌ରେ ବିତର୍କ ବିନା ପାସ୍ କରାଯାଇପାରିବ ନାହିଁ।

ସୌଜନ୍ୟ ସମ୍ବାଦ