USA-Israel_Iran War ସାଉଦି ଆରବ ପରେ ହର୍ମୁଜ ଖୋଲିବାକୁ ଚାପ ପକାଇଲା ୟୁଏଇ

ଦୁବାଇ: ମଧ୍ୟପ୍ରାଚ୍ୟରେ ଯୁଦ୍ଧ ତେଜିବାର ଆଶଙ୍କା ମଧ୍ୟରେ ୟୁନାଇଟେଡ୍ ଆରବ ଏମିରେଟ୍ସ (ୟୁଏଇ) ଆମେରିକା ଓ ଅନ୍ୟ ସହଯୋଗୀଙ୍କ ସହ ମିଶି ରଣନୀତିକ ହର୍ମୁଜ ପ୍ରଣାଳୀ ଖୋଲିବାକୁ ପ୍ରସ୍ତୁତ ହେଉଥିବା ଜଣାଯାଇଛି। ଯଦି ୟୁଏଇ ସାମରିକ ବିବାଦରେ ଯୋଗ ଦିଏ, ତେବେ ଏହା ପ୍ରଥମ ପାରସ୍ୟ ଉପସାଗରୀୟ ଦେଶ ହେବ ଯିଏକି ଇରାନ ବିରୋଧରେ ଯୁଦ୍ଧ କରିବ।

ୱାଲ୍ ଷ୍ଟ୍ରିଟ୍ ଜର୍ଣ୍ଣାଲର ଏକ ରିପୋର୍ଟ ଅନୁଯାୟୀ, ଆରବ ଦେଶ ମିଳିତ ଜାତିସଂଘ ସୁରକ୍ଷା ପରିଷଦର ଏକ ସଂକଳ୍ପନାମା ପାଇଁ ଲବି କରୁଛି, ଯାହା ଏପରି କାର୍ଯ୍ୟକୁ ଅନୁମତି ଦେଇପାରେ। ଏମିରେଟ୍ସ ଅଧିକାରୀଙ୍କ ଉଦ୍ଧୃତି ଦେଇ ରିପୋର୍ଟରେ କୁହାଯାଇଛି ଯେ, ଦେଶର କୂଟନୀତିଜ୍ଞମାନେ ଆମେରିକା ଏବଂ ୟୁରୋପ ଓ ଏସିଆର ସାମରିକ ଶକ୍ତିମାନଙ୍କୁ ବଳପୂର୍ବକ ପ୍ରଣାଳୀ ଖୋଲିବା ପାଇଁ ଏକ ମିଳିତ ମଞ୍ଚ ଗଠନ କରିବାକୁ ଅନୁରୋଧ କରିଛନ୍ତି। ଉପସାଗରୀୟ ରାଷ୍ଟ୍ରଗୁଡ଼ିକ ଖାଦ୍ୟ ସମେତ ଉଭୟ ରପ୍ତାନି ଓ ଆମଦାନି ପାଇଁ ହର୍ମୁଜ ପ୍ରଣାଳୀ ଉପରେ ନିର୍ଭର କରନ୍ତି। ଅଧିକାଂଶ ଗଲ୍ଫ ତୈଳ, ଯାହା ବିଶ୍ୱ ଯୋଗାଣର ପ୍ରାୟ ୨୦ ପ୍ରତିଶତ, ଏହା ଦେଇ ପ୍ରବାହିତ ହୁଏ। କିନ୍ତୁ ଆମେରିକା-ଇସ୍ରାଏଲ ଆକ୍ରମଣର ପ୍ରତିଶୋଧ ସ୍ୱରୂପ, ଇରାନ ଗୁରୁତ୍ୱପୂର୍ଣ୍ଣ ଜଳପଥ ବନ୍ଦ କରିଦେଇଛି, ଯାହା ବିଶ୍ୱର ତୈଳ ଓ ପ୍ରାକୃତିକ ଗ୍ୟାସ ଯୋଗାଣରେ ବାଧା ସୃଷ୍ଟି କରିଛି ଏବଂ ବିଶ୍ୱ ବଜାରକୁ ପ୍ରଭାବିତ କରିଛି।

ୟୁଏଇର ଅଧିକାରୀମାନେ କହିଛନ୍ତି ଯେ ୟୁଏଇ ପ୍ରଣାଳୀକୁ ସୁରକ୍ଷିତ କରିବାରେ କିପରି ସାମରିକ ଭୂମିକା ଗ୍ରହଣ କରିପାରିବ ତାହା ଉପରେ ସକ୍ରିୟ ଭାବରେ ସମୀକ୍ଷା କରୁଛି। ୟୁଏଇର ବୈଦେଶିକ ମନ୍ତ୍ରଣାଳୟ ଏହା ମଧ୍ୟ କହିଛି ଯେ, ହର୍ମୁଜ ପ୍ରଣାଳୀରେ ଗତାଗତ ସ୍ୱାଧୀନତା ସଂରକ୍ଷଣ କରାଯିବା ଆବଶ୍ୟକ ବୋଲି ବ୍ୟାପକ ବିଶ୍ୱସ୍ତରୀୟ ସହମତି ରହିଛି। ୟୁଏଇର ନୂତନ ଦୃଢ ଆଭିମୁଖ୍ୟ ହେଉଛି ଏହାର ରଣନୀତିକ ଦୃଷ୍ଟିକୋଣରେ ଏକ ମୌଳିକ ପରିବର୍ତ୍ତନ, କାରଣ ଦେଶର ବାଣିଜ୍ୟିକ କେନ୍ଦ୍ର ଦୁବାଇ ଦୀର୍ଘ ଦିନ ଧରି ଇରାନ ଶାସନକୁ ଆର୍ଥିକ ସହାୟତା ଦେଇଆସୁଛି। ଅଧିକାରୀମାନେ କହିଛନ୍ତି ଯେ, ସାଉଦି ଆରବ ସମେତ ଅନ୍ୟ ଉପସାଗରୀୟ ରାଷ୍ଟ୍ର ମଧ୍ୟ ବର୍ତ୍ତମାନ ଇରାନ ବିରୋଧରେ ମୁହାଁମୁହିଁ ହେଉଛନ୍ତି ଏବଂ ଇସଲାମିକ ଶାସନକୁ ଅକ୍ଷମ କିମ୍ବା ଗାଦିଚ୍ୟୁତ ନ କରିବା ପର୍ଯ୍ୟନ୍ତ ଯୁଦ୍ଧ ଜାରି ରଖିବାକୁ ଚାହୁଛନ୍ତି।

ଯୁଦ୍ଧ ଚାଲିଥିବାରୁ ୟୁଏଇ ଇରାନୀୟମାନଙ୍କୁ ଦେଶରେ ପ୍ରବେଶ ଉପରେ ପ୍ରତିବନ୍ଧକ ଲଗାଇଛି ବୋଲି ବୁଧବାର ଦିନ ତିନୋଟି ପ୍ରମୁଖ ଏୟାର୍‌ଲାଇନ୍ସ କହିଛନ୍ତି। ତେବେ ଦେଶରେ ୧୦ ବର୍ଷର ରେସିଡେନ୍ସି ପରମିଟ୍ ଥିବା ଗୋଲଡେନ୍ ଭିସାଧାରୀମାନେ ତଥାପି ପ୍ରବେଶ କରିପାରିବେ ବୋଲି କୁହାଯାଇଛି। ୟୁଏଇ ଯୁଦ୍ଧରେ ଯୋଗଦେବାର ରିପୋର୍ଟ ଇସ୍ରାଏଲ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ଦାବି ପରେ ଆସିଛି। ଇସ୍ରାଏଲ୍ ଗଣମାଧ୍ୟମ ରିପୋର୍ଟ ଅନୁଯାୟୀ, ନେତାନ୍ୟାହୁ ଏକ କ୍ୟାବିନେଟ୍ ବୈଠକରେ ମନ୍ତ୍ରୀମାନଙ୍କୁ କହିଛନ୍ତି ଯେ କିଛି ଆରବ ଦେଶ ଆମ ପକ୍ଷରେ ଏକାଠି ଲଢ଼ିବା ବିଷୟରେ କହୁଛନ୍ତି। ନିଜକୁ ଆରବ ଜଗତର ଅର୍ଥନୈତିକ ଓ ରାଜନୈତିକ ନେତା ଭାବରେ ଦେଖୁଥିବା ସାଉଦି ଆରବ ମଧ୍ୟ ଧମକ ଦେଇଛି ଯେ, ଯଦି ତେହେରାନ ଦେଶ ବିରୋଧରେ ସାମରିକ ଆକ୍ରମଣ ବନ୍ଦ ନ କରେ ତେବେ ଏହା ଯୁଦ୍ଧରେ ପ୍ରବେଶ କରିବ।

ସୌଜନ୍ୟ ସମ୍ବାଦ