ରିୟାଦ: ଆମେରିକା ଏବଂ ଇସ୍ରାଏଲ ଫେବ୍ରୁଆରି ୨୮ ତାରିଖରେ ଇରାନରେ ଆକ୍ରମଣ ଆରମ୍ଭ କରିଥିଲେ। ପରେ ଇରାନ ଇସ୍ରାଏଲ ଏବଂ ଉପସାଗରୀୟ ଦେଶଗୁଡ଼ିକରେ ଥିବା ଆମେରିକୀୟ ଘାଟି ଉପରେ କ୍ଷେପଣାସ୍ତ୍ର ଏବଂ ଡ୍ରୋନ୍ ମାଡ଼ କରି ପ୍ରତିଶୋଧ ନେଇଥିଲା। ଇରାନର ଏହି ପ୍ରତିଶୋଧମୂଳକ ଆକ୍ରମଣ ଆମେରିକାର ବାୟୁ ପ୍ରତିରକ୍ଷା ବ୍ୟବସ୍ଥା ଉପରେ ପ୍ରଶ୍ନ ଉଠାଇଛି। ଇରାନ କ୍ଷେପଣାସ୍ତ୍ର ଉପସାଗରୀୟ ଦେଶଗୁଡ଼ିକରେ ଲକ୍ଷ୍ୟସ୍ଥଳକୁ କିପରି ଆକ୍ରମଣ କରିଛି ସେନେଇ ଅନେକ ବିଶେଷଜ୍ଞ ଥାଡ୍ ଭଳି ଆମେରିକୀୟ ବାୟୁ ପ୍ରତିରକ୍ଷା ପ୍ରଣାଳୀ ଥାଡ୍କୁ କଣା ଛତା ବୋଲି ଅଭିହିତ କରିଛନ୍ତି। ଉପସାଗରୀୟ ଦେଶଗୁଡ଼ିକ ପ୍ରଶ୍ନ କରିଛନ୍ତି, ସେମାନେ କୋଟି କୋଟି ଡଲାର ଖର୍ଚ୍ଚ କରି ଠିକ୍ ଜିନିଷରେ କିଣିଛନ୍ତି କି ନାହିଁ। ରିପୋର୍ଟ ଅନୁଯାୟୀ, ଆମେରିକାର ସୁରକ୍ଷା ପ୍ରଣାଳୀରେ ଏକ ପ୍ରମୁଖ ଉପାଦାନ ହେଉଛି କ୍ଷେପଣାସ୍ତ୍ର ପ୍ରତିରକ୍ଷା ବ୍ୟବସ୍ଥା। ଲକହିଡ୍ ମାର୍ଟିନର ଟର୍ମିନାଲ ହାଇ ଅଲ୍ଟିଚ୍ୟୁଡ୍ ଏରିଆ ଡିଫେନ୍ସ (ଥାଡ୍) ସିଷ୍ଟମକୁ ଶକ୍ତିଶାଳୀ ବୋଲି ବିବେଚନା କରାଯାଏ। ଏଥିରେ ପାଟ୍ରିଅଟ୍ ପିଏସି-୩ ବ୍ୟାଟେରୀ ରହିଛି। ଆମେରିକା ଏହି ସିଷ୍ଟମ ମାଧ୍ୟମରେ ଉପସାଗରୀୟ ଦେଶଗୁଡ଼ିକୁ ସୁଦୃଢ଼ ବାୟୁ ପ୍ରତିରକ୍ଷାର ପ୍ରତିଶ୍ରୁତି ଦେଇଥିଲା।
ଆମେରିକା ଏହି ସିଷ୍ଟମଗୁଡ଼ିକୁ ଗୋଲ୍ଡ ଷ୍ଟାଣ୍ଡାର୍ଡ କହି ଉପସାଗରୀୟ ଦେଶଗୁଡ଼ିକୁ ବିକ୍ରି କରିଥିଲା। ଏଗୁଡ଼ିକ ଉଚ୍ଚ-ଉଚ୍ଚତା ଇଣ୍ଟରସେପ୍ଟର ଥିଲା ଯାହା ଶେଷ ପର୍ଯ୍ୟାୟରେ ବାଲିଷ୍ଟିକ୍ କ୍ଷେପଣାସ୍ତ୍ରକୁ ଖସାଇ ଦେବାକୁ ସକ୍ଷମ। ଏଥିରେ କମ୍ କ୍ଷମତାଯୁକ୍ତ ପାଟ୍ରିଓଟ୍ ସିଷ୍ଟମ ଖଞ୍ଚା ଯାଇଛି। ଯାହା କ୍ଷୁଦ୍ର-ଦୂରଗାମୀ କ୍ଷେପଣାସ୍ତ୍ର ଏବଂ ଡ୍ରୋନ୍ର ମୁକାବିଲା କରିବା ପାଇଁ ଉଦ୍ଦିଷ୍ଟ। ଉପସାଗରୀୟ ଦେଶଗୁଡ଼ିକ ଏହି ପ୍ରଣାଳୀ ପାଇଁ କୋଟି କୋଟି ଡଲାର ଖର୍ଚ୍ଚ କରିଛନ୍ତି, ସେମାନଙ୍କର ଭରସାଥିଲା କ୍ଷେପଣାସ୍ତ୍ର ବିପଦରୁ ଥାଡ୍ ସୁରକ୍ଷା ଦେବ। ୬ ସପ୍ତାହ ଧରି ଚାଲିଥିବା ଯୁଦ୍ଧ ପ୍ରମାଣିତ କରିଛି ଥାଡ୍ ପ୍ରଣାଳୀର ପ୍ରଦର୍ଶନ ଖରାପ ରହିଛି। ଇରାନର କ୍ଷେପଣାସ୍ତ୍ର ସାଉଦି ଆରବ, ୟୁଏଇ, କୁଏତ ଏବଂ କତାରରେ ସଠିକ୍ ଭାବରେ ଲକ୍ଷ୍ୟଭେଦ କରିଛି।
ଗତ ବର୍ଷ ମେ’ ମାସରେ, ସାଉଦି ଆରବ ଏବଂ ଆମେରିକା ଏକ ପ୍ରମୁଖ ସାମରିକ ସହଯୋଗ ଚୁକ୍ତିନାମା ସ୍ୱାକ୍ଷର କରିଥିଲେ। ସାଉଦି ଆରବ ପାଇଁ ୧୪୨ ବିଲିୟନ ଡଲାରର ଅସ୍ତ୍ରଶସ୍ତ୍ର ପ୍ୟାକେଜ୍ ଘୋଷଣା କରାଯାଇଥିଲା। ଏହି ପ୍ୟାକେଜ୍ରେ ଥାଡ୍ ସିଷ୍ଟମ, ପାଟ୍ରିଅଟ୍ ପିଏସି-୩ ଅପଗ୍ରେଡ୍ ଏବଂ ମିସାଇଲ୍, ଉନ୍ନତ ଆକାଶରୁ ଆକାଶ ଅସ୍ତ୍ରଶସ୍ତ୍ର, ସଶସ୍ତ୍ର ଡ୍ରୋନ୍ ଏବଂ ଗୋଳାବାରୁଦ ଅନ୍ତର୍ଭୁକ୍ତ ଥିଲା। ଇରାନର ଆକ୍ରମଣରେ ଏହି ପ୍ରଣାଳୀଗୁଡ଼ିକର ପରୀକ୍ଷଣ କରାଯିବା ପରେ ଆମେରିକା ଏବଂ ସାଉଦି ଆରବ ମଧ୍ୟରେ ହୋଇଥିବା ଚୁକ୍ତିନାମା ଉପରେ ପ୍ରଶ୍ନ ଉଠିଛି। ଉପସାଗରୀୟ ଦେଶଗୁଡ଼ିକରେ ନିୟୋଜିତ ଆମେରିକାର ପ୍ରତିରକ୍ଷା ବ୍ୟବସ୍ଥା ଇରାନୀ ଆକ୍ରମଣ ବିରୋଧରେ ସମ୍ପୂର୍ଣ୍ଣ ବିଫଳ ହୋଇଛି। ସମଗ୍ର ବିଶ୍ୱ କ୍ଷେପଣାସ୍ତ୍ରଗୁଡ଼ିକ ଆମେରିକୀୟ ସାମରିକ ଘାଟି ଉପରେ ଆକ୍ରମଣ କରିଥିବାର ଦେଖିଛି।
ଉପସାଗରୀୟ ଦେଶଗୁଡ଼ିକ, ବିଶେଷକରି ସାଉଦି ଆରବ, ସେମାନଙ୍କର ଚୁକ୍ତିନାମାର ପୁନଃ ଆଲୋଚନା କରିବାକୁ ଚିନ୍ତା କରୁଛନ୍ତି। ବାସ୍ତବତା ହେଉଛି ଏକ ଅଭେଦ୍ୟ ଢାଲ କୁହାଯାଉଥିବା ଥାଡ୍ ପ୍ରଣାଳୀ କଣା ଛତା ପ୍ରମାଣିତ ହୋଇଛି। ଫଳସ୍ୱରୂପ, ଉପସାଗରୀୟ ଦେଶଗୁଡ଼ିକ ବର୍ତ୍ତମାନ ଆମେରିକୀୟ ସାମରିକ ଉପକରଣ ଉପରେ ସେମାନଙ୍କର ନିର୍ଭରଶୀଳତାରୁ ଓହରିବାକୁ ଚିନ୍ତା କରୁଛନ୍ତି।
ସୌଜନ୍ୟ ସମ୍ବାଦ